കല്‍പ്പറ്റ: വയനാട് എല്‍സ്റ്റണ്‍ എസ്റ്റേറ്റിലെ ഫാക്ടറിയും കെട്ടിടങ്ങളും സര്‍ക്കാര്‍ ഔദ്യോഗികമായി ഏറ്റെടുത്തു. പൂട്ടിയിട്ടിരുന്ന ഫാക്ടറിയിന്റെ താഴ് തകര്‍ത്താണ് ഉദ്യോഗസ്ഥര്‍ അകത്ത് കടന്നത്. ജീവനക്കാര്‍ താമസിക്കുന്ന ക്വാര്‍ട്ടേഴ്‌സുകള്‍ പ്രതിഷേധത്തെ തുടര്‍ന്ന് താല്‍ക്കാലികമായി ഒഴിപ്പിക്കേണ്ടതില്ലെന്ന് ജില്ലാ കളക്ടര്‍ ഉത്തരവിട്ടതിനെ തുടര്‍ന്ന് അവ അങ്ങനെ തന്നെ തുടരുകയാണ്.

ഇത് ടൗണ്‍ഷിപ്പ് നിര്‍മാണ പദ്ധതിയുടെ ഭാഗമായാണ് സർക്കാർ ഏറ്റെടുക്കലിനുള്ള നടപടി ആരംഭിച്ചത്. എസ്റ്റേറ്റിലെ ഏകദേശം 64 ഹെക്ടർ സ്ഥലവും അതിനകത്തെ കെട്ടിടങ്ങളും സർക്കാറിന്റെ ഉടമസ്ഥതയിലായി. ഇവിടെ വീടുകളുടെ നിര്‍മാണം തുടങ്ങിയിട്ടുണ്ട്. അതേസമയം ഫാക്ടറിയും ക്വാര്‍ട്ടേഴ്‌സുകളും ഒഴിയാൻ ഏഴ് ദിവസത്തെ നോട്ടീസ് ജീവനക്കാര്‍ക്ക് നല്‍കിയിരുന്നു.

നിശ്ചിത കാലാവധി കഴിഞ്ഞതിനെത്തുടര്‍ന്ന് തഹസില്‍ദാര്‍ അടങ്ങിയ ഉദ്യോഗസ്ഥ സംഘം ഇന്ന് രാവിലെ 11 മണിക്ക് എസ്റ്റേറ്റിലെത്തി നടപടികള്‍ ആരംഭിച്ചു. ജീവനക്കാര്‍ താമസിക്കുന്നതായി കാണുന്ന ഒരു ക്വാര്‍ട്ടേഴ്‌സിനെ ചൊല്ലിയുണ്ടായ വിവാദം പ്രശ്‌നത്തിലേക്ക് വഴിമാറി. സെക്യൂരിറ്റിയായിട്ടാണ് താനിടത്തെ താമസമെന്ന് പറഞ്ഞ ജീവനക്കാരനോട് രണ്ട് ദിവസത്തിനുള്ളില്‍ ജോലി രേഖകള്‍ ഹാജരാക്കാനാണ് തഹസില്‍ദാരുടെ നിര്‍ദ്ദേശം.

ശമ്പളക്കുടിശ്ശികയും മറ്റ് ആനുകൂല്യങ്ങളും തീര്‍പ്പാക്കാതെ ക്വാര്‍ട്ടേഴ്‌സ് ഒഴിയില്ലെന്ന നിലപാടിലാണ് ജീവനക്കാര്‍. ഫാക്ടറിയും മറ്റു കെട്ടിടങ്ങളും നേരത്തെ നോട്ടീസ് ലഭിച്ചെങ്കിലും പൂട്ടിയ നിലയിലായിരുന്നു. ഇതേ തുടര്‍ന്നാണ് ഉദ്യോഗസ്ഥര്‍ പൂട്ട് തകര്‍ത്ത് അകത്ത് കടന്ന് നടപടികള്‍ പൂര്‍ത്തിയാക്കിയത്.

ഇതിനിടെ, എസ്റ്റേറ്റില്‍ നിലവിലുള്ള തേയില ചെടികളും മറ്റു വസ്തുക്കളും സംബന്ധിച്ച കണക്കുകള്‍ തയ്യാറാക്കണമെന്ന് ആവശ്യപ്പെട്ട് എല്‍സ്റ്റണ്‍ മാനേജ്മെന്റ് വയനാട് ജില്ലാ കോടതിയെ സമീപിച്ചു. ഇതിന് വേണ്ടി ഒരു കമ്മീഷനെ നിയമിക്കണമെന്നാവശ്യപ്പെട്ട് ഉടമസ്ഥര്‍ കോടതിയില്‍ ഹര്‍ജി നല്‍കിയിട്ടുണ്ട്.