തിരുവനന്തപുരം: തിരുവനന്തപുരം രാജ്യാന്തര വിമാനത്താവളത്തിലെ ഐബി ഉദ്യോഗസ്ഥയുടെ ആത്മഹത്യയില്‍ പ്രതി സുകാന്തിനെ ജോലിയില്‍ നിന്ന് പിരിചച്ച് വിട്ടു. ഐബി ഉദ്യോഗസ്ഥനായിരുന്ന പ്രതിയെ വകുപ്പുതല അന്വേഷണം നടത്തിയാണ് ജോലിയില്‍ നിന്ന് നീക്കിയത്. കേസില്‍ പ്രതിയായ കാര്യം പൊലീസ് ഇന്റലിജന്‍സ് ബ്യൂറോയെ അറിയിച്ചിരുന്നു. കേസിന്റെ വിശദാംശങ്ങളടക്കം പരിശോധിച്ച ശേഷമാണ് രഹസ്യാന്വേഷണ ബ്യൂറോയുടെ തീരുമാനം. 

മരിച്ച യുവതിയുടെ സഹപ്രവര്‍ത്തകനും, സുഹൃത്തുമായിരുന്നു പ്രതി. മാര്‍ച്ച് 24നാണ് ഐബി ഉദ്യോഗസ്ഥയെ റെയില്‍വേ പാളത്തില്‍ മരിച്ച നിലയില്‍ കണ്ടെത്തിയത്. സാമ്പത്തികമായും ശാരീരികമായും ചൂഷണം ചെയ്ത ശേഷം വിവാഹ ബന്ധത്തില്‍ നിന്ന് സുകാന്ത് പിന്‍മാറിയതോടെ യുവതി മാനസിക സംഘര്‍ഷത്തിലായിരുന്നെന്നും ഇതാണ് ആത്മഹത്യക്ക് കാരണമെന്നുമാണ് കുടുംബം മൊഴി നല്‍കിയത്. യുവതി ഗര്‍ഭഛിദ്രം നടത്തിയതിന്റെ തെളിവുകളും പ്രതിയുമായി നടത്തിയ വാട്‌സ്ആപ്പ് ചാറ്റ് വിവരങ്ങളും പൊലിസ് കണ്ടെത്തിയിരുന്നു. 

സംഭവം പുറത്ത് വന്നതിന് പിന്നാലെ സുകാന്തും കുടുംബവും ഒളിവില്‍ പോയിരുന്നു. ഇയാളെ ഇതുവരെ കണ്ടെത്താന്‍ പൊലിസിനായിട്ടില്ല.  

 IB officer died by suicide at Thiruvananthapuram International Airport, following which the accused, Sukant, has been dismissed from his position.