അഹമ്മദാബാദ്: തെരഞ്ഞെടുപ്പുകളില്‍ ഇലക്ട്രോണിക് വോട്ടിങ് മെഷിന്‍ ഒഴിവാക്കി ബാലറ്റ് പേപ്പറുകളിലേക്ക് മടങ്ങണമെന്ന് കോണ്‍ഗ്രസ്. തെരഞ്ഞെടുപ്പില്‍ അട്ടിമറി നടക്കുന്നുവെന്നും  കോണ്‍ഗ്രസ് അധ്യക്ഷന്‍ മല്ലികാര്‍ജുന്‍ ഖാര്‍ഗെ പറഞ്ഞു. ബി.ജെ.പി വിജയം നേടുന്നത് തെറ്റായ വഴികളിലൂടെയാണെന്നും അദ്ദേഹം ആരോപിച്ചു. 

ഇന്നോളം കാണാത്ത തട്ടിപ്പ്് നടത്തിയാണ് മഹാരാഷ്ട്രയില്‍ ബി.ജെ.പി അധികാരത്തിലേറിയതെന്നും അദ്ദേഹം തുറന്നടിച്ചു. തെരഞ്ഞെടുപ്പ് കമ്മീഷനെതിരെയും ഖാര്‍ഗെ രൂക്ഷ വിമര്‍ശനം ഉന്നയിച്ചു. മഹാരാഷ്ട്രയിലെ വോട്ടര്‍ പട്ടികയില്‍ ക്രമക്കേട് ആരോപിച്ചായിരുന്നു വിമര്‍ശനം.  പ്രതിപക്ഷത്തെ പരാജയപ്പെടുത്താന്‍ തെരഞ്ഞെടുപ്പ് കമ്മീഷനുമായി ഒത്തുകളിച്ചു.  കള്ളത്തരങ്ങള്‍ ഒരുദിവസം പൊളിയുമെന്നും ഖാര്‍ഗെ കൂട്ടിച്ചേര്‍ത്തു. 

'മഹാരാഷ്ട്രയില്‍ എന്താണ് സംഭവിച്ചത്. ഞങ്ങള്‍ ഈ വിഷയം എല്ലായിടത്തും ഉന്നയിച്ചു, രാഹുല്‍ ഗാന്ധി ഈ വിഷയം ശക്തമായി ഉന്നയിച്ചു. മഹാരാഷ്ട്ര തെരഞ്ഞെടുപ്പില്‍ അവര്‍ വോട്ടര്‍ പട്ടിക തയ്യാറാക്കിയത് പോലും ഒരു തട്ടിപ്പായിരുന്നു. ഹരിയാനയിലും ഇതുതന്നെയാണ് സംഭവിച്ചത്'- അദ്ദേഹം പറഞ്ഞു. 
എ.ഐ.സി.സി സെഷനിലായിരുന്നു ഖാര്‍ഗെയുടെ പ്രതികരണം. 

ലോകം മുഴുവന്‍ ഇ.വി.എമ്മുകളില്‍ നിന്ന് ബാലറ്റ് പേപ്പറിലേക്ക് മാറുകയാണ്, പക്ഷേ നമ്മള്‍ ഇ.വി.എമ്മുകള്‍ ഉപയോഗിക്കുന്നു. ഇതെല്ലാം തട്ടിപ്പാണ്. അത് തെളിയിക്കാന്‍ അവര്‍ നമ്മളോട് ആവശ്യപ്പെടുന്നു. ഭരണകക്ഷിക്ക് ഗുണം ചെയ്യുന്ന എന്നാല്‍ പ്രതിപക്ഷത്തെ പ്രതികൂലമായി ബാധിക്കുന്നതുമായ ഇത്തരം നിരവധി സാങ്കേതിക വിദ്യകള്‍ നിങ്ങള്‍ വികസിപ്പിച്ചെടുത്തിട്ടുണ്ട്- ഖാര്‍ഗെ പറഞ്ഞു.

എന്നാല്‍ ഈ രാജ്യത്തെ യുവാക്കള്‍ എഴുന്നേറ്റു നിന്ന് നമുക്ക് ബാലറ്റ് പേപ്പര്‍ വേണമെന്ന് പറയുമെന്നും അദ്ദേഹം ആവര്‍ത്തിച്ചു. 

Congress President Mallikarjun Kharge has called for the abandonment of Electronic Voting Machines (EVMs) and a return to ballot papers, citing concerns over alleged election tampering.