തിരുവനന്തപുരം: ഫോര്‍ട്ട് കൊച്ചിയില്‍ നിന്ന് കാണാതായ മൂന്നുകുട്ടികളെയും തിരുവനന്തപുരത്ത് കണ്ടെത്തി. തമ്പാനൂര്‍ റെയില്‍വേ സ്റ്റേഷനില്‍ നിന്നാണ് പൊലിസ് കുട്ടികളെ കണ്ടെത്തിയത്. ഫുട്‌ബോള്‍ കളിക്കാന്‍ പോയപ്പോള്‍ തട്ടിക്കൊണ്ടുപോയി ഗോഡൗണില്‍ അടച്ചെന്ന് കുട്ടികള്‍ പൊലിസിനോട് പറഞ്ഞു. അവിടുന്ന് എങ്ങനെയാണ് തിരുവനന്തപുരത്തെത്തിയത് എന്നതില്‍ വ്യക്തതയില്ലെന്നുമാണ് കുട്ടികള്‍ പറയുന്നത്.

കുട്ടികളുടെ മൊഴി പൊലിസ് വിശ്വാസത്തിലെടുത്തിട്ടില്ല. മൂന്നുകുട്ടികളെയും തമ്പാനൂര്‍ സ്റ്റേഷനിലെത്തിച്ചു. എട്ടാം ക്ലാസിലും ഒമ്പതാംക്ലാസിലും പഠിക്കുന്ന കുട്ടികളെ ഇന്നലെ രാവിലെ പത്തുമണിയോടെയാണ് കാണാതായത്. സഹോദരങ്ങളായ രണ്ടുപേരും അയല്‍വാസിയായ മറ്റൊരു കുട്ടിയുമായിരുന്നു. റെയില്‍വേ സ്റ്റേഷനില്‍ കറങ്ങിനടക്കുകയായിരുന്ന കുട്ടികളെ തിരിച്ചറിഞ്ഞത് ഓട്ടോ ഡ്രൈവറായിരുന്നു.

 യൂട്യൂബില്‍ വാര്‍ത്ത കണ്ടായിരുന്നു ഡ്രൈവര്‍ പൊലിസില്‍ വിവരമറിയിച്ചത്. അതേസമയം കുട്ടികള്‍ വീട്ടില്‍ നിന്ന് 3000 രൂപയിലധികം കൊണ്ടുപോയിട്ടുണ്ട്. എന്നാല്‍ കുട്ടികളുടെ കൈയില്‍ ബാഗോ പണമോ ഇല്ലെന്നും തട്ടിക്കൊണ്ടു പോയി എന്ന കുട്ടികളുടെ മൊഴിയില്‍ വസ്തുതയില്ലെന്നും തമ്പാനൂര്‍ എസ്എച്ച്ഒ വിഎം ശ്രീകുമാര്‍ പറഞ്ഞു. കുട്ടികള്‍ നഗരം കാണാന്‍ ഇറങ്ങിയതാണെന്നാണ് പൊലിസിന്റെ നിഗമനം. സംഭവത്തില്‍ കൂടുതല്‍ അന്വേഷണം തുടരുമെന്നും പൊലിസ്.