ദുബൈ: ഈ വര്‍ഷത്തെ ആദ്യ മൂന്നു മാസങ്ങളിലെ സാലിക് ലാഭത്തില്‍ വര്‍ധനവ്. ദുബൈയിലെ ടോള്‍ ഗേറ്റ് ഓപ്പറേറ്ററായ സാലിക്കിന്റെ അറ്റാദായം 33.7% ഉയര്‍ന്ന് 370.6 മില്യണ്‍ ദിര്‍ഹമായി. കഴിഞ്ഞ നവംബറില്‍ നഗരത്തില്‍ 2 പുതിയ ടോള്‍ ഗേറ്റുകള്‍ തുറന്നത് ലാഭത്തിലെ വര്‍ധനവിന് കാരണമായെന്നാണ് വിദഗ്ധര്‍ പറയുന്നത്. 

ജനുവരി മുതല്‍ മാര്‍ച്ച് വരെയുള്ള കാലയളവില്‍ 158 ദശലക്ഷം യാത്രകളാണ് സാലിക് രേഖപ്പെടുത്തിയത്. യാത്രകളുടെ എണ്ണത്തില്‍ വര്‍ധനവ് രേഖപ്പെടുത്തിയതോടെ വരുമാനത്തിലും സമാനമായ ശതമാനം വര്‍ധിച്ച്, കമ്പനിയുടെ നരുമാനം 751.6 ദശലക്ഷം ദിര്‍ഹമായി. പീക്ക്, ഓഫ് പീക്ക് സമയങ്ങള്‍ അടിസ്ഥാനമാക്കിയാണ് സാലിക് നിലവില്‍ ടോള്‍ഗേറ്റ് ഉപയോക്താക്കള്‍ക്ക് ബില്‍ നല്‍കുന്നത്.

ആദ്യ പാദത്തില്‍ പിഴകളില്‍ നിന്നുള്ള സാലിക്കിന്റെ വരുമാനം 16.2% ഉയര്‍ന്ന് 68.4 മില്യണ്‍ ദിര്‍ഹമായി. മൊത്തം നിയമലംഘനങ്ങളുടെ എണ്ണം 15% വര്‍ധിച്ച് 786,000 ആയി. ഇത് മൊത്തം ടോള്‍ ട്രാഫിക്കിന്റെ 0.4 ശതമാനമാണ്. പിഴകളില്‍ നിന്നുള്ള വരുമാനം 2025ലെ ആദ്യ പാദത്തിലെ മൊത്തം വരുമാനത്തിന്റെ 9.1 ശതമാനമാണ്.

'ലാഭക്ഷമത ശക്തമാണ്, EBITDA വളര്‍ച്ച 35%ല്‍ കൂടുതലാണ്' സാലിക്കിന്റെ സിഇഒ ഇബ്രാഹിം സുല്‍ത്താന്‍ അല്‍ ഹദ്ദാദ് പറഞ്ഞു.

ആദ്യ മൂന്ന് മാസങ്ങളില്‍, സാലിക്കിന്റെ ടോള്‍ ഉപയോഗ ഫീസ് 35.5% ഉയര്‍ന്ന് 665.6 മില്യണ്‍ ദിര്‍ഹമായി. '2025 ജനുവരി അവസാനം വേരിയബിള്‍ പ്രൈസിംഗ് ഏര്‍പ്പെടുത്തിയതും രണ്ട് പുതിയ ഗേറ്റുകള്‍ അവതരിപ്പിച്ചതും വര്‍ഷത്തിലെ ആദ്യ മൂന്ന് മാസങ്ങളില്‍ ദുബൈയിലെ ഉയര്‍ന്ന തോതിലുള്ള ടൂറിസവുമാണ് ഇതിന് പ്രധാന കാരണം,' സാലിക് പ്രസ്താവനയില്‍ പറഞ്ഞു. ഇക്കാലയളവില്‍ പീക്ക് സമയത്തെ യാത്രകള്‍ ആകെ 39.3 ദശലക്ഷത്തിലും ഓഫ്പീക്ക് സമയത്തെ യാത്രകള്‍ 107.5 ദശലക്ഷത്തിലുമെത്തി.

Salik, Dubai's toll gate operator, reports a profit increase in 2025 due to newly added toll gates and revised pricing. Learn how these changes impact road users and future revenue growth.