റിയാദ്: സഊദി പ്രോലീഗില്‍ ചരിത്ര ജയവുമായി അല്‍ നസ്‌റ്. കഴിഞ്ഞ ദിവസം നടന്ന മത്സരത്തില്‍  എതിരില്ലാത്ത ഒമ്പത് ഗോളുകള്‍ക്ക് അല്‍ അഖ്ദൗദ് ക്ലബിനെയാണ് അല്‍ നസ്‌റ് തോല്‍പ്പിച്ചത്. അല്‍ നസ്‌റിന്റെ ചരിത്രത്തിലെ വലിയ ജയംകൂടിയായിരുന്നു ഇന്നലത്തേത്. മത്സരത്തിന്റെ 16ാം മിനുട്ടില്‍ തന്നെ അല്‍ നസറിന്റെ ഗോള്‍വേട്ടയ്ക്ക് തുടക്കമായി. 
അയ്മാന്‍ യഹ്യയാണ് ആദ്യം വലചലിപ്പിച്ചത്. 20, 52 മിനുട്ടുകളില്‍ ജോണ്‍ ഡുറാന്‍ ഗോളുകള്‍ നേടി. മാര്‍സലോ ബ്രാസോവിച്ച് 27ാം മിനുട്ടിലാണ് അല്‍ നസറിനായി വലകുലുക്കിയത്. ആദ്യ പകുതിയുടെ ഇഞ്ചുറി ടൈമില്‍ സാദിയോ മാനെ ആദ്യ ഗോള്‍ നേടി. ആദ്യ പകുതി അവസാനിക്കുമ്പോള്‍ അല്‍ നസര്‍ എതിരില്ലാത്ത നാല് ഗോളുകള്‍ക്ക് മുന്നിലായിരുന്നു.രണ്ടാം പകുതിയില്‍ 59, 64, 74 മിനുട്ടുകളില്‍ മാനെ വീണ്ടും ഗോളുകള്‍ നേടി.

രണ്ടാം പകുതിയുടെ ഇഞ്ചുറി ടൈമില്‍ 94ാം മിനുട്ടില്‍ മുഹമ്മദ് മാരന്‍ കൂടി ഗോള്‍ നേടിയതോടെ അല്‍ നസറിന്റെ ഗോള്‍നേട്ടം ഒമ്പതായി ഉയര്‍ന്നു. വിജയത്തോടെ സഊദി പ്രോ ലീഗ് പോയിന്റ് ടേബിളില്‍ അല്‍ നസര്‍ മൂന്നാം സ്ഥാനത്തായി. 31 മത്സരങ്ങളില്‍ നിന്ന് 63 പോയിന്റുകളാണ് അല്‍ നസര്‍ നേടിയിരിക്കുന്നത്. 31 മത്സരങ്ങളില്‍ 74 പോയിന്റ് നേടിയ അല്‍ ഇത്തിഹാദ് ആണ് പോയിന്റ് പട്ടികയില്‍ ഒന്നാം സ്ഥാനത്തുള്ളത്. 

Al Nasr delivers a record-breaking performance, defeating Al Aqdaoud with a dominant nine-goal lead.