ഏവിയേഷൻ മേഖലയിലെ ഏറ്റവും ആകർഷകമായ തൊഴിലുകളിലൊന്നായ പൈലറ്റാകാൻ പ്ലസ് ടു വിദ്യാർഥികൾക്ക് അവസരം. ഇന്ത്യയിൽ പൈലറ്റ് പരിശീലനത്തിനുള്ള ഏറ്റവും മികച്ച സ്ഥാപനമായ അമേത്തിയിലെ  ഇന്ദിരാഗാന്ധി രാഷ്ട്രീയ ഉഡാൻ അക്കാദമി (IGRUA) പ്രവേശനത്തിന് മെയ് രണ്ടു വരെ അപേക്ഷ സമർപ്പിക്കാം. 125 സീറ്റുകളുണ്ട്. 2025 ഓഗസ്റ്റിലും 2026 ഫെബ്രുവരിയിലും ആരംഭിക്കുന്ന ബാച്ചുകളിലേക്കാണ് പ്രവേശനം. വനിതകൾക്കും അവസരമുണ്ട്.

മൾട്ടി എൻജിൻ വിമാനത്തിലെ ഇൻസ്ട്രുമെന്റ് റേറ്റിങ് അടക്കമുള്ള കൊമേഴ്‌സ്യൽ പൈലറ്റ് ലൈസൻസ് പ്രോഗ്രാം (ആബ് ഇനിഷ്യോ ടു സി.പി.എൽ) ഏകദേശം 24 മാസത്തിനകം പൂർത്തിയാക്കാനാകും. ഇംഗ്ലിഷ്, മാത്തമാറ്റിക്‌സ്, ഫിസിക്‌സ് വിഷയങ്ങളിൽ ഓരോന്നിലും 50 ശതമാനം മാർക്കോടെ പ്ലസ്ടു ജയിച്ചിരിക്കണം. പട്ടിക, പിന്നോക്ക, സാമ്പത്തിക പിന്നാക്ക വിഭാഗക്കാർക്ക് 45 ശതമാനം മതി. ഇത്തവണ പരീക്ഷയെഴുതുന്നവർക്കും നിബന്ധനകൾക്കു വിധേയമായി അപേക്ഷിക്കാം. കോഴ്‌സിന് ചേരുമ്പോൾ 17 വയസ് തികഞ്ഞിരിക്കണം. 2025 ജൂലൈ ഒന്നിന് 28 വയസിൽ കവിയരുത്. ഒ.ബി.സിക്കാർക്ക് മൂന്ന് വർഷവും പട്ടിക വിഭാഗക്കാർക്ക് അഞ്ച് വർഷവും ഇളവുണ്ട്. 158  സെൻറീമീറ്ററെങ്കിലും ഉയരമുള്ള  അവിവാഹിതരാകണം.

45 ലക്ഷം രൂപയാണ് കോഴ്‌സ് ഫീസ്. യൂനിഫോം, നാവിഗേഷൻ കംപ്യൂട്ടറടക്കമുള്ള മറ്റു ചെലവുകൾക്ക് രണ്ടര ലക്ഷം രൂപ കൂടി വേണ്ടിവരും. ഹോസ്റ്റൽ ഫീ പ്രതിമാസം 15000 രൂപയോളം വരും.  ഇന്ത്യക്കകത്തും വിദേശത്തുമുള്ള പലതരം വിമാനങ്ങളിൽ ഏതൊക്കെ പറത്താമെന്ന് തീരുമാനിക്കുന്ന ടൈപ്പ് ട്രെയിനിങ് പരിശീലനം ലഭിക്കണമെങ്കിൽ  അധിക ഫീസ് അടയ്‌ക്കേണ്ടതുണ്ട്. പൈലറ്റ് ലൈസൻസിനോടൊപ്പം താൽപര്യമുള്ളവർക്ക് മൂന്നു വർഷം ദൈർഘ്യമുള്ള ബി.എസ്.സി ഏവിയേഷൻ ബിരുദം നേടാനും അവസരമുണ്ട്. 40 സീറ്റുകളുണ്ട് (80 ആക്കിയേക്കാം).

കംപ്യൂട്ടർ അധിഷ്ഠിത പരീക്ഷ 

മെയ് 24 നാണ് കംപ്യൂട്ടറധിഷ്ഠിത പ്രവേശന പരീക്ഷ. മെയ് 19 മുതൽ അഡ്മിറ്റ് കാർഡ്  ഡൗൺലോഡ് ചെയ്യാം. തിരുവനന്തപുരം, ചെന്നൈ, ബെംഗളുരു അടക്കം പതിനെട്ടോളം പരീക്ഷാ കേന്ദ്രങ്ങളുണ്ട്. മുൻഗണനാ ക്രമത്തിൽ മൂന്ന് സെന്ററുകൾ അപേക്ഷയിൽ സൂചിപ്പിക്കണം. 12, 000 രൂപയാണ് അപേക്ഷാ ഫീസ്. പട്ടിക വിഭാഗക്കാർക്ക് ഫീസില്ല. പരീക്ഷയ്ക്ക് ജനറൽ ഇംഗ്ലിഷ്, മാത്തമാറ്റിക്‌സ്, ഫിസിക്‌സ്, യുക്തിചിന്ത, ആനുകാലിക സംഭവങ്ങൾ എന്നിവയിൽ പ്ലസ് ടു നിലവാരത്തിലുള്ള ഒബ്ജക്റ്റീവ് ചോദ്യങ്ങൾ. നെഗറ്റീവ് മാർക്കില്ല. ഷോർട്ട് ലിസ്റ്റ് ചെയ്യപ്പെടുന്നവർക്ക് പൈലറ്റ് അഭിരുചി / സൈക്കോമെട്രിക്ക് ടെസ്റ്റ് , ഇൻറർവ്യൂ എന്നിവയുണ്ടാകും. മെഡിക്കൽ പരിശോധനകളും പൂർത്തിയാക്കണം. ജൂലൈ 15 ന് ഫലമറിയാം. വിശദവിവരങ്ങൾക്ക് igrua.gov.in സന്ദർശിക്കുക. ഇമെയിൽ: [email protected]. ഫോൺ:7607088040.

എയർക്രാഫ്റ്റ് മെയിന്റനൻസ് എൻജിനീയറിങ്

ഈ സ്ഥാപനത്തിലെ മൂന്നു വർഷം ദൈർഘ്യമുള്ള എയർക്രാഫ്റ്റ് മെയിന്റനൻസ് എൻജിനീയറിങ് കോഴ്‌സിനുള്ള പ്രവേശന പരീക്ഷയ്ക്കും ഇപ്പോൾ അപേക്ഷിക്കാം. 2025 ജൂലൈയിലാണ് കോഴ്‌സ് ആരംഭിക്കുന്നത്. 30 സീറ്റുകളുണ്ട്. മാത്തമാറ്റിക്‌സ്, ഫിസിക്‌സ് വിഷയങ്ങളിൽ ഓരോന്നിലും 50 ശതമാനം മാർക്കോടെ പ്ലസ്ടു ജയിച്ചിരിക്കണം. പട്ടിക, പിന്നോക്ക,സാമ്പത്തിക പിന്നാക്ക വിഭാഗക്കാർക്ക് 45 ശതമാനം മതി. ഫിസിക്‌സ്, കെമിസ്ട്രി, മാത്തമാറ്റിക്‌സ് വിഷയങ്ങളടങ്ങിയ എൻജിനീയറിങ് ഡിപ്ലോമയും പരിഗണിക്കും. 4.5 ലക്ഷമാണ് കോഴ്‌സ് ഫീസ്. ഓൺലൈൻ കംപ്യൂട്ടറധിഷ്ഠിത പരീക്ഷ, വൈവ / ഇന്റർവ്യു വഴിയാണ് പ്രവേശനം. മെയ് 24 നാണ് പരീക്ഷ. മെയ് 2 നകം  igrua.gov.in/igrua-entrance വഴി അപേക്ഷിക്കണം. 2000  രൂപയാണ് അപേക്ഷാ ഫീസ്. പട്ടിക വിഭാഗക്കാർക്ക് ഫീസില്ല. ജൂലൈ ഒന്നിന് ഫലമറിയാം. ഇമെയിൽ :[email protected]. ഫേൺ:9496230588.

Applications are open until May 2 for admission to the Indira Gandhi Rashtriya Udan Akademi (IGRUA) in Amethi, India’s premier pilot training institute

കൂടുതല്‍ തൊഴില്‍ വാര്‍ത്തകള്‍ക്ക് ഗ്രൂപ്പില്‍ ജോയിന്‍ ചെയ്യുക

കരിയര്‍ വാര്‍ത്തകള്‍ക്ക് ഗ്രൂപ്പില്‍ ജോയിന്‍ ചെയ്യുക