കോയമ്പത്തൂര്‍:  ഊട്ടി, കൊടൈക്കനാൽ എന്നീ ഹിൽ സ്റ്റേഷനുകളിലേക്ക് യാത്ര ചെയ്യാൻ പദ്ധതിയിടുന്ന സഞ്ചാരികൾക്ക് ഇനി മുതൽ ഇ-പാസ് നിർബന്ധമാക്കി. വേനൽക്കാലത്ത്  മലയോര കേന്ദ്രങ്ങളിലേക്കുള്ള വാഹനത്തിരക്ക് നിയന്ത്രിക്കുന്നതിന്റെ ഭാഗമായാണ് മദ്രാസ് ഹൈക്കോടതിയുടെ ഇടപെടലിനെ തുടർന്ന് അധികൃതർ നടപടി സ്വീകരിച്ചത്. പ്രവൃത്തി ദിനങ്ങളിൽ ഊട്ടിയിലേക്ക് പ്രതിദിനം 6000 വാഹനങ്ങൾക്കും വാരാന്ത്യങ്ങളിൽ 8000 വാഹനങ്ങൾക്കും മാത്രമാണ് പ്രവേശനം അനുവദിക്കുക.

ഇ-പാസ് സംവിധാനം കഴിഞ്ഞ ദിവസം മുതൽ നിലവിൽ വന്നു. ഊട്ടിയും കൊടൈക്കനാലും സന്ദർശിക്കാൻ ആഗ്രഹിക്കുന്നവർക്ക് https://epass.tnega.org/ എന്ന വെബ്സൈറ്റ് വഴി ഇ-പാസിനായി അപേക്ഷിക്കാം. എന്നാൽ, ഈ തീരുമാനത്തിൽ പ്രതിഷേധിച്ച് ഊട്ടിയിലെ വ്യാപാരികൾ കടകൾ അടച്ച് സമരം ആരംഭിച്ചു. വ്യാപാരികളുടെ സമരത്തോട് ഐക്യദാർഢ്യം പ്രഖ്യാപിച്ച് ഓട്ടോറിക്ഷകളും ടൂറിസ്റ്റ് ടാക്സികളും സർവീസ് നിർത്തിവെച്ചു. ഹോട്ടലുകൾ അടച്ചതിനാൽ സഞ്ചാരികൾക്ക് താമസസൗകര്യവും ഭക്ഷണവും ലഭിക്കാതെ വലഞ്ഞു.

നീലഗിരി ജില്ലയിലെ ഉദഗമണ്ഡലം (ഊട്ടി), കോട്ടഗിരി, ഗൂഡലൂർ, പന്തലൂർ എന്നിവിടങ്ങളിലാണ് കടകൾ അടച്ചിട്ടത്. ഇ-പാസ് സംവിധാനം പിൻവലിക്കണമെന്ന് ആവശ്യപ്പെട്ട വ്യാപാരികളും ടൂറിസ്റ്റ്-ടാക്സി ഓപ്പറേറ്റർമാരും ഇത് തങ്ങളുടെ ഉപജീവനത്തെ ബാധിക്കുമെന്ന് ആരോപിച്ചു. പുതിയ നിയമപ്രകാരം, സ്വകാര്യ വാഹനങ്ങളിൽ ജില്ല സന്ദർശിക്കുന്നവർ സർക്കാർ പോർട്ടലിൽ മുൻകൂട്ടി അപേക്ഷിച്ച് ഇ-പാസ് നേടണം.

മദ്രാസ് ഹൈക്കോടതി നേരത്തെ, തമിഴ്നാട്ടിലെ ഊട്ടിയിലും ദിണ്ടിഗൽ ജില്ലയിലെ കൊടൈക്കനാലിലും വർധിച്ചുവരുന്ന വാഹനത്തിരക്ക് നിയന്ത്രിക്കാൻ ഇ-പാസ് നടപ്പാക്കണമെന്ന് ഉത്തരവിട്ടിരുന്നു. എന്നാൽ, മെഡിക്കൽ അടിയന്തരാവശ്യങ്ങൾ, സർക്കാർ ബസുകൾ, ചരക്ക് വാഹനങ്ങൾ, നീലഗിരി ജില്ലയിലെ വാഹനങ്ങൾ എന്നിവയെ ഇതിൽ നിന്ന് ഒഴിവാക്കിയിട്ടുണ്ട്. കൂടാതെ, പ്രദേശവാസികളുടെ വാഹനങ്ങൾ, കാർഷികോൽപ്പന്നങ്ങൾ കൊണ്ടുപോകുന്ന വാഹനങ്ങൾ, തദ്ദേശവാസികൾ ഉപയോഗിക്കുന്ന വാഹനങ്ങൾ എന്നിവയ്ക്കും നിയന്ത്രണം ബാധകമല്ലെന്ന് കോടതി വ്യക്തമാക്കി.

Travelers to Ooty and Kodaikanal must obtain an e-pass as a mandatory requirement. Meanwhile, traders have shut down shops in protest against the restrictions.