ഡൽഹി: പഹൽഗാം ഭീകരാക്രമണത്തിന്റെ പശ്ചാലത്തിൽ പ്രസ്താവനയുമായി ഇന്ത്യൻ ക്രിക്കറ്റ് ടീം പരിശീലകൻ ഗൗതം ഗംഭീർ. ഭീകരാക്രമണം അവസാനിക്കുന്നത് വരെ ഇന്ത്യ പാകിസ്താനുമായി ക്രിക്കറ്റ് കളിക്കരുതെന്നാണ്‌ ഗംഭീർ അഭിപ്രായപ്പെട്ടത്. ഡൽഹിയിൽ നടന്ന എബിപിയുടെ പരുപാടിയിൽ സംസാരിക്കുകയായിരുന്നു ഗംഭീർ. 

''ഇതിനുള്ള എന്റെ വ്യക്തിപരമായ ഉത്തരം തീർച്ചയായും ഇല്ല എന്നാണ്. അതിർത്തി കടന്നുള്ള ഭീകരത അവസാനിക്കുന്നതുവരെ ഇന്ത്യയ്ക്കും പാകിസ്താനും തമ്മിൽ ഒന്നും ഉണ്ടാകരുത്. മത്സരങ്ങൾ നടക്കും, സിനിമകൾ നിർമ്മിക്കപ്പെടും, ഗായകർ പാടിക്കൊണ്ടിരിക്കും എന്നാൽ കുടുംബത്തിലെ പ്രിയപ്പെട്ടൊരാളെ നഷ്ടപ്പെടുന്നതിന് തുല്യമായി മറ്റൊരു കാര്യവുമില്ല.മത്സരങ്ങൾ ഇന്ത്യ കളിക്കണോ വേണ്ടയോ എന്ന് തീരുമാനിക്കേണ്ടത് ബിസിസിഐയാണ്. ഇതിനേക്കാൾ പ്രധാനമായി സർക്കാരാണ്. അവർ എന്ത് തീരുമാനം എടുത്താലും. നമ്മൾ അതിൽ പൂർണ്ണമായും സംതൃപ്തരായിരിക്കണം'' ഗൗതം ഗംഭീർ പറഞ്ഞു.

അതേസമയം പഹൽഗാം ഭീകരാക്രമണത്തിന് പിന്നാലെ ഈ വർഷം നടക്കാനിരിക്കുന്ന ഏഷ്യ കപ്പ് ടൂർണമെന്റ് മാറ്റിവെക്കാൻ സാധ്യതയുണ്ടെന്നും റിപ്പോർട്ടുകൾ നിലനിൽക്കുന്നുണ്ട്. ഇന്ത്യയും പാകിസ്താനും തമ്മിലുള്ള ക്രിക്കറ്റ് ബന്ധം ഈ സമയങ്ങളിൽ അനുയോജ്യമല്ലെന്ന് സർക്കാർ കരുതുന്നതിനാൽ ഈ ടൂർണമെന്റ് മാറ്റിവെക്കുമെന്നാണ് റിപ്പോർട്ടുകൾ. 

ഓഗസ്റ്റിൽ ബംഗ്ലാദേശിൽ നടക്കുന്ന പരമ്പരയിലും ഇന്ത്യ കളിക്കില്ലെന്ന റിപ്പോർട്ടുകളും നിലനിൽക്കുന്നുണ്ട്. അതിർത്തിയിൽ നിലനിൽക്കുന്ന സംഘർഷങ്ങൾക്കിടയിലെ ചില സംഭവവികാസങ്ങളെത്തുടർന്നാണ് ഈ പര്യടനം റദ്ദാക്കാൻ സാധ്യതയുള്ളതെന്നാണ് ലഭിക്കുന്ന വിവരങ്ങൾ.

Dont play cricket with Pakistan until terrorism is stopped Gambhir