കൊല്‍ക്കത്ത: മദര്‍ തെരേസയുടെ വിശുദ്ധയാക്കല്‍ പ്രഖ്യാപനം അങ്ങകലെ റോമില്‍ നടക്കുമ്പോള്‍ കൊല്‍ക്കത്തയിലെ മിഷനറീസ് ഓഫ് ചാരിറ്റിയില്‍ സന്തോഷവും ആത്മീയവിശുദ്ധിയും നിറഞ്ഞു. മദറിന്റെ ആസ്ഥാനമായിരുന്ന കൊല്‍ക്കത്തയിലെ ആശ്രമത്തില്‍ സന്യാസിനികള്‍ ടെലിവിഷന്‍ സ്‌ക്രീനിലൂടെ ചടങ്ങുകള്‍ക്കു സാക്ഷിയായി. ആശ്രമത്തിനു പുറത്തും വലിയ സ്‌ക്രീനില്‍ പൊതുജനങ്ങള്‍ക്ക് പരിപാടി കാണാന്‍ സൗകര്യമൊരുക്കിയിരുന്നു. സുപ്പീരിയര്‍ ജനറല്‍ സിസ്റ്റര്‍ പ്രേമയുടെ നേതൃത്വത്തിലുള്ള മിഷനറീസ് ഓഫ് ചാരിറ്റി സംഘം വിശുദ്ധയാക്കല്‍ ചടങ്ങിനു സാക്ഷ്യംവഹിക്കാന്‍ റോമിലേക്കു പോയിരുന്നു. കൊല്‍ക്കത്തയിലെ മദര്‍ ഹൗസിലേക്ക് ആയിരങ്ങളാണ് ഓരോ ദിവസവും എത്തിക്കൊണ്ടിരിക്കുന്നത്.