ഭോപ്പാല്‍: കേണല്‍ സോഫിയ ഖുറേഷിക്കെതിരെ നടത്തിയ അധിക്ഷേപ പരാമര്‍ശത്തില്‍ മധ്യപ്രദേശ് മന്ത്രിയും ബിജെപി നേതാവുമായ വിജയ് ഷാക്കെതിരെ കേസ് രജിസ്റ്റര്‍ ചെയ്തു. വിജയ് ഷാക്കെതിരെ ഉടനടി കേസ് എടുക്കണമെന്ന് ഹൈക്കോടതി കര്‍ശന നിര്‍ദേശം പുറപ്പെടുവിച്ച് മണിക്കൂറുകള്‍ക്കകമാണ് കേസെടുത്തത്. മാന്‍പൂര്‍ പൊലിസാണ് കേസെടുത്തത്. വിജയ് ഷാക്കെതിരെ കേസെടുക്കാന്‍ മധ്യപ്രദേശ് മുഖ്യമന്ത്രി മോഹന്‍ യാദവ് പൊലിസിന് നിര്‍ദേശം നല്‍കിയിരുന്നു.

പാകിസ്ഥാനെതിരായ ഇന്ത്യയുടെ 'ഓപറേഷൻ സിന്ദൂറി'നെക്കുറിച്ച് മാധ്യമങ്ങൾക്കു മുൻപിൽ വിശദീകരിച്ച് രാജ്യത്തിന്റെ അഭിമാനമായി മാറിയ കേണൽ സോഫിയ ഖുറേഷിയെ വർഗീയമായി അധിക്ഷേപിച്ച മധ്യപ്രദേശിലെ ബി.ജെ.പി മന്ത്രിക്കെതിരേ എഫ്.ഐ.ആർ രജിസ്റ്റർ ചെയ്യാൻ ഹൈക്കോടതി ഉത്തരവിട്ടിരുന്നു.

സോഫിയ ഖുറേഷിയെ 'ഭീകരവാദികളുടെ സഹോദരി' എന്നു വിശേഷിപ്പിച്ച ബി.ജെ.പി നേതാവായ മന്ത്രി വിജയ് ഷായുടെ പരാമർശം സ്വമേധയാ പരിഗണനയ്ക്കെടുത്ത് മധ്യപ്രദേശ് ഹൈക്കോടതിയിലെ ജഡ്ജിമാരായ അതുൽ ശ്രീധരൻ, അനുരാധ ശുക്ല എന്നിവരടങ്ങിയ ഡിവിഷൻ ബെഞ്ചിന്റെതായിരുന്നു നടപടി.

മന്ത്രിയുടെ നടപടി സോഫിയ ഖുറേഷിക്കെതിരേ മാത്രമുള്ളതല്ലെന്നും മുഴുവൻ സായുധ സേനകളെയും അപമാനിക്കുന്നതും ഇന്ത്യയുടെ പരമാധികാരം, ഐക്യം, അഖണ്ഡത എന്നിവയെ അപകടത്തിലാക്കുന്നതുമാണെന്ന ശക്തമായ നിരീക്ഷണവും കോടതി നടത്തി. അപമാനകരം, അപകടകരം, അപരിഷ്‌കൃഭാഷ എന്നിങ്ങനെയാണ് ബെഞ്ച് ഇതിനെ വിശേഷിപ്പിച്ചത്. സമഗ്രത, പ്രൊഫഷനലിസം, അച്ചടക്കം, ത്യാഗം, നിസ്വാർഥത, ആദരവ്, അജയ്യമായ ധൈര്യം എന്നിവയെ പ്രതിഫലിപ്പിക്കുന്ന, ഏതൊരു പൗരനും വിലമതിക്കുന്ന ഒരുപക്ഷേ രാജ്യത്തെ ഏക സ്ഥാപനമാകും ഇന്ത്യൻ സായുധസേന. അതെല്ലാം മനസിലാക്കാൻ കഴിയുന്ന മന്ത്രി വിജയ് ഷാ, അപരിഷ്‌കൃതഭാഷയാണ് വനിതാ കേണലിനെതിരേ ഉപയോഗിച്ചത്. 

പഹൽഗാമിൽ ആക്രമണം നടത്തിയ ഭീകരന്റെ സഹോദരിയാണ് കേണൽ സോഫിയ ഖുറേഷിയെന്നാണ് മന്ത്രി പറഞ്ഞതെന്ന് പ്രഥമദൃഷ്ട്യാ വ്യക്തമാണ്. മുസ് ലിംകളായ ഏതൊരു വ്യക്തിയിലും വിഘടനവാദ വികാരം ആരോപിക്കുന്ന ഗുരുതരമായ പ്രവൃത്തിയും മന്ത്രിയിൽനിന്നുണ്ടായി. അത് ഇന്ത്യയുടെ പരമാധികാരത്തെയും ഐക്യത്തെയും അഖണ്ഡതയെയും അപകടത്തിലാക്കുന്നതാണ്- കോടതി ചൂണ്ടിക്കാട്ടി.  നാലുമണിക്കൂറിനുള്ളിൽ എഫ്.ഐ.ആർ ഫയൽ ചെയ്യാനാണ് പൊലിസിന് നിർദേശം ലഭിച്ചത്. എന്തെങ്കിലും വീഴ്ച വരുത്തിയാൽ കോടതിയലക്ഷ്യ നിയമപ്രകാരം ഡി.ജി.പി നടപടി നേരിടേണ്ടിവരുമെന്നു കോടതി മുന്നറിയിപ്പും നൽകി. കേസ് ഇന്നു രാവിലെ വീണ്ടും പരിഗണിക്കും.

മന്ത്രി രാജിവയ്‌ക്കേണ്ടി വരും

ഹൈക്കോടതി നിര്‍ദേശപ്രകാരം മന്ത്രി വിജയ് ഷായ്‌ക്കെതിരേ കേസെടുക്കുന്നതോടെ അദ്ദേഹത്തിന് രാജിവയ്‌ക്കേണ്ടിവരും. ബി.എന്‍.എസിലെ 152, 196(1) വകുപ്പുകള്‍ പ്രകാരം കേസെടുക്കാനാണ് നിര്‍ദേശം. 152 വകുപ്പ് പ്രകാരമാണ് ശിക്ഷിക്കപ്പെടുന്നതെങ്കില്‍ യഥാക്രമം ജീവപര്യന്തം അല്ലെങ്കില്‍ ഏഴുവര്‍ഷം തടവും പിഴയും ലഭിക്കാവുന്ന കുറ്റമാണിത്. 196(1) പകാരം ശിക്ഷ ലഭിക്കുന്നതെങ്കില്‍ അഞ്ചുവര്‍ഷവും ശിക്ഷ ലഭിക്കും. ജനപ്രാതിനിധ്യനിയമം അനുസരിച്ച് അയോഗ്യത ലഭിക്കുന്ന കുറ്റകൃത്യങ്ങളാണിവ.