തിരുവനന്തപുരം: കല്യാണത്തിന് വരനും വധുവും എത്തിയില്ലെങ്കിൽ എന്തു ചെയ്യും? അതൊരിക്കലും ശരിയാവില്ല. ചെറുക്കനും പെണ്ണും നേരിട്ട് വന്നാലേ പാരമ്പര്യ രീതിയിലുള്ള വിവാഹം നടക്കൂ എന്നാണ് കാരണവന്മാർ പറയാറ്. വിദേശത്തോ ദൂരസ്ഥലങ്ങളിലോ താമസിക്കുന്നവർക്ക് വിവാഹം രജിസ്റ്റർ ചെയ്യാൻ ഒരുമിച്ച് ഹാജരാകേണ്ടതുണ്ട് എന്നതും ഒരു വാദമാണ്. എന്നാൽ, പാരമ്പര്യത്തിന് യാതൊരു കോട്ടവും തട്ടാതെ, വരനും വധുവും ഒരിടത്ത് ഉണ്ടാകണമെന്ന നിബന്ധന ഇല്ലാതെ, വിഡിയോ കെവൈസി വഴി വിവാഹ രജിസ്ട്രേഷൻ സാധ്യമാക്കുന്ന പുതിയ സംവിധാനം  അവതരിപ്പിച്ചിരിക്കുകയാണ് കേരളം.

ഇതോടെ, ലോകത്തിന്റെ ഏത് കോണിൽ നിന്നും വരനും വധുവിനും വിവാഹം രജിസ്റ്റർ ചെയ്യാൻ കഴിയുന്ന സൗകര്യമാണ് കെ-സ്മാർട്ട് പദ്ധതിയിലൂടെ ലഭ്യമാകുന്നതെന്ന് മന്ത്രി എം.ബി. രാജേഷ് അറിയിച്ചു. കേരളത്തിന്റെ സാങ്കേതിക മുന്നേറ്റത്തിന്റെ പുതിയ മാതൃകയാണ് കെ-സ്മാർട്ട് വഴിയുള്ള ഈ വിവാഹ രജിസ്ട്രേഷൻ സംവിധാനമെന്നും മന്ത്രി വ്യക്തമാക്കി. രാജ്യത്ത് ആദ്യമായി വിഡിയോ കെവൈസി വഴി വിവാഹ രജിസ്ട്രേഷൻ സാധ്യമാക്കിയ കേരളത്തിൽ, 2024 ജനുവരി മുതൽ മാർച്ച് 31 വരെ നടന്ന 63,001 വിവാഹ രജിസ്ട്രേഷനുകളിൽ മൂന്നിലൊന്നും (21,344) ഓൺലൈൻ സംവിധാനം ഉപയോഗിച്ചാണ് പൂർത്തിയാക്കിയതെന്ന് മന്ത്രി ചൂണ്ടിക്കാട്ടി. കെ-സ്മാർട്ട് വഴി കേരളം വലിയ മുന്നേറ്റമാണ് നടത്തുന്നതെന്നും അദ്ദേഹം കൂട്ടിച്ചേർത്തു.

മന്ത്രി തന്റെ ഫേസ്ബുക്ക് പോസ്റ്റിലൂടെയാണ് ഈ വിവരം പങ്കുവെച്ചത്. അതിന്റെ പൂർണരൂപം ഇങ്ങനെ: "ഇനി വിവാഹ രജിസ്ട്രേഷനായി വരനും വധുവും ഒരിടത്ത് ഉണ്ടാകണമെന്നോ ഒരേ സമയം ഓൺലൈനിൽ ഹാജരാകണമെന്നോ ആവശ്യമില്ല. വിഡിയോ കെവൈസി വഴി ഓൺലൈനായി വിവാഹം രജിസ്റ്റർ ചെയ്യാൻ കെ-സ്മാർട്ടിൽ സംവിധാനമുണ്ട്. ലോകത്തിന്റെ ഏത് ഭാഗത്ത് നിന്നും ഇത് സാധ്യമാണ്. രാജ്യത്ത് ആദ്യമായി ഈ സൗകര്യം ഒരുക്കിയത് കേരളമാണ്. 2024 ജനുവരി മുതൽ മാർച്ച് 31 വരെ നഗരങ്ങളിൽ നടന്ന 63,001 വിവാഹ രജിസ്ട്രേഷനുകളിൽ 21,344 എണ്ണം ഓൺലൈനായാണ് നടന്നത്. നഗരസഭാ ഓഫീസുകൾ കയറിയിറങ്ങേണ്ട ആവശ്യമില്ല. പ്രവാസികൾക്ക് മാത്രമല്ല, നാട്ടിൽ താമസിക്കുന്നവർക്കും ഈ സേവനം ഏറെ പ്രയോജനകരമാണ്. ഏപ്രിൽ 10 മുതൽ ഈ സൗകര്യം ഗ്രാമപഞ്ചായത്തുകളിലേക്കും വ്യാപിപ്പിക്കും. കെ-സ്മാർട്ടിലൂടെ കേരളം ഇരട്ടി സ്മാർട്ടാകുകയാണ്."

Couples can now register their marriage through a video call, no matter how far apart they are. There's no need to visit the office in person, making the process more convenient and accessible from anywhere in the world.