ചിരട്ട കൈയിലുള്ളവര്‍ ഇനി വെറുതെ അവിടെയും ഇവിടെയും ഇട്ടു കളയണ്ട. ആര്‍ക്കും വേണ്ടാതെ മുറ്റത്തും പറമ്പിലുമൊക്കെ വെറുതെ കളയുന്ന ചിരട്ടയ്ക്കിപ്പോ പൊന്നുംവിലയാണ്. മൂന്നു മാസം കൊണ്ട് രണ്ടിരട്ടിയിലധികമാണ് വിലയിലുണ്ടായിരിക്കുന്ന വര്‍ധനവ്. ജനുവരിയിലും ഫെബ്രുവരിയിലും കിലോഗ്രാമിന് 8-9 രൂപയായിരുന്നു വിലയെങ്കില്‍ ഇപ്പോഴത്തെ വില 27 രൂപയാണ്.

ആവശ്യം വര്‍ധിക്കുകയും തേങ്ങയുടെ ലഭ്യത കുറയുകയും ചെയ്തത് വില കൂടാന്‍ കാരണമായി. കരിയുണ്ടാക്കി ജലശുദ്ധീകരണത്തിനുവേണ്ടിയാണ് ചിരട്ട വ്യാപകമായി ഉപയോഗിക്കുന്നത്. ഇറ്റലി, ജര്‍മനി, ചൈന എന്നിവിടങ്ങളിലേക്കും ചിരട്ടക്കരിയുടെ കയറ്റുമതിയുണ്ട്.

500 കിലോ ഗ്രാം ചിരട്ടയായിരുന്നു ഒരു ദിവസം ഞങ്ങള്‍ക്ക് ലഭിച്ചിരുന്നതെങ്കില്‍ ഇപ്പോഴത് 2000 കിലോ വരെയായിട്ടുണ്ട്. കടത്ത്, കയറ്റിറക്ക് ചെലവടക്കം കിലോഗ്രാമിനു വരുന്നത് 31 രൂപയാണ്. തമിഴ്‌നാട്ടിലാണ് ചിരട്ട വില്‍പന നടത്തുന്നതെന്നും രാമനാട്ടുകരയിലെ കുറ്റ്യാടി ട്രേഡേഴ്‌സ് ഉടമയായ നിസാര്‍ പറയുന്നത്. 

ഏജന്റുമാരും ചില്ലറ വില്‍പനക്കാരും നാട്ടുകാരില്‍ നിന്നു കിലോയ്ക്ക് 18 രൂപ മുതല്‍ 22 രൂപ വരെ കൊടുത്താണ് ചിരട്ട ഇപ്പോള്‍ വാങ്ങിക്കുന്നത്. കര്‍ണാടകയിലെ തുംകൂര്‍, തമിഴ്‌നാട്ടിലെ കാങ്കേയും ഉദുമല്‍പേട്ട എന്നിവിടങ്ങളിലെ നാല്‍പതോളം ചിരട്ടക്കരി ഫാക്ടറികളിലേയ്ക്കാണ് കേരളത്തില്‍ നിന്നു ചിരട്ട കൂടുതലായും അയക്കുന്നത്.