ന്യൂഡൽഹി: ഇന്ത്യ-പാക് സംഘർഷങ്ങളുടെ പശ്ചാത്തലത്തിൽ ഇന്ത്യൻ പ്രീമിയർ ലീഗ് (ഐപിഎൽ) മത്സരങ്ങൾ അനിശ്ചിതകാലത്തേക്ക് നിർത്തിവക്കാൻ തീരുമാനിച്ചതായി ബി.സി.സി.ഐ സ്രോതസ്സുകളെ ഉദ്ധരിച്ച് പിടിഐ റിപ്പോർട്ട് ചെയ്യുന്നു. അതേസമയം, ബി.സി.സി.ഐയോ ഐപിഎൽ ഭരണസമിതിയോ ഇതുവരെ ഔദ്യോഗിക പ്രതികരണം നൽകിയിട്ടില്ല.

സുരക്ഷാ കാരണങ്ങളാലാണ് ഈ തീരുമാനമെന്ന് റിപ്പോർട്ടുകൾ സൂചിപ്പിക്കുന്നു. ഇരു രാജ്യങ്ങൾ തമ്മിലുള്ള സംഘർഷത്തിന്റെ പശ്ചാത്തലത്തിൽ, ഇന്നലെ ധരംശാലയിൽ നടന്ന പഞ്ചാബ് കിംഗ്സ് - ഡൽഹി ക്യാപിറ്റൽസ് മത്സരം പാതിവഴിയിൽ ഉപേക്ഷിച്ചിരുന്നു. ജമ്മു, പത്താൻകോട്ട് എന്നിവിടങ്ങളിൽ അപായ സൈറണുകൾ മുഴങ്ങിയതിനെ തുടർന്ന് സ്റ്റേഡിയത്തിലെ വൈദ്യുതി വിച്ഛേദിക്കപ്പെട്ടിരുന്നു. തുടർന്ന് സുരക്ഷ മുൻനിർത്തി മത്സരം ഉപേക്ഷിക്കുകയായിരുന്നു.  

ഈ സാഹചര്യം വിദേശ ക്രിക്കറ്റ് താരങ്ങളിൽ ആശങ്ക സൃഷ്ടിച്ചിട്ടുണ്ട്. ചില വിദേശ താരങ്ങൾ തങ്ങളുടെ രാജ്യങ്ങളിലേക്ക് മടങ്ങാൻ താത്പര്യം പ്രകടിപ്പിച്ചതായും റിപ്പോർട്ടുകളുണ്ട്. വിമാന സർവിസുകൾ താൽക്കാലികമായി നിർത്തിവെച്ചിരിക്കുന്നതിനാൽ, താരങ്ങളുടെ മടക്കയാത്ര ബുദ്ധിമുട്ടുള്ളതാകാനിടയുണ്ട്.

ഇതിനൊപ്പം, പാകിസ്ഥാനിലെ റാവൽപിണ്ടിയിൽ സ്റ്റേഡിയത്തിന് സമീപം സ്ഫോടനം നടന്നതിനെ തുടർന്ന്, പാകിസ്ഥാൻ ക്രിക്കറ്റ് ബോർഡ് പാകിസ്ഥാൻ സൂപ്പർ ലീഗ് മത്സരങ്ങളുടെ വേദി മാറ്റാൻ തീരുമാനിച്ചിരുന്നു. ദുബൈയിലേക്കാണ് പിഎസ്എൽ മത്സരങ്ങൽ മാറ്റിയിരിക്കുന്നത്.

Amid escalating India-Pakistan border tensions, IPL matches have been postponed indefinitely due to security concerns. The decision comes after the Punjab Kings vs Delhi Capitals match was earlier abandoned mid-game following security alerts. Foreign players have expressed concerns about continuing the tournament, with some seeking to return home. Meanwhile, Pakistan Super League matches were also relocated after a blast near a Rawalpindi stadium.