റിയാദ്: വിവിധ മേഖലകളില്‍ ഇന്ത്യയും സഊദിയും തമ്മിലുള്ള സഹകരണം ശക്തിപ്പെടുത്തുന്നതിന്റെ ഭാഗമായി സഊദി സന്ദര്‍ശിക്കാന്‍ പ്രധാനമന്ത്രി നരേന്ദ്ര മോദി.

ചൊവ്വ, ബുധന്‍ ദിവസങ്ങളിലായി സഊദി അറേബ്യ സന്ദര്‍ശിക്കുന്ന പ്രധാനമന്ത്രി നരേന്ദ്ര മോദി ജിദ്ദയിലെ ഒരു ഫാക്ടറി സന്ദര്‍ശിക്കുകയും അവിടത്തെ ഇന്ത്യന്‍ തൊഴിലാളികളുമായി സംവദിക്കുകയും ചെയ്യുമെന്ന് വിദേശകാര്യ സെക്രട്ടറി വിക്രം മിസ്രി പറഞ്ഞു. ഏപ്രില്‍ 22,23 തീയതികളിലെ മോദിയുടെ സന്ദര്‍ശനത്തിന് മുന്നോടിയായി നടത്തിയ മാധ്യമസമ്മേളനത്തിലാണ് വിദേശകാര്യ സെക്രട്ടറിയുടെ പ്രതികരണം.

'ലോകത്തിലെ രണ്ടാമത്തെ വലിയ ഇന്ത്യന്‍ പ്രവാസി സമൂഹമുള്ളത് സഊദി അറേബ്യയിലാണ്. ഏകദേശം 2.7 ദശലക്ഷം ഇന്ത്യക്കാരാണ് സഊദി അറേബ്യയില്‍ താമസിക്കുകയും ജോലി ചെയ്യുകയും ചെയ്യുന്നത്. രാജ്യത്തിന്റെ സാമ്പത്തിക വികസനത്തിന് നല്‍കുന്ന ഗണ്യമായ സംഭാവനകള്‍ക്ക് സഊദി അറേബ്യയിലെ ഇന്ത്യന്‍ സമൂഹം വളരെയധികം ബഹുമാനിക്കപ്പെടുന്നു എന്നത് വളരെയധികം സംതൃപ്തി നല്‍കുന്ന കാര്യമാണ്,' മിസ്രി പറഞ്ഞു.

കഴിഞ്ഞ ഡിസംബറില്‍ കുവൈത്ത് സന്ദര്‍ശത്തിനിടെ മോദി മിന അബ്ദുള്ള പ്രദേശത്തെ ഒരു ലേബര്‍ ക്യാമ്പ് സന്ദര്‍ശിച്ചിരുന്നു. കുവൈത്ത് സന്ദര്‍ശനത്തിലെ ആദ്യ പരിപാടിയായിരുന്നു ഇത്. ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള ഇന്ത്യന്‍ തൊഴിലാളികളുമായി പ്രധാനമന്ത്രി സംവദിക്കുകയും അവരുടെ ക്ഷേമം അന്വേഷിക്കുകയും ചെയ്തു. അവിസ്മരണീയമായ ഒരു ആശയവിനിമയമായിരുന്നു അത്.

ജനുവരിയില്‍, 18ാമത് പ്രവാസി ഭാരതീയ ദിവസ് കണ്‍വെന്‍ഷന്‍ ഉദ്ഘാടനം ചെയ്യവേ, ഇന്ത്യന്‍ പ്രവാസികളെ ഇന്ത്യയുടെ അംബാസഡര്‍മാരായി താന്‍ എപ്പോഴും കണക്കാക്കുന്നുവെന്ന് പ്രധാനമന്ത്രി മോദി പറഞ്ഞിരുന്നു.

ലോകമെമ്പാടുമുള്ള ഇന്ത്യക്കാരെ കാണാനും അവരുമായി സംസാരിക്കാനും കഴിയുന്നതിലുള്ള സന്തോഷം പ്രകടിപ്പിച്ചുകൊണ്ട്, അവരില്‍ നിന്ന് തനിക്ക് ലഭിക്കുന്ന സ്‌നേഹവും അനുഗ്രഹങ്ങളും മറക്കാനാവാത്തതാണെന്നും അത് എപ്പോഴും തന്നോടൊപ്പം നിലനില്‍ക്കുമെന്നും അദ്ദേഹം പറഞ്ഞു.

ആഗോളതലത്തില്‍ അഭിമാനത്തോടെ തലയുയര്‍ത്തി നില്‍ക്കാന്‍ അവസരം നല്‍കിയതിന് അദ്ദേഹം ഇന്ത്യന്‍ പ്രവാസി സമൂഹത്തിന് നന്ദി അറിയിക്കുകയും ചെയ്തിരുന്നു.

അതേസമയം, തുടര്‍ച്ചയായ സഹായത്തിന് സഊദിയുടെ നേതൃത്വത്തിന് നന്ദി അറിയിച്ചുകൊണ്ട്, ആയിരക്കണക്കിന് ഇന്ത്യന്‍ പൗരന്മാരുടെ വാര്‍ഷിക ഹജ്ജ്, ഉംറ തീര്‍ത്ഥാടന സന്ദര്‍ശനം സുഗമമാക്കുന്നതില്‍ സഊദി ഒരു പ്രധാന പങ്ക് വഹിക്കുന്നുണ്ടെന്ന് വിദേശകാര്യ സെക്രട്ടറി മിസ്രി പറഞ്ഞു. വാര്‍ഷിക ഹജ്ജ് തീര്‍ത്ഥാടനവും ഉംറയും ഇന്ത്യ-സഊദി ഉഭയകക്ഷി ബന്ധത്തിന്റെ ഒരു പ്രധാന ഘടകമാണ്.

സൗദി അറേബ്യയുടെ സാമ്പത്തിക വികസനത്തില്‍ ഇന്ത്യന്‍ പ്രവാസി സമൂഹം നല്‍കുന്ന സംഭാവന വ്യാപകമായി അംഗീകരിക്കപ്പെട്ടിരിക്കുന്നു. സഊദി അറേബ്യയിലെ ഇന്ത്യക്കാരുടെ എണ്ണം ക്രമാതീതമായി വര്‍ധിച്ചുകൊണ്ടിരിക്കുകയാണ്. കഴിഞ്ഞ ഒരു വര്‍ഷത്തിനിടെ, സഊദിയില്‍ വിവിധ തൊഴിലുകള്‍ക്കായി എത്തിയത് ഒരു ലക്ഷം ഇന്ത്യക്കാരാണെന്നാണ് കണക്കുകള്‍ വ്യക്തമാക്കുന്നത്.

Prime Minister Narendra Modi will visit Saudi Arabia tomorrow to strengthen India-Saudi economic ties. The visit is expected to boost bilateral trade, investment, and strategic cooperation as both nations aim to elevate their partnership to a new level.