കോഴിക്കോട്: നഗരത്തിൽ വിൽപനയ്ക്കായി കഞ്ചാവുമായി എത്തിയ സ്ത്രീയെ പൊലിസ് പിടികൂടി. വെസ്റ്റ്ഹിൽ കോനാട് ബീച്ച് ചേക്രയിൽ വളപ്പിൽ ഹൗസിൽ താമസിക്കുന്ന സി.പി. കമറുനീസ (53) ആണ് ഡാൻസാഫ് ടീമിന്റെയും ടൗൺ പൊലിസിന്റെയും സംയുക്ത ഓപ്പറേഷനിൽ അറസ്റ്റിലായത്. എസ്.ഐ. ബി. സുലൈമാന്റെ നേതൃത്വത്തിൽ നടത്തിയ പരിശോധനയിൽ, മംഗലാപുരത്ത് നിന്ന് ട്രെയിനിൽ കോഴിക്കോട്ടേക്ക് കൊണ്ടുവന്ന 4.33 കിലോ കഞ്ചാവാണ് റെയിൽവേ സ്റ്റേഷൻ റോഡിൽ നിന്ന് കണ്ടെടുത്തത്.

കമറുനീസയ്ക്ക് ലഹരിമരുന്ന് കടത്തുമായി ബന്ധപ്പെട്ട് നേരത്തെ നിരവധി കേസുകളുണ്ട്. മുൻപ് ബ്രൗൺ ഷുഗറും കഞ്ചാവുമായി പിടിയിലായതിന് കുന്ദമംഗലം പൊലിസ് സ്റ്റേഷനിൽ കേസ് രജിസ്റ്റർ ചെയ്തിരുന്നു, അതിൽ അഞ്ച് വർഷം ജയിൽ ശിക്ഷയും അനുഭവിച്ചിരുന്നു. കൂടാതെ കോഴിക്കോട് എക്സൈസ് വകുപ്പിൽ മൂന്ന് കഞ്ചാവ് കേസുകളും ഇവർക്കെതിരെയുണ്ട്. കഴിഞ്ഞ വർഷം 4 കിലോ കഞ്ചാവുമായി കോയമ്പത്തൂർ പൊലിസ് പിടികൂടിയ കേസിൽ ഇവർ നിലവിൽ ജാമ്യത്തിലാണ്.

ജാമ്യത്തിൽ ഇറങ്ങിയ ശേഷം ഡാൻസാഫ് ടീമിന്റെ നിരീക്ഷണത്തിലായിരുന്ന കമറുനീസ, ജില്ലയുടെ വിവിധ ഭാഗങ്ങളിൽ വാടക വീടുകൾ എടുത്ത് ലഹരി വിൽപന നടത്തിവരികയായിരുന്നു. അന്വേഷണ സംഘത്തിൽ ഡാൻസാഫ് അംഗങ്ങളായ എസ്.ഐ. മനോജ് എടയേടത്ത്, എ.എസ്.ഐ. അനീഷ് മുസ്സേൻവീട്, കെ. അഖിലേഷ്, സുനോജ് കാരയിൽ, പി.കെ. സരുൺ കുമാർ, എം.കെ. ലതീഷ്, എം. ഷിനോജ്, പി. അഭിജിത്ത്, ഇ.വി. അതുൽ, ടി.കെ. തൗഫീക്ക്, പി.കെ. ദിനീഷ്, കെ.എം. മുഹമ്മദ് മഷ്ഹൂർ, ടൗൺ സ്റ്റേഷനിലെ എസ്.ഐ.മാരായ ഷബീർ, മനോജ്, എസ്.സി.പി.ഒ. ശ്രീജേഷ്, സിജിൽ, സുബിനി, രാജ്കുമാർ, വനിതാ സ്റ്റേഷനിലെ സ്മിത ബെഹൻ, ലജിഷ എന്നിവർ ഉൾപ്പെട്ടിരുന്നു.