വാഷിങ്ടണ്‍: യു.എസ് പ്രസിഡന്റ് ഡൊണാള്‍ഡ് ട്രംപിന്റെ നയംമാറ്റത്തില്‍ രൂക്ഷ പ്രതികരണവുമായി ഫെഡറല്‍ റിസര്‍വ് ചെയര്‍മാന്‍ ജെറോം പവല്‍. ട്രംപിന്റെ താരിഫ് ഉള്‍പ്പെടെയുള്ള സുപ്രധാന നയ മാറ്റങ്ങള്‍ ആധുനിക ചരിത്രത്തില്‍ കണ്ടതില്‍ നിന്ന് വ്യത്യസ്തമാണെ്.  ഇത് ഫെഡറല്‍ റിസര്‍വിനെ വെള്ളത്തിലാക്കും- ജെറോം പവല്‍ ചൂണ്ടിക്കാട്ടി. അടിസ്ഥാനപരമായ നയംമാറ്റമാണ് ഉണ്ടായിരിക്കുന്നത്. ഇതേ കുറിച്ച് എങ്ങനെ ചിന്തിക്കണമെന്നതിന് പോലും ആധുനിക ചരിത്രത്തില്‍ മുന്‍ അനുഭവമില്ലെന്നും അദ്ദേഹം കൂട്ടിച്ചേര്‍ത്തു. ഇക്കണോമിക് ക്ലബ് ഓഫ് ചിക്കാഗോ സംഘടിപ്പിച്ച പരിപാടിയിലായിരുന്നു അദ്ദേഹത്തിന്റെ പ്രതികരണം. 

പ്രതീക്ഷിച്ചതിലും വലിയ തീരുവ വര്‍ധനയാണ് ഉണ്ടായതെന്ന് ചൂണ്ടിക്കാട്ടിയ അദ്ദേഹം തീരുവ സംബന്ധിച്ച് അനിശ്ചിതത്വം നിലനില്‍ക്കുന്നത് നീണ്ടുനില്‍ക്കുന്ന സാമ്പത്തിക തകര്‍ച്ചക്ക് കാരണമാകുമെന്നും വ്യക്തമാക്കി. ട്രംപിന്റെ നയങ്ങള്‍ സാമ്പത്തിക നയങ്ങള്‍ സമ്പദ്‌വ്യവസ്ഥയെ മോശം വളര്‍ച്ചയിലേക്ക് നയിക്കുമെന്നും അദ്ദേഹം മുന്നറിയിപ്പ് നല്‍കി. 

'ട്രംപിന്റെ നയങ്ങള്‍ ഉയര്‍ന്ന തൊഴിലില്ലായ്മക്കും പണപ്പെരുപ്പത്തിനും കാരണമാകും. മാത്രമല്ല ഇത് സമ്പദ്‌വ്യവസ്ഥയെ മോശം വളര്‍ച്ചയിലേക്ക് നയിക്കും' അദ്ദേഹം പറഞ്ഞു. കഴിഞ്ഞ അരനൂറ്റാണ്ടിനിടെ ഫെഡറല്‍ റിസര്‍വ് നേരിടാത്ത സാഹചര്യമാണ് ഇതെന്നും അദ്ദേഹം ചൂണ്ടിക്കാട്ടി. ട്രംപിന്റെ നയങ്ങളോട് യുഎസ് സമ്പദ്വ്യവസ്ഥ എങ്ങനെ പ്രതികരിക്കുന്നുവെന്ന് ഡാറ്റ വ്യക്തമായി കാണിക്കുന്നതുവരെ ഫെഡിന്റെ ഇപ്പോഴത്തെ ഏറ്റവും നല്ല നീക്കം അതേപടി തുടരുക എന്നതാണ് എന്ന് പവല്‍ പറഞ്ഞു.