ജമ്മുകശ്മീര്‍: ജമ്മുകശ്മീരില്‍ കുടുങ്ങിയ മലയാളി വിദ്യാര്‍ഥികള്‍ക്ക് നാട്ടിലെത്താന്‍ സുരക്ഷയും യാത്രാസൗകര്യവും നല്‍കണമെന്നാവശ്യപ്പെട്ട് ജമ്മുകശ്മിര്‍ മുഖ്യമന്ത്രി ഒമര്‍ അബ്ദുല്ലയുമായി എംപി കെ.സി വേണുഗോപാല്‍ സംസാരിച്ചു. സംഘര്‍ഷബാധിത പ്രദേശത്ത് വിദ്യാര്‍ഥികള്‍ക്ക് മതിയായ സുരക്ഷയോടെ യാത്രാസൗകര്യം ഒരുക്കാന്‍ വേണ്ട ക്രമീകരണം ഏര്‍പ്പെടുത്തുമെന്ന് ജമ്മുകശ്മീര്‍ എംപിയെ അറിയിച്ചു.

അതിര്‍ത്തി സംസ്ഥാനങ്ങളില്‍ നിന്ന് ഡല്‍ഹിയിലെത്തുന്ന വിദ്യാര്‍ഥികള്‍ക്ക് റിസര്‍വേഷന്‍ സൗകര്യം ഉറപ്പാക്കണമെന്ന് റെയില്‍ ബോര്‍ഡ് ചെയര്‍മാനോട് വേണുഗോപാല്‍ ആവശ്യപ്പെട്ടിട്ടുണ്ട് . ഇക്കാര്യം ആവശ്യപ്പെട്ട് എംപി റെയില്‍വേ ബോര്‍ഡ് ചെയര്‍മാന് കത്തും നല്‍കി. ഇതുമായി ബന്ധപ്പെട്ട് മംഗള എക്‌സ്പ്രസില്‍ അധികമായി സീറ്റ് അനുവദിച്ചിട്ടുണ്ട്. വരും ദിവസങ്ങളിലും ഇതേ റിസര്‍വേഷന്‍ ക്രമീകരണം ഉറപ്പുവരുത്തണമെന്നും എംപി ആവശ്യപ്പെട്ടു.

ജമ്മുകശ്മിരിലെയും പഞ്ചാബിലെയും സംഘര്‍ഷ ബാധിത പ്രദേശങ്ങളില്‍ നിന്ന് കേരളത്തിലേക്ക് തിരിച്ചിട്ടുള്ള മലയാളി വിദ്യാര്‍ഥികള്‍ക്കായി സ്‌പെഷല്‍ ട്രെയിനുകള്‍ വേണമെന്ന് വി ശിവദാസന്‍ എംപിയും ആവശ്യപ്പെട്ടു. ഡോ. വി ശിവദാസന്‍ എംപി റെയില്‍വേ മന്ത്രി അശ്വിനി വൈഷ്ണവിന് കത്ത് നല്‍കി. സ്‌പെഷല്‍ ട്രെയിന്‍ അല്ലെങ്കില്‍ സ്‌പെഷന്‍ കംപാര്‍ട്ട്‌മെന്റുകള്‍ അനുവദിക്കണമെന്നാണ് ആവശ്യം.