കണ്ണൂര്‍: പിവി അന്‍വറിനെ കൂടെനിര്‍ത്താന്‍ വ്യക്തിപരമായി ശ്രമിക്കുമെന്ന് മുന്‍ കെപിസിസി അദ്ധ്യക്ഷന്‍ കെ സുധാകരന്‍. അന്‍വര്‍ യുഡിഎഫിനൊപ്പം ഉണ്ടായിരുന്നെങ്കില്‍ കരുത്താനേയെന്നും സുധാകരന്‍ മാധ്യമങ്ങളോടു പറഞ്ഞു. അന്‍വറിന്റെ യുഡിഎഫ് പ്രവേശനം തടഞ്ഞത് അന്‍വറിന്റെ തന്നെ നിബന്ധനകളാണെന്നും സുധാകരന്‍ കൂട്ടിച്ചേര്‍ത്തു.

'യുഡിഎഫ് സംവിധാനം ഇന്നലെ ഉണ്ടായതല്ല, ഒരു വ്യക്തിയുടെ താല്‍പ്പര്യത്തില്‍ അത് പൊളിക്കാനാകില്ല. അന്‍വര്‍ വരുന്നെങ്കില്‍ സന്തോഷം ഇനി അദ്ദേഹം സ്വതന്ത്രനായി മത്സരിച്ചാലും കുഴപ്പമില്ല. ഞങ്ങളുടെ വോട്ട്ബാങ്ക് പരിശോധിച്ചപ്പോള്‍ ഞങ്ങള്‍ക്ക് ഒരു ഭയപ്പാടും ഇല്ല. യുഡിഎഫ് സ്ഥാനാര്‍ത്ഥിയെ അംഗീകരിക്കാത്ത ഒരാളെ എങ്ങനെ മുന്നണിയില്‍ എടുക്കും' സുധാകരന്‍ ചോദിച്ചു.

അന്‍വറിന് സീറ്റ് വാഗ്ദാനം ചെയ്തതുമായി ബന്ധപ്പെട്ട് ചര്‍ച്ച നടന്നോ എന്നറിയില്ലെന്നും അന്‍വറിനെ യുഡിഎഫില്‍ എടുക്കുന്ന കാര്യം പൂര്‍ണമായും അടഞ്ഞിട്ടില്ലെന്നും സുധാകരന്‍ പറഞ്ഞു.

'അന്‍വറില്ലെങ്കിലും യുഡിഎഫ് ജയിക്കും. അന്‍വറും സതീശനും ഒന്ന് അയഞ്ഞിരുന്നെങ്കില്‍ യുഡിഎഫ് പ്രവേശനം സാധ്യമാകുമായിരുന്നു. യുഡിഎഫ് സ്ഥാനാര്‍ത്ഥിയെ അന്‍വര്‍ അംഗീകരിച്ചിരുന്നുവെങ്കില്‍ സതീശന്‍ അന്‍വറിന്റെ കൈപിടിച്ച് കൊണ്ടുവന്നേനെ' സുധാകരന്‍ പറഞ്ഞു.

സ്വരാജിന് വോട്ടാണ് ഉള്ളതെന്ന് അദ്ദേഹത്തിന് അറിയാമെന്നും അദ്ദേഹം മത്സരരംഗത്തു നിന്നും പിന്മാറാന്‍ പരമാവധി ശ്രമിച്ചതാണെന്നും സ്വരാജിനെ നിലമ്പൂരില്‍ നിര്‍ബന്ധിപ്പിച്ച് മത്സരിപ്പിച്ചതാണെന്നും സുധാകരന്‍ കൂട്ടിച്ചേര്‍ത്തു.