റാസൽഖൈമ: ചങ്ങരംകുളം കോക്കൂർ സ്വദേശി വലിയവളപ്പിൽ മുഹമ്മദ് ഹനീഫ (47) റാസൽഖൈമയിൽ ഹൃദയാഘാതം മൂലം അന്തരിച്ചു. റാസൽഖൈമ കേരള ഹൈപ്പർ മാർക്കറ്റ് ചീഫ് അക്കൗണ്ടന്റായി ജോലി ചെയ്തു വരികയായിരുന്ന ഹനീഫ ചൊവ്വാഴ്ച പുലർച്ചെ നെഞ്ചുവേദനയുണ്ടായതിനെ തുടർന്ന് റാസൽഖൈമ ഖലീഫ ആശുപത്രിയിലാണ് മരിച്ചത്. കോക്കൂർ വലിയവളപ്പിൽ മൊയ്‌തുവാണ് ഹനീഫയുടെ പിതാവ്. ഭാര്യ: ഷാനിബ. മക്കൾ: ഹനാൻ, അദ്‌നാൻ, അഫ്‌നാൻ. സഹോദരങ്ങൾ: ഫാറൂഖ്, അലി, സിദ്ദീഖ്, പരേതനായ ഫഖ്‌റുദ്ദീൻ, ആസ്യ, സുഹറ, സുബൈദ, റുഖിയ.

റാസൽഖൈമ കെ.എം.സി.സി റെസ്ക്യൂ വിംഗ് കൺവീനറും റാക് എസ്.കെ.എസ്.എസ്.എഫ് സ്‌റ്റേറ്റ് ട്രഷററുമായ ഫൈസൽ പുറത്തൂരിൻ്റെ നേതൃത്വത്തിൽ നടപടിക്രമങ്ങൾ പൂർത്തിയാക്കി ചൊവ്വാഴ്ച ഉച്ചയ്ക്ക് ദുബൈ സോനാപൂർ എംബാം സെൻ്ററിലെത്തിച്ച ഹനീഫയുടെ മൃതദേഹം രാത്രി നാട്ടിലേക്ക് കൊണ്ടു പോകും.

റാസൽഖൈമ-പൊന്നാനി മണ്ഡലം കെ.എം.സി.സി വൈസ് പ്രസിഡണ്ട് കൂടിയായി പ്രവർത്തിച്ചിരുന്ന ഹനീഫ സാംസ്കാരിക-ജീവകാരുണ്യ രംഗങ്ങളിലും സാന്നിധ്യമായിരുന്നു. അദ്ദേഹത്തിന്റെ വിയോഗം പരിചിത വൃത്തങ്ങളിൽ വേദന പടർത്തി. എല്ലാവരോടും ഹൃദ്യമായി പെരുമാറിയിരുന്ന പൊതു പ്രവർത്തകനെ കൂടിയാണ് നഷ്ടമായത്. ഹനീഫയുടെ നിര്യാണത്തിൽ റാസൽഖൈമ കേരള ഗ്രൂപ് ചീഫ് മാനേജിങ് ഡയരക്ടർ ഹസൻ ഹാജി, മാനേജിങ് ഡയരക്ടർ അബൂബക്കർ എന്നിവർ അനുശോചിച്ചു.