തിരുവനന്തപുരം: വഞ്ചിയൂരില്‍ ജൂനിയർ അഭിഭാഷകയെ ക്രൂരമായി മർദിച്ച സംഭവത്തിൽ പ്രതിയായ സീനിയർ അഭിഭാഷകൻ ബെയ്ലിൻ ദാസിനെതിരേ ബാർ കൗൺസിൽ നടപടി.  പ്രാക്റ്റീസ് ചെയ്യുന്നതിൽ നിന്ന് ഇയാൾക്ക് ബാർകൗൺസിൽ വിലക്കേർപ്പെടുത്തി. അച്ചടക്കനടപടി കഴിയുന്നതുവരെയാണ് വിലക്ക്. ബെയ്ലിന് കാരണം കാണിക്കൽ ദാസിന് നോട്ടിസ് നൽകുമെന്നും ബാർ കൗൺസിൽ അറിയിച്ചു. 

അച്ചടക്ക കമ്മിറ്റി തീരുമാനം അറിഞ്ഞ ശേഷം അന്തിമ തീരുമാനമെടുക്കും. ബാർ കൗൺസിൽ ഭാരവാഹികൾ അഭിഭാഷകനെ സഹായിച്ചെന്ന ആരോപണം അടിസ്ഥാന രഹിതമാണെന്നും നടന്നത് അസാധാരണ സംഭവമാണെന്നും ബാർ കൗൺസിൽ ചെയർമാൻ ടി.എസ് അജിത്ത് പ്രതികരിച്ചു. നേരത്തേ ബാർ അസോസിയേഷനും ഇയാളെ സസ്പെൻഡ് ചെയ്തിരുന്നു
അതേസമയം ജൂനിയർ അഭിഭാഷകയെ ക്രൂരമായി ആക്രമിച്ച് ഒരു ദിവസം പിന്നിടുമ്പോഴും പ്രതി ഒളിവിൽ തുടരുകയാണ്. തിരുവനന്തപുരം വഞ്ചിയൂര്‍ കോടതിയിലെ ജൂനിയര്‍ അഭിഭാഷകയായ പാറശ്ശാല കോട്ടവിള പുതുവല്‍ പുത്തന്‍വീട്ടില്‍ ശ്യാമിലി(26)യെയാണ് സീനിയര്‍ അഭിഭാഷകനായ ബെയ്‌ലിന്‍ ദാസ് ക്രൂരമായി മര്‍ദിച്ചത്. അടിയേറ്റ് കണ്ണിനും താടിയെല്ലുകള്‍ക്കും പരുക്കേറ്റ ശ്യാമിലി മെഡിക്കൽ കോളജ് ആശുപത്രിയിൽ ചികിത്സ തേടി. 

കൈകൊണ്ടും നിലംതുടയ്ക്കാന്‍ ഉപയോഗിക്കുന്ന മോപ്സ്റ്റിക്കുകൊണ്ടും സീനിയര്‍ അഭിഭാഷകന്‍ ക്രൂരമായി മര്‍ദിച്ചെന്നാണ് ശ്യാമിലിയുടെ പരാതി.

ചൊവ്വാഴ്ച രണ്ടരയോടെ വഞ്ചിയൂര്‍ ത്രിവേണി ആശുപത്രി റോഡിലെ  ഓഫിസിലായിരുന്നു സംഭവം. മൂന്നുവര്‍ഷമായി ബെയിലിൻ ദാസിനൊപ്പം ജൂനിയറായി പ്രാക്ടീസ് ചെയ്യുന്ന ശ്യാമിലിയെ ഒരാഴ്ച മുന്‍പ് പുറത്താക്കിയതായി അറിയിച്ചിരുന്നു. രണ്ടുദിവസം മുന്‍പ് വീണ്ടും വിളിച്ച ബെയ്ലിൻ, ഇവരോട് ക്ഷമ ചോദിക്കുകയും തിരികെ ജോലിക്കുവരാന്‍ നിര്‍ബന്ധിക്കുകയും ചെയ്തു. 
ജോലിക്കെത്തിയ ശ്യാമിലി തന്നെ പുറത്താക്കാനുള്ള കാരണം ചോദിച്ചതാണ് ക്രൂരമർദനത്തിൽ കലാശിച്ചത്. ഒടുവില്‍ ശ്യാമിലിയുടെ ഭര്‍ത്താവെത്തിയാണ് വിവരം പൊലിസില്‍ അറിയിച്ചത്.