ന്യൂഡല്‍ഹി: അതിര്‍ത്തിയില്‍ പാകിസ്ഥാന്‍ വെടിനിര്‍ത്തല്‍ കരാര്‍ ലംഘനം തുടരുന്നു എന്ന വാര്‍ത്തകള്‍ പുറത്തു വരുന്നതിനിടെ സൈനികര്‍ സംയമനം പാലിക്കണമെന്ന് അഭ്യര്‍ഥിച്ച് പാക് വിദേശകാര്യമന്ത്രി. ഇന്ത്യയുമായുള്ള വെടിനിര്‍ത്തല്‍ കരാര്‍ പാലിക്കാന്‍ ബാധ്യസ്ഥരാണെന്നം സംയമനം പാലിക്കണമെന്നും അദ്ദേഹം പ്രസ്താവനയില്‍ ആവശ്യപ്പെട്ടു. ഉത്തരവാദിത്തത്തോടെയും സംയമനത്തോടെയുമാണ് തങ്ങള്‍ കാര്യങ്ങള്‍ കൈകാര്യം ചെയ്യുന്നതെന്നും പാകിസ്ഥാന്‍ വ്യക്തമാക്കി.

'വെടിനിര്‍ത്തല്‍ സുഗമമായി നടപ്പിലാക്കുന്നതിലെ ഏതൊരു പ്രശ്നവും ഉചിതമായ തലങ്ങളില്‍ ആശയവിനിമയം നടത്തി പരിഹരിക്കണമെന്ന് ഞങ്ങള്‍ വിശ്വസിക്കുന്നു. കരയിലുള്ള സൈനികരും സംയമനം പാലിക്കണം' പാക് പ്രസ്താവനയില്‍ പറയുന്നു.

വെടിനിര്‍ത്തല്‍ പ്രഖ്യാപനത്തിന് സേഷം ശ്രീനഗറില്‍ ഉള്‍പ്പെടെ ജമ്മു കശ്മീരിലെ പലയിടത്തും പാകിസ്താന്‍ ഡ്രോണ്‍ ആക്രമണം നടത്തിയതായി വാര്‍ത്തകള്‍ പുറത്തു വന്നിരുന്നു. നിയന്ത്രണരേഖയില്‍ ഷെല്ലാക്രമണമുണ്ടായതായും റിപ്പോര്‍ട്ടുണ്ടായിരുന്നു. വെടിനിര്‍ത്തല്‍ എവിടെയെന്നും ശ്രീനഗറിലാകെ സ്‌ഫോടന ശബ്ദം കേട്ടെന്നും ജമ്മു കശ്മീര്‍ മുഖ്യമന്ത്രി ഉമര്‍ അബ്ദുല്ല എക്‌സില്‍ കുറിക്കുകയും ചെയ്തു. 

 പിന്നാലെ കഴിഞ്ഞ ദിവസം രാത്രി 10.45ന് വിളിച്ചുചേര്‍ത്ത പ്രത്യേക വാര്‍ത്താസമ്മേളനത്തില്‍ വെടിനിര്‍ത്തല്‍ ലംഘനം സ്ഥിരീകരിച്ച ഇന്ത്യന്‍ വിദേശകാര്യ സെക്രട്ടറി വിക്രം മിസ്രി പാകിസ്താന്‍ നടപടി അപലപനീയമെന്ന് ചൂണ്ടിക്കാട്ടി. ധാരണകള്‍ക്ക് വിപരീതമായ സാഹചര്യമാണ് അതിര്‍ത്തിയില്‍.  ആക്രമണം ചെറുക്കാന്‍ സൈന്യത്തിന് നിര്‍ദേശം നല്‍കിയിട്ടുണ്ട്- അദ്ദേഹം വ്യക്തമാക്കി. വെടിനിര്‍ത്തല്‍ ധാരണയുടെ ലംഘനം പാകിസ്ഥാന്‍ ഗൗരവത്തോടെ കാണണമെന്നും ഇന്ത്യ മുന്നറിയിപ്പ് നല്‍കിയിരുന്നു.

അതേസമയം, ഇന്ത്യയാണ് വെടിനിര്‍ത്തല്‍ കരാര്‍ ലംഘിച്ചതെന്നാണ് പാകിസ്ഥാന്‍ കുറ്റപ്പെടുത്തുന്നത്.