കൊച്ചി: ഹൈക്കോടതി അഭിഭാഷകനും മുൻ ഗവൺമെന്റ് പ്ലീഡറുമായ പി.ജി. മനുവിന്റെ ആത്മഹത്യയുമായി ബന്ധപ്പെട്ട് ലൈംഗിക പീഡന ആരോപണം ഉന്നയിച്ച യുവതിയുടെ ഭർത്താവിനെ പൊലിസ് കസ്റ്റഡിയിലെടുത്തു. എറണാകുളം പിറവത്ത് ഒളിവിൽ കഴിഞ്ഞിരുന്ന പ്രതിയെ കൊല്ലം വെസ്റ്റ് പൊലിസാണ് അറസ്റ്റ് ചെയ്തത്. മനുവിന്റെ ആത്മഹത്യയ്ക്ക് പിന്നിൽ ഇയാളുടെ നിരന്തര പ്രേരണയാണെന്ന സംശയത്തിന്റെ അടിസ്ഥാനത്തിലാണ് നടപടി.

2023-ൽ നിയമസഹായം തേടിയെത്തിയ യുവതിയെ പീഡിപ്പിച്ചെന്ന കേസിൽ മനു പ്രതിയായിരുന്നു. കർശന വ്യവസ്ഥകളോടെ ജാമ്യത്തിൽ ഇറങ്ങിയിരിക്കവെ, മറ്റൊരു യുവതി മനുവിനെതിരെ സമാനമായ ലൈംഗിക പീഡന ആരോപണം ഉന്നയിച്ചു. തുടർന്ന്, മനു യുവതിയുടെ കുടുംബത്തോട് മാപ്പ് പറയുന്നതായി കാണിക്കുന്ന ഒരു വീഡിയോ സമൂഹമാധ്യമങ്ങളിൽ വ്യാപകമായി പ്രചരിച്ചു. ഈ വീഡിയോ പകർത്തിയത് യുവതിയുടെ ഭർത്താവാണെന്ന് പൊലിസ് കണ്ടെത്തി. വീഡിയോയുടെ പ്രചാരണവും തുടർന്നുള്ള മാനസിക സമ്മർദ്ദവുമാണ് മനുവിനെ ആത്മഹത്യയിലേക്ക് നയിച്ചതെന്നാണ് പൊലിസിന്റെ പ്രാഥമിക നിഗമനം.

കൊല്ലം വെസ്റ്റ് പൊലിസ് വീഡിയോ വിശദമായി പരിശോധിച്ചതിന് ശേഷമാണ് പ്രതിയെ കസ്റ്റഡിയിലെടുത്തത്. മനു കടുത്ത മാനസിക സമ്മർദ്ദം അനുഭവിച്ചിരുന്നതായി അദ്ദേഹത്തിന്റെ സഹപ്രവർത്തകനായ അഭിഭാഷകൻ ബി.എ. ആളൂർ മാധ്യമങ്ങളോട് വെളിപ്പെടുത്തി. ബലാത്സംഗ കേസുമായി ബന്ധപ്പെട്ട് യുവതിയുടെ വീട്ടിൽ വച്ച് മനു ക്ഷമാപണം നടത്തുന്ന ദൃശ്യങ്ങൾ പുറത്തുവന്നത് മനുവിനെ മാനസികമായി തകർത്തു. ഇത് വീണ്ടും ജയിൽ ശിക്ഷയിലേക്ക് നയിക്കുമെന്ന് മനു ഭയപ്പെട്ടിരുന്നതായും ആളൂർ പറഞ്ഞു.

വീഡിയോ പകർത്തി പ്രചരിപ്പിച്ചവർക്കെതിരെ കർശന നിയമനടപടി സ്വീകരിക്കുമെന്നും മനുവിന്റെ കുടുംബത്തിന് എല്ലാ പിന്തുണയും നൽകുമെന്നും ബി.എ. ആളൂർ വ്യക്തമാക്കി. കേസുമായി ബന്ധപ്പെട്ട് പൊലിസ് അന്വേഷണം ഊർജിതമാക്കിയിട്ടുണ്ട്.

സര്‍ക്കാര്‍ അഭിഭാഷകനായിരിക്കെ നിയമസഹായം തേടിയെത്തിയ യുവതിയെ വശീകരിച്ച് ലൈംഗികമായി പീഡിപ്പിക്കുകയും അശ്ലീല ദൃശ്യങ്ങള്‍ മൊബൈല്‍ ഫോണില്‍ പകര്‍ത്തുകയും ചെയ്തുവെന്നാണ് മനുവിനെതിരായ പരാതി. 2018ല്‍ നടന്ന പീഡന കേസില്‍ ഇരയായ യുവതി പൊലീസ് ഉദ്യോഗസ്ഥന്‍ പറഞ്ഞതിന്റെ അടിസ്ഥാനത്തിലാണ് നിയമോപദേശത്തിനായി മനുവിനെ സമീപിച്ചത്. കേസില്‍ മനുവിന്റെ മുന്‍കൂര്‍ ജാമ്യം ഹൈക്കോടതി തള്ളിയിരുന്നു. 10 ദിവസത്തിനകം ചോറ്റാനിക്കര പൊലീസിന് മുന്നില്‍ കീഴടങ്ങാനും കോടതി നിര്‍ദേശിച്ചു. കോടതി അനുവദിച്ച സമയപരിധി അവസാനിച്ചിട്ടും മനു കീഴടങ്ങിയിരുന്നില്ല. ഇതോടെ പൊലിസ് തിരച്ചില്‍ നോട്ടീസ് പുറത്തിറക്കിയതിന് പിന്നാലെ അദ്ദേഹം കീഴടങ്ങി ജാമ്യത്തിലിറങ്ങി. ഇതിനിടെ കേസുമായി ബന്ധപ്പെട്ട വിഡിയോ ദൃശ്യങ്ങള്‍ സമൂഹമാധ്യമങ്ങള്‍ പ്രചരിക്കുകയും ചെയ്തു. ഇതിന് പിന്നാലെയയാണ് മവുവിനെ മരിച്ച നിലയില്‍ കണ്ടെത്തുന്നത്.

High Court advocate P.G. Manu died by suicide following a sexual harassment allegation. The husband of the woman who made the accusation has been taken into police custody as part of the investigation.