കൊല്‍ക്കത്ത: പാര്‍ട്ടിയിലെ വനിതാ സഹപ്രവര്‍ത്തകയ്ക്ക് വാട്ട്‌സ്ആപ്പില്‍ അശ്ലീല സന്ദേശങ്ങള്‍ അയച്ചുവെന്നാരോപിച്ച് മുതിര്‍ന്ന നേതാവും മുന്‍ എം.പിയുമായ ബന്‍സ ഗോപാല്‍ ചൗധരിയെ പശ്ചിമബംഗാളിലെ സി.പി.എം പാര്‍ട്ടിയില്‍ നിന്ന് പുറത്താക്കി. ബര്‍ധമാന്‍ ജില്ലാ കമ്മിറ്റി അംഗമായിരുന്ന 65 കാരനായ ചൗധരിക്കെതിരേ ആണ് നടപടി സ്വീകരിച്ചത്. അനുചിതവും അപമാനകരവുമായ സന്ദേശങ്ങള്‍ ഉപയോഗിച്ച് 'വെര്‍ച്വല്‍ ലൈംഗിക പീഡനത്തിന്' ഇരയാക്കിയെന്നാണ് പ്രവര്‍ത്തക പരാതി നല്‍കിയത്. പരാതിയില്‍ അസന്‍സോളില്‍ നിന്ന് മൂന്ന് തവണ തെരഞ്ഞെടുക്കപ്പെട്ട ചൗധരിക്കെതിരേ പാര്‍ട്ടിതലത്തില്‍ നടത്തിയ അന്വേഷണത്തിനൊടുവിലാണ് നടപടിയെടുത്തത്. കഴിഞ്ഞ നവംബറില്‍ ജില്ലാ കമ്മിറ്റി മുമ്പാകെയാണ് പ്രവര്‍ത്തക പരാതിപ്പെട്ടത്. 
പാര്‍ട്ടിയുമായി ബന്ധപ്പെട്ട വിവരങ്ങള്‍ നല്‍കാമെന്ന് ചൗധരി യുവതിക്ക് വാഗ്ദാനം നല്‍കി. ഇത് ലഭിക്കാതിരുന്നതോടെ ഓര്‍മിപ്പിച്ചപ്പോഴാണ് അദ്ദേഹം അശ്ലീലസന്ദേശം അയക്കാന്‍ തുടങ്ങിയതെന്നാണ് യുവതിയുടെ പരാതി. ഫെബ്രുവരിയില്‍ ഹൂഗ്ലിയിലെ ഡാങ്കുനിയില്‍ നടന്ന സി.പി.എം സംസ്ഥാന സമ്മേളനത്തില്‍ വിഷയം ചര്‍ച്ചയായിരുന്നു. ഇതിന് പിന്നാലെയാണ് ആരോപണങ്ങള്‍ പരസ്യമായത്.

CPM expels former MP for sending obscene message to colleague