കൊച്ചി: സത്യവും അസത്യവും കൂട്ടിക്കലർത്തുന്ന വഹാബി-മൗദൂദി വിഭാഗങ്ങളാണ് സുന്നി ഐക്യത്തിന് തുരങ്കം വയ്ക്കുന്നതെന്നും മുനമ്പത്തെത് വഖ്ഫ് ഭൂമിയല്ലെന്ന്
പറയുന്നതും ഈ വഹാബികളാണന്നും സമസ്ത കേരള ജംഇയ്യത്തുൽ ഉലമ മുശാവറ അംഗം ഉമർ ഫൈസി മുക്കം പറഞ്ഞു. കൊച്ചിയിൽ സുന്നി പണ്ഡിത സംയുക്ത സമിതിയുടെ നേതൃത്വത്തിൽ നടന്ന ഭരണഘടന-വഖ്ഫ് സംരക്ഷണ സമ്മേളനത്തിൽ സംസാരിക്കുകയായിരുന്നു അദ്ദേഹം.

വിശ്വാസപരമായ കാര്യങ്ങളിൽ ഇക്കൂട്ടർക്ക് ശരിയും തെറ്റൊന്നുമില്ല. പടച്ചവൻ്റെ പ്രീതി മാത്രം കാംക്ഷിച്ച് വഖ്ഫ് ചെയ്ത വസ്തുക്കൾ വഹാബികൾ സ്വന്തം ഇഷ്ടപ്രകാരം കൈകാര്യം ചെയ്യുമ്പോൾ സംഘടിത സക്കാത്തിൻ്റെ മറവിൽ സക്കാത്ത് ഫണ്ട് പത്രവും ചാനലുമൊക്കെ നടത്തുകയാണ് മൗദൂദികൾ ചെയ്യുന്നത്. മുനമ്പത്തെ 404.76  ഏക്കർ ഫറൂഖ് കോളജിന് വഖ്ഫായി നൽകിയതാണെന്ന് ഏവർക്കും വ്യക്തമാണ്.ഇത് മതവിരുദ്ധമായി വിൽപ്പന നടത്തിയത് ഫറൂഖ് കോളജ് മാനേജ്മെൻ്റായ വഹാബികളാണ്.

മുനമ്പത്തെ ജനങ്ങളെ കബളിപ്പിച്ച ഈ മാനേജ്മെൻ്റിൽ നിന്ന് സർക്കാർ തന്നെ സ്വത്ത് ഈടാക്കി മുനമ്പത്തുകാരെ പുനരധിവസിപ്പിക്കുകയാണ് വേണ്ടതെന്നും അദ്ദേഹം പറഞ്ഞു.