കരിപ്പൂർ: കൊച്ചി വിമാനത്താവളത്തിൽ നിന്നുള്ള ഹജ്ജ് സർവിസ് വെള്ളിയാഴ്ച ആരംഭിക്കുന്നതോടെ  22 വരെയുള്ള ദിവസങ്ങളിൽ സംസ്ഥാനത്തെ മൂന്ന് എംബാർക്കേഷൻ പോയിന്റുകളിൽ നിന്നും ഹജ്ജ് വിമാനങ്ങൾ സർവിസ് നടത്തും. കൊച്ചിയിൽ നിന്നും ആദ്യ ദിവസമായ വെള്ളിയാഴ്ച വൈകുന്നേരം 5.55 ന് പുറപ്പെടുന്ന  വിമാനത്തിൽ  146 പുരുഷന്മാരും 143 സ്ത്രീകളും അന്ന് രാത്രി 8.20 നുള്ള രണ്ടാമത്തെ വിമാനത്തിൽ  146 പുരുഷന്മാരും 140 സ്ത്രീകളും യാത്രതിരിക്കും. 
ശനിയാഴ്ച  പുറപ്പെടുന്ന വിമാനത്തിൽ പൂർണമായും വനിതാ തീർഥാടകരാണ് ഉണ്ടാവുക. കൊച്ചി ഹജ്ജ് ക്യാംപിന്റെ ഉദ്ഘാടനം വ്യാഴാഴ്ച രാത്രി ഏഴ് മണിക്ക്  മന്ത്രി പി.രാജീവ് നിർവഹിക്കും. 
വെള്ളിയാഴ്ച കോഴിക്കോട് നിന്നും രണ്ടും  കണ്ണൂരിൽ നിന്നും ഒരു വിമാനവുമാണ് സർവിസ് നടത്തുക.  കോഴിക്കോട് നിന്ന് ഇതുവരെ 14 വിമാനങ്ങളിലായി 2415 തീർഥാടകരും  കണ്ണൂരിൽ നിന്ന് എട്ട് വിമാനങ്ങളിലായി 1363 തീർഥാടകരും വിശുദ്ധ മക്കയിലെത്തി. ഇവർ സംഘങ്ങളായി എസ്.എച്ച്.ഐ മാരുടെ നേതൃത്തത്തിൽ ഉംറ കർമം നിർവഹിക്കുന്നതിനായി പുറപ്പെടുന്നുണ്ട്.

ഇന്ന്  കരിപ്പൂരിൽ നിന്ന്  മൂന്ന് വിമാനങ്ങളാണ്  സർവിസ് നടത്തുക. പുലർച്ചെ 12.30 നും രാവിലെ 7.40 നും വൈകുന്നേരം 4.05 നുമാണ് വിമാനങ്ങൾ പുറപ്പെടുക.  കണ്ണൂരിൽ നിന്ന്  പുലർച്ചെ 3.55 നും രാത്രി 7.25 നുമാണ് സർവിസ്.

കരിപ്പൂരിൽ ഇന്നലെ മൂന്ന് വിമാനങ്ങൾ സർവിസ് നടത്തി. വിവിധ സംഘങ്ങൾക്കുള്ള യാത്രയയപ്പ് സംഗമങ്ങളിൽ എം.എൽ.എമാരായ  രമേശ് ചെന്നിത്തല, പി.ടി.എ റഹീം, ടി.വി ഇബ്റാഹീം എന്നിവരും  ഹജ്ജ് കമ്മിറ്റി മുൻ ചെയർമാൻ സി. മുഹമ്മദ് ഫൈസിയും  പങ്കെടുത്തു.

ഹജ്ജ് കമ്മിറ്റി ചെയർമാൻ ഡോ. ഹുസൈൻ സഖാഫി ചുള്ളിക്കോട്, ഹജ്ജ് സെൽ സ്പെഷൽ ഓഫിസർ യു.അബ്ദുൽ കരീം,  അസി.സെക്രട്ടറി ജാഫർ കെ. കക്കൂത്ത്, യുസുഫ് പടനിലം, അബ്ദു റഹ്മാൻ സഖാഫി ഊരകം, അബ്ദു റഊഫ് ബാഖവി കരിപ്പൂർ തുടങ്ങിയവർ  സംബന്ധിച്ചു.