അബൂദബി: എമിറേറ്റിലെ ഭക്ഷ്യസുരക്ഷാ ചട്ടങ്ങള്‍ കാറ്റില്‍പ്പറത്തിയ 12 ഭക്ഷ്യസ്ഥാപനങ്ങള്‍ അടച്ചുപൂട്ടി അബൂദബി അഗ്രികള്‍ച്ചര്‍ ആന്‍ഡ് ഫുഡ് സേഫ്റ്റി അതോറിറ്റി.

പൊതുജനാരോഗ്യത്തിന് ഭീഷണിയാണെന്ന് ചൂണ്ടിക്കാട്ടിയാണ് 2008ലെ ഭക്ഷ്യസുരക്ഷയുമായി ബന്ധപ്പെട്ട നിയമം നമ്പര്‍(2) ലംഘിച്ചതിന് ഈ വര്‍ഷം തുടക്കം മുതല്‍ അബൂദബി അഗ്രികള്‍ച്ചര്‍ ആന്‍ഡ് ഫുഡ് സേഫ്റ്റി അതോറിറ്റി (ADAFSA) എമിറേറ്റിലുടനീളം 12 റെസ്റ്റോറന്റുകളും ഭക്ഷ്യ സ്ഥാപനങ്ങളും അടച്ചുപൂട്ടിയത്. ഭക്ഷ്യ സുരക്ഷാ സംവിധാനം ശക്തിപ്പെടുത്തുന്നതിനുള്ള അതോറിറ്റിയുടെ നിരന്തരമായ ശ്രമങ്ങളുടെ ഭാഗമാണിത്.

ADAFSA പുറത്തിറക്കിയ റിപ്പോര്‍ട്ട് അനുസരിച്ച്, ഈ വര്‍ഷത്തെ ആദ്യ പാദത്തില്‍ അടച്ചുപൂട്ടിയ സ്ഥാപനങ്ങളുടെ എണ്ണം 2024 ല്‍ രേഖപ്പെടുത്തിയതിന്റെ മൂന്നിരട്ടിയാണ്. അന്ന് സമാനമായ നിയമലംഘനങ്ങള്‍ നടത്തിയ നാല് റെസ്റ്റോറന്റുകളും ഭക്ഷണ സ്ഥാപനങ്ങളും മാത്രമേ അടച്ചുപൂട്ടിയിരുന്നുള്ളൂ.

ഈ വര്‍ഷം തുടക്കം മുതല്‍ ഭക്ഷ്യ സുരക്ഷാ ഇന്‍സ്പെക്ടര്‍മാര്‍ മുഖേന എമിറേറ്റിലുടനീളം അതോറിറ്റി പരിശോധനാ കാമ്പെയ്നുകള്‍ ശക്തമാക്കിയിരുന്നു. ഇതിന്റെ ഫലമായാണ് 12 റെസ്റ്റോറന്റുകളും ഭക്ഷ്യ സ്ഥാപനങ്ങളും അടച്ചുപൂട്ടിയത്.

ഹംദാന്‍ സ്ട്രീറ്റിലെ ഒരു റസ്റ്റോറന്റ്, ഖാലിദിയ ഏരിയയിലെ ഒരു സൂപ്പര്‍മാര്‍ക്കറ്റ്, ഹംദാന്‍ സ്ട്രീറ്റിലെ ഒരു ഭക്ഷ്യസ്ഥാപനം, മുസഫ ഇന്‍ഡസ്ട്രിയല്‍ ഏരിയയിലെ ഒരു സൂപ്പര്‍മാര്‍ക്കറ്റ്, അല്‍ അജ്ബാന്‍ ഏരിയയിലെ ഒരു കോഴി ഫാം, അല്‍ ഷഹാമയിലെ ഒരു വാണിജ്യ സ്ഥാപനം, മുസഫ 9 ലെ ഒരു പലചരക്ക് കട, മുഹമ്മദ് ബിന്‍ സായിദ് സിറ്റിയിലെ ഒരു റെസ്റ്റോറന്റ്, ന്യൂ അല്‍ ഷഹാമയിലെ ഒരു റെസ്റ്റോറന്റ്, മുഹമ്മദ് ബിന്‍ സായിദ് ഏരിയയിലെ ഒരു റെസ്റ്റോറന്റ്, അല്‍ ഷഹാമയിലെ ഒരു റെസ്റ്റോറന്റ്, മുഹമ്മദ് ബിന്‍ സായിദ് സിറ്റിയിലെ മറ്റൊരു റെസ്റ്റോറന്റ് എന്നീ സ്ഥാപനങ്ങളാണ് അടച്ചുപൂട്ടിയത്.

എല്ലാ സ്ഥാപനങ്ങളും ഭക്ഷ്യ സുരക്ഷാ മാനദണ്ഡങ്ങള്‍ പാലിക്കുന്നുണ്ടെന്ന് ഉറപ്പാക്കുന്നതിനായി അതോറിറ്റി എല്ലാ വര്‍ഷവും പരിശോധകളും ക്യാമ്പയിനുകളും നടത്തുന്നത് പതിവാണ്.

ഭക്ഷ്യ സുരക്ഷ ഒരു പൊതു ഉത്തരവാദിത്തമാണെന്നും ഒരു മുന്‍ഗണനയാണെന്നും അബൂദബി അഗ്രികള്‍ച്ചര്‍ ആന്‍ഡ് ഫുഡ് സേഫ്റ്റി അതോറിറ്റി സോഷ്യല്‍ മീഡിയയില്‍ പുറത്തിറക്കിയ പ്രസ്താവനയില്‍ പറഞ്ഞിരുന്നു. 

ഭക്ഷ്യവസ്തുക്കള്‍ കൈകാര്യം ചെയ്യുന്നതിലും സൂക്ഷിക്കുന്നതിലും ശുചിത്വക്കുറവ്, പാചക സ്ഥലങ്ങളിലെ ഉപകരണങ്ങളുടെയും റഫ്രിജറേറ്ററുകളുടെയും ശുചിത്വമില്ലായ്മ, ഈ പ്രദേശങ്ങളിലെ സീലിംഗും തറയും വൃത്തിയാക്കുന്നതിലെ അശ്രദ്ധ, പാകം ചെയ്തതും വിളമ്പാന്‍ തയ്യാറായതുമായ ഭക്ഷണം മൂടിവയ്ക്കാതെയും മലിനീകരണ സാധ്യതകളില്‍ നിന്ന് സംരക്ഷിക്കാതെയും സൂക്ഷിക്കല്‍ എന്നിവയാണ് അടച്ചുപൂട്ടലിന് കാരണമായ കാരണങ്ങള്‍. ഇവയെല്ലാം ഭക്ഷ്യ സുരക്ഷയ്ക്കും ഉപഭോക്താക്കളുടെ ആരോഗ്യത്തിനും ഭീഷണിയാണ്.

The Abu Dhabi Agriculture and Food Safety Authority closed 12 restaurants in 2025 for breaching food safety regulations, including poor hygiene, unsafe food storage, and pest issues, to protect public health.