ന്യൂഡൽഹി: ഇന്ത്യ-പാകിസ്ഥാൻ അതിർത്തിയിലെ സംഘർഷം രൂക്ഷമായതിനെ തുടർന്ന്, ന്യൂഡൽഹിയിൽ മെയ് 13-ന് നടത്താൻ നിശ്ചയിച്ചിരുന്ന സാംസങ് ഗാലക്സി എസ് 25 എഡ്ജിന്റെ ലോഞ്ച് ഇവന്റ് റദ്ദാക്കിയതായി റിപ്പോർട്ടുകൾ. ദക്ഷിണ കൊറിയൻ ടെക് ഭീമനായ സാംസങ് ഇത് ഔദ്യോഗികമായി സ്ഥിരീകരിച്ചിട്ടില്ലെങ്കിലും, സുരക്ഷാ ആശങ്കകൾ കണക്കിലെടുത്താണ് തീരുമാനമെന്നാണ് വിവരം.

സാംസങ് അടുത്തിടെ തങ്ങളുടെ ഏറ്റവും പുതിയ മുൻനിര സ്മാർട്ട്ഫോൺ ഗാലക്സി എസ് 25 എഡ്ജ് മെയ് 13-ന് അവതരിപ്പിക്കുമെന്ന് പ്രഖ്യാപിച്ചിരുന്നു. പരമ്പരാഗത അൺപാക്ക്ഡ് ഇവന്റിന് പകരം ഓൺലൈൻ കോൺഫറൻസ് വഴിയാണ് പ്രധാന അനാച്ഛാദനം നടത്താൻ തീരുമാനിച്ചിരുന്നത്. എന്നാൽ, ഇന്ത്യ ഉൾപ്പെടെയുള്ള പ്രധാന വിപണികളിൽ ചെറിയ തോതിലുള്ള ഇവന്റുകൾ നടത്താനും കമ്പനി പദ്ധതിയിട്ടിരുന്നു. ഇതിനിടെ, ന്യൂഡൽഹിയിലെ പരിപാടി റദ്ദാക്കിയതായാണ് റിപ്പോർട്ടുകൾ സൂചിപ്പിക്കുന്നത്.

കഴിഞ്ഞ മാസം ജമ്മു കശ്മീരിലെ പഹൽഗാമിൽ നടന്ന മാരകമായ തീവ്രവാദി ആക്രമണത്തിന് പിന്നാലെ, അതിർത്തി കടന്നുള്ള തീവ്രവാദ കേന്ദ്രങ്ങൾ ലക്ഷ്യമിട്ട് ഇന്ത്യ ‘ഓപ്പറേഷൻ സിന്ദൂർ’ ആരംഭിച്ചിരുന്നു. എന്നാൽ, പാകിസ്ഥാന്റെ ഭാഗത്തു നിന്നുള്ള ആക്രമണങ്ങൾ വർധിച്ചതോടെ സ്ഥിതിഗതികൾ കൂടുതൽ വഷളായി. ഈ പശ്ചാത്തലത്തിൽ, പൊതുപരിപാടികൾ നടത്തുന്നത് ഉചിതമല്ലെന്ന നിലപാടിലാണ് അധികൃതർ. തദ്ദേശ സ്വയംഭരണ സ്ഥാപനങ്ങൾ പരിപാടികൾക്കുള്ള അനുമതി നിഷേധിക്കുകയോ റദ്ദാക്കുകയോ ചെയ്യാനുള്ള സാധ്യതയും നിലനിൽക്കുന്നു.

സാംസങിന്റെ ആഗോള ആസ്ഥാനത്തിന്റെ മാർഗനിർദേശത്തിനായി കാത്തിരിക്കുകയാണെന്നും, ഇവന്റ് പുനഃക്രമീകരിക്കുകയോ പൂർണമായി വെർച്വൽ ഫോർമാറ്റിലേക്ക് മാറ്റുകയോ ചെയ്യാനാണ് സാധ്യതയെന്നും റിപ്പോർട്ടുകൾ വ്യക്തമാക്കുന്നു. അതേസമയം, ഗാലക്സി എസ് 25 എഡ്ജ് ഇന്ത്യൻ വിപണിയിൽ തീർച്ചയായും എത്തുമെന്ന് കമ്പനി അറിയിച്ചു.

Samsung has cancelled the global launch of the Galaxy S25 Edge scheduled for May 13 in New Delhi due to escalating India-Pakistan border tensions and heightened security concerns. The company is exploring virtual event options, with no new launch date confirmed.