ഇന്ത്യൻ ഇതിഹാസ താരങ്ങളായ രോഹിത് ശർമ്മയും വിരാട് കോഹ്‌ലിയും ടെസ്റ്റ് ക്രിക്കറ്റിൽ നിന്നും വിരമിക്കൽ പ്രഖ്യാപിച്ചിരിക്കുകയാണ്. മെയ് ഏഴിനായിരുന്നു രോഹിത്തിന്റെ വിരമിക്കൽ പ്രഖ്യാപനം. കോഹ്‌ലി കഴിഞ്ഞ ദിവസവുമാണ് തന്റെ വിരമിക്കൽ പ്രഖ്യാപനം ക്രിക്കറ്റ് ലോകത്തെ അറിയിച്ചത്. 2024 ടി-20 ലോകകപ്പ് വിജയത്തിന് പിന്നാലെ കുട്ടിക്രിക്കറ്റിന്റെ ഫോർമാറ്റിൽ നിന്നും ഇരുവരും വിരമിച്ചിരുന്നു.

ഇനി ഇരുവരും ഏകദിന ഫോർമാറ്റിൽ മാത്രമേ കളിക്കൂ. ഇപ്പോൾ ഇരുവരുടെയും ഏകദിനത്തിലെ ഭാവിയെക്കുറിച്ച് സംസാരിക്കുകയാണ് മുൻ ഇന്ത്യൻ താരം സുനിൽ ഗവാസ്കർ. ഇരുവർക്കും ൨൦൨൭ ലോകകപ്പിൽ കളിക്കാൻ സാധിക്കില്ലെന്നാണ് മുൻ ഇന്ത്യൻ താരം പറഞ്ഞത്. 

''ഇല്ല, അവർ കളിക്കുമെന്ന് ഞാൻ കരുതുന്നില്ല. ഞാൻ വളരെ സത്യസന്ധനാണ്. അതിനാൽ അവർ ൨൦൨൭ ലോകകപ്പിൽ കളിക്കില്ല . അടുത്ത ഒരു വർഷത്തിനുള്ളിൽ അവർ മികച്ച ഫോം നിലനിർത്തുകയാണെങ്കിൽ ചിലപ്പോൾ സെഞ്ച്വറികൾ നേടിയാൽ ഇരുവർക്കും അവസരവും നൽകാം'' സുനിൽ ഗവാസ്കർ പറഞ്ഞു.

രോഹിത്തും കോഹ്‌ലിയും ഇനി ഏകദിനത്തിൽ മാത്രമാവും ഇന്ത്യക്കായി ഒരുമിച്ച് കളിക്കുക. ഇനി ഇന്ത്യയുടെ ഏകദിന മത്സരങ്ങൾ ഓഗസ്റ്റിലാണ് നടക്കുന്നത്. ബംഗ്ലാദേശിനെതിരെ മൂന്ന് വീതം ഏകദിനവും ടി-20യും ആയിരിക്കും ഇന്ത്യ കളിക്കുക.

എന്നാൽ നിലവിലെ സാഹചര്യങ്ങൾ കണക്കിൽ എടുക്കുമ്പോൾ ബംഗ്ലാദേശിൽ നടക്കുന്ന പരമ്പരയിൽ ഇന്ത്യ കളിക്കില്ലെന്ന റിപ്പോർട്ടുകളും നിലനിൽക്കുന്നുണ്ട്. അതിർത്തിയിൽ നിലനിൽക്കുന്ന സംഘർഷങ്ങൾക്കിടയിലെ ചില സംഭവവികാസങ്ങളെത്തുടർന്നാണ് ഈ പര്യടനം റദ്ദാക്കാൻ സാധ്യതയുള്ളതെന്നാണ് ലഭിക്കുന്ന വിവരങ്ങൾ. ഇതിനു ശേഷം ഓസ്‌ട്രേലിയക്കെതിരെയുള്ള മൂന്ന് ഏകദിന പരമ്പരയാണ് ഇന്ത്യൻ ടീമിന്റെ മുന്നിലുള്ളത്. ഓസ്‌ട്രേലിയക്കെതിരെ ഒക്ടോബറിൽ ആയിരിക്കും ഇന്ത്യ ഈ പരമ്പരയിൽ കളിക്കുക. ബംഗ്ലാദേശിനെതിരെയുള്ള പരമ്പര ഉപേക്ഷിക്കുകയാണെങ്കിൽ വീണ്ടും രോഹിത്തും കോഹ്‌ലിയും ഒരുമിച്ച് കളിക്കുന്നത് കാണാൻ ആരാധകർ ഇനിയും ഒരുപാട് കാത്തിരിക്കേണ്ടി വരും.