കുന്നും മലയും കയറിയുള്ള യാത്ര ചെയ്യാന്‍ ഇഷ്ടപ്പെടുന്നവര്‍ ധാരാളമുണ്ട്. പ്രത്യേകിച്ച് ഏകാന്തത ഇഷ്ടപ്പെടുന്നവര്‍ കൂടുതലായി ആശ്രയിക്കുന്നത് കുന്നുകളെയും മലകളെയുമാണ്. ശാന്തമായ അന്തരീക്ഷം തന്നെയാണ് ഇതിന് കാരണം. ഇളം കാറ്റുകളും തണുപ്പുമൊക്കെ ഇവിടുത്തെ പ്രത്യേകതകളുമാണ്. 

എന്നാല്‍ കുന്നും മലയും കയിയുള്ള യാത്രകള്‍ക്ക് ചെറിയൊരു പ്രശ്‌നമുണ്ട്. നമ്മുടെ ചെവി പെട്ടെന്ന് അടഞ്ഞുപോകുന്നത് കണ്ടിട്ടില്ലേ. കുറച്ചു സമയത്തേക്ക് ചിലപ്പോള്‍ ഒന്നും കേള്‍ക്കാന്‍ പറ്റിയെന്ന് വരില്ല. കുന്നും മലയും ഉള്ള ഇടത്തേക്ക് യാത്ര പോകുമ്പോള്‍ ചെവി പെട്ടെന്ന് അടയുന്നതിന്റെ കാരണം എന്താണ്?

കുന്നു കയറുകയോ മലകയറുകയോ ചെയ്യുമ്പോള്‍ ചെവി പെട്ടെന്ന് അടയുന്നതിന്റെ കാരണം വായുമര്‍ദത്തിലെ വ്യത്യാസമാണ്. ഉയരം കൂടുന്നതിനനുസരിച്ച് അന്തരീക്ഷമര്‍ദം കുറയും. നമ്മുടെ ചെവിയുടെ മധ്യഭാഗത്തുള്ള അറയിലെ (middle ear) യൂസ്റ്റേഷ്യന്‍ ട്യൂബ് (Eustachian tube) എന്ന ചെറിയ കുഴല്‍ വഴി മൂക്കിന്റെ പിന്‍ഭാഗവുമായി ബന്ധിപ്പിച്ചിരിക്കുന്നു. 

ഈ ട്യൂബ് സാധാരണയായി അടഞ്ഞ അവസ്ഥയിലാണ് കാണപ്പെടുന്നത്. അന്തരീക്ഷത്തിലെ പ്രഷര്‍ മാറുമ്പോള്‍, ഈ ട്യൂബ് തുറന്ന് അകത്തും പുറത്തുമുള്ള പ്രഷര്‍ തുല്യമാക്കാന്‍ ശ്രമിക്കുന്നതാണ്. ഈ പ്രക്രിയ നടക്കുമ്പോഴാണ് ചെവി അടഞ്ഞതുപോലെ തോന്നുകയും ഒരു 'പോപ്പ്' ശബ്ദം കേള്‍ക്കുകയും ചെയ്യുന്നത്.

കുന്നിന്‍ മുകളിലേക്ക് പോകുമ്പോള്‍ അന്തരീക്ഷത്തിലെ പ്രഷര്‍ കുറയുകയും ചെവിയുടെ അകത്തെ പ്രഷര്‍ കൂടുതലായിരിക്കുകയും ചെയ്യും. ഇങ്ങനെ വരുമ്പോള്‍  ഇയര്‍ഡ്രം പുറത്തേക്ക് തള്ളുകയും ചെവി അടഞ്ഞതായി അനുഭവപ്പെടുകയും ചെയ്യും. താഴേക്ക് ഇറങ്ങുമ്പോള്‍ ഇതിന്റെ വിപരീത രീതി സംഭവിക്കും. ഇതും ചെവി അടഞ്ഞ അനുഭവം നല്‍കുന്നു.

പരിഹാരം
ച്യൂയിങം ചവയ്ക്കുകയോ അതുപോലുള്ള എന്തെങ്കിലും ചവയ്ക്കുകയും കൂടുതല്‍ തവണ തുപ്പല്‍ ഇറക്കുകയും ചെയ്യുമ്പോള്‍ അത് യൂസ്റ്റേഷ്യന്‍ ട്യൂബ് തുറക്കാന്‍ സഹായിക്കുകയും ചെയ്യുന്നു.

കോട്ടുവായിടുക 

തുപ്പലിറക്കുകയും കോട്ടുവായിടുകയും ചെയ്യുമ്പോള്‍ യൂസ്റ്റേഷ്യന്‍ ട്യൂബ് തുറക്കാന്‍ സഹായിക്കും.

വാല്‍സാല്‍വ 

മൂക്ക് അടച്ചുപിടിച്ച് വായില്‍ നിന്ന് ശ്വാസം പുറത്തേക്ക് വിടാന്‍ ശ്രമിക്കുക. ഇത് ചെവിക്കുള്ളിലെ പ്രഷര്‍ കൂട്ടാനും ട്യൂബ് തുറക്കാനും സഹായിക്കും. എന്നാല്‍ ഇത് വളരെ പതുക്കെ ചെയ്യുക. ഒരിക്കലും ശക്തിയില്‍ ചെയ്യാതിരിക്കാന്‍ ശ്രദ്ധിക്കുക.

പതുക്കെ സഞ്ചരിക്കുക
 
പെട്ടെന്നുള്ള പ്രഷര്‍ മാറ്റങ്ങള്‍ ഒഴിവാക്കാന്‍ ഇത് സഹായിക്കും. ജലദോഷം, സൈനസൈറ്റിസ് തുടങ്ങിയ അസുഖങ്ങള്‍ ഉള്ളവര്‍ക്ക് ഈ ബുദ്ധിമുട്ട് കൂടുതലാവാന്‍ സാധ്യതയുണ്ട്. അങ്ങനെയുള്ളവര്‍ യാത്ര ചെയ്യുന്നതിന് മുന്‍പ് ഡോക്ടറെ കാണുന്നത് നല്ലതായിരിക്കും.

ഉയരങ്ങളിലേയ്ക്ക് യാത്ര പോകുമ്പോള്‍ ഈ കാര്യങ്ങളെല്ലാം പ്രത്യേകം ശ്രദ്ധിക്കേണ്ടതാണ്. യാത്ര നല്ലതുതന്നെ. അത് കൂടുതല്‍ ആരോഗ്യദായകവും ഫലപ്രദവുമാകാന്‍ സഞ്ചാരപ്രേമികള്‍ ഇങ്ങനെയുള്ള കാര്യങ്ങള്‍ നിര്‍ബന്ധമായും അറിഞ്ഞിരിക്കുകയും ശ്രദ്ധിക്കുകയും ചെയ്യേണ്ടതാണ്.