തിരുവനന്തപുരം: സംസ്ഥാനത്തെ ഏഴ് ജില്ലകളിൽ അടുത്ത രണ്ട് ദിവസത്തേക്ക് ഉയർന്ന താപനിലയ്ക്ക് സാധ്യതയെന്ന് കേന്ദ്ര കാലാവസ്ഥാ വകുപ്പ് അറിയിച്ചു. കൊല്ലം, തൃശൂർ, പാലക്കാട്, മലപ്പുറം, കോഴിക്കോട്, കണ്ണൂർ, കാസർകോട് ജില്ലകളിൽ മഞ്ഞ അലർട്ട് പ്രഖ്യാപിച്ചു.

കോഴിക്കോട്, പാലക്കാട് ജില്ലകളിൽ താപനില 37 ഡിഗ്രി സെൽഷ്യസിലേക്കും കൊല്ലം, തൃശൂർ, മലപ്പുറം, കണ്ണൂർ, കാസർകോട് ജില്ലകളിൽ 36 ഡിഗ്രി സെൽഷ്യസിലേക്കും ഉയരാനാണ് സാധ്യത. ഈ ജില്ലകളിൽ, പ്രത്യേകിച്ച് തീരദേശ മേഖലകളിലും മൈതാന പ്രദേശങ്ങളിലും, ചൂടും അതിനൊപ്പം അസ്വസ്ഥതയും ഉണ്ടാകാൻ സാധ്യതയുള്ളതിനാൽ പൊതുജനം ജാഗ്രത പാലിക്കണമെന്ന് അധികൃതർ നിർദ്ദേശിച്ചു.

അതേസമയം, തെക്കുപടിഞ്ഞാറൻ മൺസൂൺ മെയ് 27-ന് കേരളത്തിലെത്താൻ സാധ്യതയുണ്ടെന്നും കാലാവസ്ഥാ വകുപ്പ് അറിയിച്ചു. നാലുദിവസം മുന്നോട്ടോ പിന്നോട്ടോ കാലവർഷം ആരംഭിക്കാമെന്നും സ്പഷ്ടീകരിച്ചു. കഴിഞ്ഞ വർഷം മെയ് 31-നായിരുന്നു കേരളത്തിൽ മൺസൂൺ ആരംഭിച്ചത്.

തെക്കൻ ആൻഡമാൻ കടൽ, തെക്ക് കിഴക്കൻ ബംഗാൾ ഉൾക്കടൽ, നിക്കോബാർ ദ്വീപ് എന്നിവിടങ്ങളിലേക്ക് മെയ് 13-ഓടെ കാലവർഷം എത്തിച്ചേരുമെന്ന് കേന്ദ്ര കാലാവസ്ഥാ വകുപ്പ് അറിയിച്ചിട്ടുണ്ട്. തുടര്‍ന്നുള്ള നാലോ അഞ്ചോ ദിവസത്തിനുള്ളില്‍ കാലവർഷം തെക്കൻ അറബിക്കടലിലേക്കും മാലിദ്വീപ്, കൊമോറിൻ, ആൻഡമാൻ നിക്കോബാർ ദ്വീപുകൾ, മധ്യ ബംഗാൾ ഉൾക്കടൽ തുടങ്ങിയ പ്രദേശങ്ങളിലേക്കും വ്യാപിക്കുമെന്നും അറിയിപ്പിൽ വ്യക്തമാക്കുന്നു.

വരുന്ന ദിവസങ്ങളിൽ കാലവർഷം ആരംഭിക്കുന്നതിന് മുന്നോടിയായി കേരളത്തിലെ ചിലയിടങ്ങളിൽ വേനൽ മഴയ്ക്ക് സാധ്യതയുണ്ടെന്നും കേന്ദ്ര കാലാവസ്ഥാ വകുപ്പ് മുന്നറിയിപ്പ് നൽകി.വനിതകളും കുട്ടികളും വയോധികരുമുള്‍പ്പെടെയുള്ളവരെ ചൂടില്‍ നിന്ന് സംരക്ഷിക്കാന്‍ പ്രാദേശിക ഭരണസമിതികളും ആരോഗ്യവകുപ്പും ആവശ്യമായ മുൻകരുതലുകൾ സ്വീകരിക്കണമെന്നും അധികൃതർ അറിയിച്ചു.

Kerala continues to face a high temperature warning with a yellow alert issued in seven districts — Kollam, Thrissur, Palakkad, Malappuram, Kozhikode, Kannur, and Kasaragod — for today and tomorrow. Maximum temperatures may reach 36–37°C. The India Meteorological Department also forecasts the southwest monsoon to hit Kerala by May 27, with possible pre-monsoon showers expected in isolated areas.