2026 ഫിഫ ലോകകപ്പിൽ പോർച്ചുഗലിനായി ക്രിസ്റ്റ്യാനോ റൊണാൾഡോക്ക് കളിക്കാൻ സാധിക്കുമോയെന്ന ചോദ്യത്തിന് മറുപടി നൽകിയിരിക്കുകയാണ് പോർച്ചുഗീസ് ഇതിഹാസം ലൂയിസ് ഫിഗോ. ലോകകപ്പിൽ പോർച്ചുഗലിന്റെ ആദ്യ ഇലവനിൽ കളിക്കാൻ റൊണാൾഡോക്ക് സാധിക്കുമെന്നും അത്ര വയസ് ആയാലും റൊണാൾഡോ എപ്പോഴും ഗോളുകൾ നേടിക്കൊണ്ടിരിക്കുമെന്നുമാണ് ഫിഗോ അഭിപ്രായപ്പെട്ടത്. മാഡ്രിഡിൽ അടുത്തിടെ നടന്ന ഒരു പരുപാടിയിൽ സംസാരിക്കുകയായിരുന്നു ഫിഗോ. 

''ലോകകപ്പിൽ പോർച്ചുഗലിനായി അദ്ദേഹത്തിന് ഒരു സ്റ്റാർട്ടറാകാൻ കഴിയും. ഇതെല്ലം നമ്മൾ കാത്തിരുന്ന് കാണണം. അദ്ദേഹത്തിന്റെ പ്രൊഫഷണലിസം, കഴിവ് എന്നിവയുടെ കാര്യത്തിൽ റൊണാൾഡോ ലോകത്തിന് മുഴുവൻ മാതൃകയാണ്. അവൻ എപ്പോഴും ഗോളുകൾ നേടും അത് 40 വയസായാലും 42 വയസായാലും. അതെല്ലാം നിർണായക ഗോളുകളാണോ എന്നെനിക്ക് അറിയില്ല. നമ്മൾ കാത്തിരുന്ന് കാണണം. അത് എപ്പോഴും നിർണായകമാവുമെന്ന് നമുക്ക് പ്രതീക്ഷിക്കാം'' ലൂയിസ് ഫിഗോ പറഞ്ഞു. 

സഊദി ക്ലബ് അൽ നസറിന് വേണ്ടി ഇതിഹാസതാരം ക്രിസ്റ്റ്യാനോ റൊണാൾഡോ പ്രായത്തെ പോലും വെല്ലുന്ന പോരാട്ടവീര്യമാണ് നടത്തിക്കൊണ്ടിരിക്കുന്നത്. ഓരോ മത്സരങ്ങൾ കഴിയുമ്പോഴും തന്റെ ബൂട്ടുകളിൽ നിന്നും ഗോൾ വേട്ട തുടർന്ന് കൊണ്ടിരിക്കുകയാണ് റൊണാൾഡോ. ഇതിനോടകം തന്നെ 933 ഗോളുകളാണ് സ്വന്തമാക്കിയിട്ടുള്ളത്. ൽ നസറിനായി സഊദി ലീഗിൽ ഈ സീസണിൽ 23 ഗോളുകളാണ് റൊണാൾഡോ അടിച്ചുകൂട്ടിയിരിക്കുന്നത്. നിലവിലെ ലീഗിലെ ഗോൾ വേട്ടക്കാരുടെ പട്ടികയിൽ ഒന്നാമതുള്ളതും റൊണാൾഡോ തന്നെയാണ്.

അൽ നസറിനായി ഇതുവരെ 94 ഗോളുകളാണ് റൊണാൾഡോ നേടിയിട്ടുള്ളത്. മാഞ്ചസ്റ്റർ യുണൈറ്റഡ്(145), റയൽ മാഡ്രിഡ്(450), യുവന്റസ്(101), പോർച്ചുഗൽ(135) എന്നിങ്ങനെയാണ് റൊണാൾഡോ നാല് ടീമുകൾക്ക് വേണ്ടി അടിച്ചുകൂട്ടിയ ഗോളുകളുടെ കണക്കുകൾ.  67 ഗോളുകൾ കൂടി നേടാൻ സാധിച്ചാൽ 1000 ഗോൾ എന്ന നാഴികക്കല്ല് സ്വന്തമാക്കാനും പോർച്ചുഗീസ് ഇതിഹാസത്തിന് സാധിക്കും. 

ലോകകപ്പിൽ പോർച്ചുഗലിനായി 22 മത്സരങ്ങളിൽ നിന്നും എട്ട് ഗോളുകളാണ് റൊണാൾഡോ നേടിയിട്ടുള്ളത്. 2026 ലോകകപ്പിന്റെ ഭാഗമാവാൻ റൊണാൾഡോക്ക് സാധിച്ചാൽ ആറ് ലോകകപ്പുകളിൽ കളിക്കുന്ന താരമായി മാറാനും റൊണാൾഡോക്ക് സാധിക്കും. 2006 ലോകകപ്പിൽ സെമി ഫൈനൽ വരെ മുന്നേറിയതാണ് പോർച്ചുഗലിന്റെ വേൾഡ് കപ്പിലെ ഏറ്റവും മികച്ച പ്രകടനം. തന്റെ കരിയറിൽ ഒരിക്കൽപോലും നേടാനാവാത്ത ലോകകപ്പ് സ്വന്തമാക്കാനുള്ള അവസാന അവസരം കൂടിയാണ് റൊണാൾഡോക്കുള്ളത്. 

Portuguese legend Luis Figo has responded to the question of whether Cristiano Ronaldo could play for Portugal in the 2026 FIFA World Cup