40 കഴിഞ്ഞാല്‍ ഭക്ഷണക്രമത്തില്‍ ചില മാറ്റങ്ങള്‍ കൊണ്ടുവരേണ്ടത് ആവശ്യമാണ്. അതിനായി ഭക്ഷണത്തില്‍ നിര്‍ബന്ധമായും ഇലക്കറികള്‍ ഉള്‍പ്പെടുത്തുക. പതിവായി ഇലക്കറികള്‍ കഴിക്കുന്നത് അസ്ഥികളുടെ സാന്ദ്രത വര്‍ധിപ്പിക്കുകയും അസ്ഥികള്‍ ഒടിയാനുള്ള സാധ്യത കുറയ്ക്കുകയും ചെയ്യുന്നു. 

അതുപോലെ ഉള്‍പ്പെടുത്തേണ്ടവയാണ് അയല, സാല്‍മണ്‍ തുടങ്ങിയ കൊഴുപ്പുള്ള മത്സ്യങ്ങള്‍. ഇതില്‍ ധാരാളമടങ്ങിയിരിക്കുന്ന ഒമേഗ-3 ഫാറ്റി ആസിഡുകളും വിറ്റാമിന്‍ ഡിയും കൊണ്ട് തന്നെ ഇവ ഭക്ഷണത്തില്‍ ഉള്‍പ്പെടുത്തേണ്ടതും അത്യാവശ്യമാണ്. 

നട്‌സുകളിലും കാത്സ്യവും മഗ്നീഷ്യവും ഒമേഗ3 ഫാറ്റി ആസിഡുകളും അടങ്ങിയിരിക്കുന്നു. ഇത് എല്ലുകളെ ബലമുള്ളതാക്കാന്‍ സഹായിക്കും. അതുകൊണ്ട് ദിവസവും ഒരുപിടി നട്‌സ് കഴിക്കുന്നത് ശീലമാക്കുക.  

പാലുല്‍പന്നങ്ങളായ തൈര് പാല്‍, ചീസ് തുടങ്ങിയവയില്‍ കാത്സ്യം, വിറ്റാമിന്‍ ഡി എന്നിവ ധാരാളമുണ്ട്. ഇത് അസ്ഥികള്‍ക്ക് ഗുണം ചെയ്യുകയും ഇവയുടെ ശക്തി വര്‍ധിപ്പിക്കുകയും അസ്ഥിക്കുണ്ടാകുന്ന ക്ഷതം തടയുകയും ചെയ്യുന്നു. അതുകൊണ്ട് പാലുല്‍പന്നങ്ങള്‍ കഴിക്കുന്നതും ശീലമാക്കുക.

ബെറി പഴങ്ങളായ സ്‌ട്രോബറി, ബ്ലൂബെറി, റാസ്‌ബെറി തുടങ്ങിയ ബെറികളില്‍ വിറ്റാമിന്‍ സിയും ആന്റിഓക്‌സിഡന്റുകളും കൂടുതലുണ്ട്. മാത്രമല്ല അസ്ഥികളുടെ ഘടനയും ശക്തിയും നിലനിര്‍ത്താന്‍ സഹായിക്കുന്ന കൊളാജനും ബെറിപ്പഴത്തിലുണ്ട്. അതുകൊണ്ട്  തന്നെ ബെറിപ്പഴങ്ങളും നിങ്ങള്‍ കഴിക്കുന്നത് ശീലമാക്കൂ. 

മധുരക്കിഴങ്ങില്‍ വിറ്റാമിന്‍ എ, സി പൊട്ടാസ്യം എന്നിവ ധാരാളമുണ്ട്. വിറ്റാമിന്‍ സി അസ്ഥികളുടെ ശക്തിക്ക് അത്യാവശ്യമായ കൊളാജന്‍ ഉല്‍പാദനത്തെ പിന്തുണയ്ക്കുന്നു. അതിനാല്‍ മധുരക്കിഴങ്ങ് കാണുമ്പോള്‍ കഴിക്കാന്‍ മറക്കണ്ട.