ഐപിഎല്ലിൽ ചെന്നൈ സൂപ്പർ കിങ്സിനെതിരായ മത്സരത്തിലെ തോൽവിക്ക് പിന്നാലെ നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്‌സ് പുറത്തായിരുന്നു. രണ്ട് വിക്കറ്റിന്റെ വിജയമാണ് ചെന്നൈ സൂപ്പർ കിങ്‌സ് സ്വന്തമാക്കിയത്. മത്സരത്തിൽ ആദ്യം ബാറ്റ് ചെയ്ത കൊൽക്കത്ത 20 ഓവറിൽ ആറ് വിക്കറ്റ് നഷ്ടത്തിൽ 179 റൺസാണ് നേടിയത്. വിജയലക്ഷ്യം പിന്തുടർന്നിറങ്ങിയ ചെന്നൈ രണ്ട് പന്തുകളും രണ്ട് വിക്കറ്റുകളും ബാക്കിനിൽക്കെ ലക്ഷ്യം മറികടക്കുകയായിരുന്നു.

ഇപ്പോൾ ഈ സീസണിലെ കൊൽക്കത്തയുടെ നിരാശാജനകമായ പ്രകടനങ്ങൾക്ക് പിന്നാലെ കെകെആർ നായകൻ അജിങ്ക്യ രഹാനയെ വിമർശിച്ചുകൊണ്ട് രംഗത്തെത്തിയിരിക്കുകയാണ് മുൻ ഇന്ത്യൻ താരം ഹർഭജൻ സിങ്. 

''അജിങ്ക്യ രഹാനെയായിരുന്നു കൊൽക്കത്തയുടെ പ്രശ്നം. കാരണം അദ്ദേഹം വളരെയധികം തെറ്റുകൾ വരുത്തി. റിയാൻ പരാഗ് ക്രീസിൽ നിൽക്കുമ്പോൾ അദ്ദേഹം മോയിൻ അലിക്ക് ഒരു ഓവർ നൽകി. അദ്ദേഹം ആ ഓവറിൽ നാല് ഫോർ അടിച്ചു. സി‌എസ്‌കെയ്‌ക്കെതിരായ മത്സരത്തിൽ ഡെവാൾഡ് ബ്രെവിസിനെതിരെ പന്ത് എറിയാൻ വൈഭവ് അറോറക്കാണ് രഹാനെ നൽകിയത്. ആ ഓവറിൽ അദ്ദേഹം 30 റൺസ് അടിച്ചു. രഹാനെ ആ സമയം ബൗളറോട് സംസാരിക്കേണ്ടതായിരുന്നു. പക്ഷേ അദ്ദേഹം അങ്ങനെ ചെയ്തില്ല'' ഹർഭജൻ സിങ് പറഞ്ഞു.

മെഗാ ലേലത്തിൽ 1.50 കോടി രൂപയ്ക്കാണ് രഹാനെയെ കൊൽക്കത്ത സ്വന്തമാക്കിയത്. ഐപിഎല്ലിൽ മറ്റ് പല ടീമുകളെയും ക്യാപ്റ്റൻ എന്ന നിലയിൽ നയിച്ച പരിചയ സമ്പത്തുള്ള താരം കൂടിയാണ് രഹാനെ. മാത്രമല്ല ഇന്ത്യൻ ടീമിന്റെ നായകനായും രഹാനെ പ്രവർത്തിച്ചിട്ടുണ്ട്. എന്നാൽ ഇത്തവണ കൊൽക്കതെയുടെ നായകനായി രഹാനെ നിരാശപ്പെടുത്തുകയായിരുന്നു. 

2018, 2019 സീസണിൽ രാജസ്ഥാൻ റോയൽസിന്റെ ക്യാപ്റ്റനായിട്ടായിരുന്നു രഹാനെ പ്രവർത്തിച്ചിട്ടുണ്ടായിരുന്നത്. റോയൽസിനെ 24 മത്സരത്തിലാണ് രഹാനെ നയിച്ചിട്ടുള്ളത്. 2017ൽ എംഎസ് ധോണിയുടെ അഭാവത്തിൽ റൈസിങ് പൂനെ സൂപ്പർ ജയന്റ്സിനെയും രഹാനെ നയിച്ചു. 2020-21ൽ നടന്ന ബോർഡർ ഗവാസ്കർ ട്രോഫിയിൽ ഇന്ത്യ നേടിയത് രഹാനെയുടെ കീഴിലാണ്. ഓസ്ട്രേലിയക്കെതിരെ 2-1നാണ് ഇന്ത്യ വിജയിച്ചത്. 

Former Indian player Harbhajan Singh has come out criticizing KKR captain Ajinkya Rahane following Kolkatas disappointing performances this season