ഫ്ലോറിഡ: കോൺകാഫ് ചാമ്പ്യൻസ് കപ്പിന്റെ സെമിഫൈനലിലേക്ക് മുന്നേറി ഇന്റർ മയാമി. ക്വാർട്ടർ ഫൈനലിലെ രണ്ടാം പാദം മത്സരത്തിൽ ലോസ് എയ്ഞ്ചൽസ് എഫ്സിയെ ഒന്നിനെതിരെ മൂന്നു ഗോളുകൾക്ക് തകർത്താണ് ഇന്റർ മയാമി സെമിഫൈനൽ യോഗ്യത ഉറപ്പാക്കിയത്. ഈ വിജയത്തോടെ ഇരു പാദങ്ങളിലുമായി 3-2 എന്ന അഗ്രഗേറ്റ് സ്കോറിലാണ് ഇന്റർ മയാമി സെമിയിലേക്ക് മുന്നേറിയത്. 

അമേരിക്കൻ ക്ലബ്ബിനു വേണ്ടി ലയണൽ മെസി ഇരട്ട ഗോൾ നേടി മിന്നും പ്രകടനമാണ് നടത്തിയത്. മത്സരം തുടങ്ങി ഒമ്പതാം മിനിറ്റിൽ തന്നെ ആരോൺ ലോങ്ങിലൂടെ ലോസ്‌ എയ്ഞ്ചൽസാണ് ആദ്യം ലീഡ് നേടിയത്. എന്നാൽ 35ാം മിനിറ്റിൽ മെസിയിലൂടെ ഇന്റർ മയാമി സമനില ഗോൾ നേടുകയായിരുന്നു. ഒടുവിൽ ആദ്യപകുതി ഇരു ടീമുകളും ഓരോ ഗോൾ വീതം നേടി കൊണ്ട് തുല്യത പാലിക്കുകയായിരുന്നു.

രണ്ടാം പകുതിയിൽ 61ാം മിനിറ്റിൽ ഫെഡറികോ റെഡോണ്ടയിലൂടെ മയാമി രണ്ടാം ഗോൾ നേടി. 84 മിനിറ്റിൽ ലഭിച്ച പെനാൽറ്റി കൃത്യമായി ലക്ഷ്യത്തിലെത്തിച്ചുകൊണ്ട് മെസി മയാമിക്കായി മൂന്നാം ഗോളും നേടിയതോടെ ടീം മത്സരം പൂർണമായും സ്വന്തമാക്കുകയായിരുന്നു. 

പരുക്കിൽ നിന്നും മുക്തി നേടി കളിക്കളത്തിലേക്ക് തിരിച്ചെത്തിയ മെസി ഓരോ മത്സരങ്ങളിലും സ്ഥിരതയാർന്ന പ്രകടനങ്ങൾ ആണ് പുറത്തെടുത്തുകൊണ്ടിരിക്കുന്നത്. ഈ സീസണിൽ അറ്റ്ലാൻഡ യുണൈറ്റഡിനെതിരെയുള്ള മത്സരത്തിൽ മെസിക്ക് പരുക്ക് സംഭവിച്ചിരുന്നു. ഇതിന് പിന്നാലെ അർജന്റീനക്കൊപ്പം മാർച്ച് മാസത്തിൽ നടന്ന ലോകകപ്പ് യോഗ്യതാ മത്സരങ്ങളിൽ കളിക്കാനും മെസിക്ക് സാധിച്ചിരുന്നില്ല. അമേരിക്കൻ ക്ലബ്ബിനുവേണ്ടി അവസാന ഒമ്പത് മത്സരങ്ങളിൽ നിന്നും എട്ട് ഗോളുകളും മൂന്ന് അസിസ്റ്റുകളും ആണ് മെസി സ്വന്തമാക്കിയിട്ടുള്ളത്. 

നിലവിൽ മേജർ ലീഗ് സോക്കറിൽ രണ്ടാം സ്ഥാനത്താണ് ഇന്റർ മയാമി. ആറു മത്സരങ്ങളിൽ നിന്നും നാല് വിജയവും രണ്ട് സമനിലയും അടക്കം 14 പോയിന്റ് ആണ് മെസിയുടെയും സംഘത്തിന്റെയും കൈവശമുള്ളത്. 15 പോയിന്റുമായി കൊളംബസ് ആണ് ഒന്നാം സ്ഥാനത്തുള്ളത്. എംഎസ്എസിൽ ഏപ്രിൽ 14ന് ചിക്കാഗോക്കെതിരെയാണ് ഇന്റർ മയാമിയുടെ അടുത്ത മത്സരം.

Lionel Messi Great Performance for Inter Miami in CONCACAF Champions Cup