കോട്ടയം: കോട്ടയം കടുത്തുരുത്തിയിൽ അധ്യാപകനെതിരെയുള്ള പീഡന പരാതി വ്യാജമെന്ന് യുവതി. നീണ്ട ഏഴ് വർഷങ്ങൾക്ക് ശേഷമാണ് യുവതിയുടെ ഈ വെളിപ്പെടുത്തൽ. സംഭവത്തിൽ ആയാംകുടി മധുരവേലി സ്വദേശിയായ സിഡി ജോമോനാണ് സംഭവത്തിൽ നിരപരാധിയാണെന്ന് തെളിഞ്ഞത്. കുറുപ്പന്തറയിൽ പാരാമെഡിക്കൽ സ്ഥാപനം നടത്തിയിരുന്ന ആളായിരുന്നു സിഡി ജോമോൻ. പരാതിക്കാരിയായ യുവതി കോടതിയിൽ എത്തി കേസ് പിൻവലിക്കുകയായിരുന്നു.  

2017ലായിരുന്നു ജോമോനെതിരെ യുവതി പരാതി നൽകിയത്.  പാരാമെഡിക്കൽ സ്ഥാപനത്തിൽ പഠിച്ചിരുന്ന യുവതിയെ പരിശീലനത്തിന് കൊണ്ടുപോകുന്ന വഴി പീഡിപ്പച്ചെന്നായിരുന്നു പരാതി. ഇതിനു പിന്നാലെ ജോമോൻ അറസ്റ്റിലാവുകയും സ്ഥാപനം പൂട്ടുകയും ആയിരുന്നു. 

ജോമോന്റെ ദുരിത പൂർണമായ ജീവിതത്തെക്കുറിച്ച് അടുത്തിടെ അറിഞ്ഞ പരാതിക്കാരി ജോമോന്റെ വീടിന്റെ അടുത്തുള്ള ദേവാലയത്തിൽ എത്തുകയായിരുന്നു. ഇവിടെ വെച്ചാണ് യുവതി ജോമോൻ നിരപരാധിയാണെന്നും ചില ആളുകളുടെ പ്രേരണയിൽ ആണ് പരാതി നൽകിയതെന്നും സമ്മതിക്കുകയായിരുന്നു. യുവതി പരസ്യമായി ജോമോനോട് ക്ഷമ ചോദിക്കുകയും ചെയ്തു. സംഭവത്തിൽ തന്റെ നിരപരാധിത്വം തെളിഞ്ഞതിൽ സന്തോഷമുണ്ടെന്നും ജോമോൻ വ്യക്തമാക്കി.

Woman reveals that harassment complaint against teacher was fake after seven years