തിരുവനന്തപുരം: കേരള സര്‍വകലാശാലയിലെ എം.ബി.എ അവസാന വര്‍ഷ വിദ്യാര്‍ഥികളുടെ ഉത്തരക്കടലാസ് നഷ്ടപ്പെട്ട സംഭവത്തില്‍ സര്‍വകലാശാല രജിസ്ട്രാര്‍ ഡി.ജി.പിക്ക് പരാതി നല്‍കി. സംഭവത്തില്‍ അന്വേഷണത്തിന് നിര്‍ദേശിച്ചുവെന്ന് വൈസ് ചാന്‍സലര്‍ മോഹന്‍ കുന്നുമ്മലും പ്രതികരിച്ചു. സംഭവത്തില്‍ അന്വേഷണത്തിന് ശേഷം കൂടുതല്‍ പ്രതികരിക്കാമെന്നും മോഹന്‍ കുന്നുമ്മല്‍ പറഞ്ഞു. 

സംഭവത്തില്‍ കേരള സര്‍വകലാശാല വൈസ് ചാന്‍സിലര്‍ പരീക്ഷ വിഭാഗത്തിന്റെ അടിയന്തര യോഗം വിളിച്ചിട്ടുണ്ട്. അടുത്തമാസം ഒന്നിനാണ് യോഗം. സംഭവത്തില്‍ കര്‍ശന നടപടിയുണ്ടാകുമെന്നും വി.സി അറിയിച്ചു. വിദ്യാര്‍ഥികള്‍ക്ക് പ്രയാസം ഉണ്ടാകാത്ത തരത്തില്‍ പ്രശ്നപരിഹാരത്തിന് ശ്രമിക്കുമെന്ന് വി.സി. അറിയിച്ചു. 
മുല്യനിര്‍ണയത്തിന് കൈമാറിയ എം.ബി.എ അവസാനവര്‍ഷ പ്രൊജക്ട് ഫിനാന്‍സ് വിഷയത്തിന്റെ 71 ഉത്തരക്കടലാസുകളായിരുന്നു അധ്യാപകനില്‍ നിന്നും നഷ്ടപ്പെട്ടത്. ഇതോടെ എം.ബി.എ വിദ്യാര്‍ഥികളുടെ ഫലപ്രഖ്യാപനവും വൈകി. വീണ്ടും പരീക്ഷ നടത്താന്‍ സര്‍വകലാശാലയിലെ സിന്‍ഡിക്കേറ്റ് തീരുമാനിക്കുകയായിരുന്നു. ഏപ്രില്‍ ഏഴിനാണ് വീണ്ടും പരീക്ഷ.

പത്തു മാസം മുന്‍പ് നടന്ന ഫിനാന്‍സ് സ്ട്രീം എം.ബി.എ മൂന്നാം സെമസ്റ്റര്‍ 'പ്രൊജക്ട് ഫിനാന്‍സ്' വിഷയത്തിന്റെ ഉത്തരക്കടലാസ് ആണ് നഷ്ടമായത്. ഉത്തരക്കടലാസുകള്‍ യാത്രയ്ക്കിടെ ബൈക്കില്‍ നിന്നും വീണു പോയെന്നാണ് അധ്യാപകന്റെ വിശദീകരണം. ഇതു സംബന്ധിച്ച് പാലക്കാട് പൊലിസില്‍ പരാതിയും നല്‍കിയിട്ടുണ്ട്. ഒരുപാട് കുട്ടികള്‍ വിദേശത്തും മറ്റ് സംസ്ഥാനങ്ങളിലുമുള്ളവരാണ്. സര്‍വകലാശാലയുടെ പിഴവു മൂലം ഭാവി പ്രതിസന്ധിയിലായെന്ന് ഉത്തര പേപ്പര്‍ നഷ്ടപ്പെട്ട വിദ്യാര്‍ഥികള്‍ പറഞ്ഞു.

Complaint to DGP regarding missing answer sheet from Kerala university