കോട്ടയം: ഏറ്റുമാനൂർ പുന്നത്തുറയിൽ യുവാവും പെൺസുഹൃത്തും ചേർന്ന് ഭാര്യയെ ക്രൂരമായി മർദ്ദിച്ച ശേഷം കിണറ്റിൽ തള്ളിയിട്ടതായി ഞെട്ടിപ്പിക്കുന്ന സംഭവം. പിന്നാലെ കിണറ്റിൽ ചാടിയ ഭർത്താവ്, ഭാര്യയെ അവിടെവച്ചും മർദ്ദിച്ചതായി പരാതി. 

സംഭവത്തെ തുടർന്ന് ഏറ്റുമാനൂർ പൊലിസും അഗ്നിരക്ഷാസേനയും സ്ഥലത്തെത്തി ഭാര്യയെയും ഭർത്താവിനെയും കിണറ്റിൽനിന്ന് രക്ഷപ്പെടുത്തി. കിണറ്റിൽ വീണതിനെ തുടർന്ന് കൈക്കും കാലിനും ഗുരുതരമായി പരിക്കേറ്റ യുവതിയെ കോട്ടയം മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. ഭർത്താവിനും ചെറിയ പരിക്കുകളുണ്ട്. 35 വയസ്സുള്ള യുവതിയാണ് 37 വയസ്സുള്ള ഭർത്താവിനെതിരെ ഏറ്റുമാനൂർ പൊലീസിൽ പരാതി നൽകിയത്.

പുന്നത്തുറയിൽ വാടകവീട്ടിൽ താമസിക്കുന്ന ദമ്പതികൾക്കിടയിൽ വർഷങ്ങളായി കുടുംബപ്രശ്നങ്ങളും വഴക്കുകളും നിലനിന്നിരുന്നതായി പൊലിസ് വെളിപ്പെടുത്തി. മദ്യപിച്ചെത്തി ഭർത്താവ് തന്നെ നിരന്തരം മർദ്ദിക്കാറുണ്ടെന്ന് യുവതി നേരത്തെ ഏറ്റുമാനൂർ പൊലിസിനും വനിതാ സെല്ലിനും പരാതി നൽകിയിരുന്നു. രണ്ട് വർഷം മുമ്പ് ഭർത്താവ് തന്നെയും മക്കളെയും ഉപേക്ഷിച്ചുപോയിരുന്നതായും പിന്നീട് വാർഡ് കൗൺസിലറുടെ ഇടപെടലോടെ തനിക്കും മക്കൾക്കും വാടകവീട് ലഭിച്ചതായും യുവതി പറഞ്ഞു.

പിന്നീട് പ്രശ്നങ്ങൾ പരിഹരിച്ച് ഭർത്താവ് വീണ്ടും കുടുംബത്തോടൊപ്പം താമസം തുടങ്ങിയെങ്കിലും വഴക്കുകൾ തുടർന്നു. ഇതിനിടെയാണ് ഭർത്താവ് പെൺസുഹൃത്തിനൊപ്പം എത്തി ഭാര്യയെ മർദ്ദിച്ച് കിണറ്റിൽ തള്ളിയതെന്ന് യുവതി ആരോപിക്കുന്നു. യുവതിയുടെ മൊഴി രേഖപ്പെടുത്തി തുടർനടപടികൾ സ്വീകരിക്കുമെന്ന് ഏറ്റുമാനൂർ പൊലിസ് അറിയിച്ചു.

A woman was beaten by her husband and his girlfriend. They threw her into a well and attacked her again after rescuing her.