ഹാങ്ഷു: ഭീകരതയ്‌ക്കെതിരായ യോജിച്ച പോരാട്ടം ബ്രിക്‌സ് രാജ്യങ്ങള്‍ ശക്തിപ്പെടുത്തണമെന്ന് പ്രധാനമന്ത്രി നരേന്ദ്ര മോദി ആവശ്യപ്പെട്ടു. ചൈനയിലെ ഹാങ്ഷുവില്‍ ജി 20 ഉച്ചകോടിക്കിടെ നടത്തിയ ബ്രിക്‌സ് (ബ്രസീല്‍, റഷ്യ, ഇന്ത്യ, ചൈന, ദക്ഷിണാഫ്രിക്ക) രാജ്യങ്ങളുടെ യോഗത്തിലാണ് മോദി ഇക്കാര്യം ആവശ്യപ്പെട്ടത്. ഭീകരതയെ പിന്തുണക്കുന്നവരേയും അത് സ്‌പോണ്‍സര്‍ ചെയ്യുന്നവരേയും ഒറ്റപ്പെടുത്തണമെന്നും മോദി ആവശ്യപ്പെട്ടു.
ദക്ഷിണേഷ്യയിലോ മറ്റെവിടെങ്കിലുമോ ഉള്ള ഭീകരര്‍ക്ക് ബാങ്കുകളോ ആയുധ ഫാക്ടറികളോ ഇല്ല. അവര്‍ക്ക് പണവും ആയുധങ്ങളും നല്‍കാന്‍ ആളുകളുണ്ട്. ഭീകര വിരുദ്ധ നടപടികള്‍ക്ക് മാത്രമല്ല, അവരുടെ സ്‌പോണ്‍സര്‍മാരെ ഒറ്റപ്പെടുത്താനും കൂട്ടായ ശ്രമം വേണമെന്ന് മോദി പറഞ്ഞു. അന്താരാഷ്ട്ര സമൂഹത്തില്‍ വലിയ സ്വാധീനം ചെലുത്താന്‍ സാധിക്കുന്ന ബ്രിക്‌സിന് വികസ്വര രാജ്യങ്ങളുടെ വളര്‍ച്ചയില്‍ കാര്യമായ സംഭാവന നല്‍കാന്‍ കഴിയും. ഭീകരതയാണ് നമ്മെ സംബന്ധിച്ച് ഏറ്റവുമധികം അസ്ഥിരത സൃഷ്ടിക്കുന്ന ഭീഷണി. ഭീകര ആശയങ്ങള്‍ സോഷ്യല്‍ മീഡിയയിലൂടെ വലിയ തോതില്‍ പ്രചരിപ്പിക്കപ്പെടുന്നത് വലിയ ഭീഷണിയായി മാറിയിട്ടുണ്ടെന്നും മോദി അഭിപ്രായപ്പെട്ടു.