തിരുവനന്തപുരം: റെയില്‍വേ ഭൂപടത്തില്‍ ഇടംപിടാക്കാത്ത ഇടുക്കിയില്‍ ട്രെയിനിന്റെ ചൂളം വിളി കേള്‍ക്കാന്‍ സാധ്യത. ഇതിനായി റെയില്‍വേ ട്രാഫിക് സര്‍വേ നടത്തുന്നു. രണ്ട് പുതിയ പാതകളാണ് മുന്നിലുള്ളത്. കുമളിശബരിമല റെയില്‍വേ പാതയാണൊന്ന്. മറ്റൊന്ന് ദിണ്ഡിഗലില്‍ നിന്നും ശബരിമലയിലേക്കുള്ള പാത. ആദ്യപാത 106ഉം രണ്ടാമത്തേത് 201 കിലോമീറ്ററുമാണ്. സാധ്യതാ പഠനത്തിനും ട്രാഫിക് സര്‍വേയ്ക്കുമായി ഈ സാമ്പത്തികവര്‍ഷം ഫണ്ടും നീക്കിവച്ചിട്ടുണ്ട്. പുതിയ ബജറ്റില്‍ ദക്ഷിണ റെയില്‍വേയ്ക്ക് അനുവദിച്ച വിവിധ പദ്ധതികളുടെ റിപ്പോര്‍ട്ടിലാണ് പുതിയ പാതകളുടെ വിവരമുള്ളത്. കുമളിശബരിമല പാതയുടെ സാധ്യതാ പഠനത്തിനും ട്രാഫിക് സര്‍വേയ്ക്കുമായി 16 ലക്ഷം രൂപയും ദിണ്ഡിഗല്‍ശബരിമല പാതയ്ക്ക് 30 ലക്ഷം രൂപയുമാണ് ബജറ്റില്‍ മാറ്റിവച്ചത്. 

പുതിയ പാത യാഥാര്‍ഥ്യമായാല്‍ ഹൈറേഞ്ചുകാര്‍ക്ക് ട്രെയിന്‍ യാത്ര കൈയെത്തും ദൂരത്താകും. മറ്റ് സംസ്ഥാനങ്ങളില്‍ നിന്നുള്ള ശബരിമല തീര്‍ഥാടകര്‍ക്കും ഏറെ പ്രയോജനം ചെയ്യും. ഇടുക്കിയിലെ വ്യാപാരവും വിനോദസഞ്ചാരവും വികസിക്കും. 
എന്നാല്‍ മുമ്പ് രണ്ട് പാതകള്‍ ഇടുക്കിയിലേക്ക് എത്തിക്കാന്‍ നീക്കമുണ്ടായിരുന്നെങ്കിലും വിജയം കണ്ടില്ല. 2009ല്‍ ദിണ്ഡിഗല്‍കുമളി റെയില്‍പ്പാതയാണ് സജീവ ചര്‍ച്ചയായി ഉയര്‍ന്നുവന്നത്. 

ഇതിന് ആസൂത്രണ കമ്മിഷന്റെ അംഗീകാരവും ലഭിച്ചു. ദിണ്ഡിഗലില്‍നിന്ന് ചെമ്പട്ടി, വത്തലഗുണ്ട്, പെരിയകുളം, തേനി, ബോഡിനായ്ക്കന്നൂര്‍, തേവാരം, കമ്പം വഴി ലോവര്‍ ക്യാംപ് വരെ നൂറ് കിലോമീറ്ററിലധികം വരുന്നതായിരുന്നു നിര്‍ദിഷ്ട റെയില്‍പ്പാത. പദ്ധതിക്ക് ചെലവാകുന്ന അഞ്ഞൂറ് കോടിയിലധികം രൂപയുടെ പകുതി തമിഴ്‌നാടും പകുതി കേന്ദ്രവും അനുവദിക്കണമെന്നായിരുന്നു ആസൂത്രണ കമ്മിഷന്റെ നിര്‍ദേശം. തുക വകയിരുത്തല്‍ നയത്തില്‍ പദ്ധതി മുങ്ങുകയായിരുന്നു. 
വര്‍ഷങ്ങള്‍ക്ക് മുമ്പ് ബജറ്റില്‍ ഇടംപിടിച്ച ശബരിപാതയില്‍ കേരളം നിര്‍ദേശിക്കുന്ന അലൈന്‍മെന്റും എറണാകുളം, ഇടുക്കി, കോട്ടയം, പത്തനംതിട്ട ജില്ലകളിലൂടെ കടന്നുപോകുന്ന നിലയിലാണ്. എന്നാല്‍ പദ്ധതി ചെലവിന്റെ കാര്യത്തില്‍ കേന്ദ്രസംസ്ഥാന സര്‍ക്കാരുകളുടെ ഭാഗത്ത് നിന്നും സമവായം ഉണ്ടാകാത്തത് മൂലം ഈ പദ്ധതിയും നീണ്ടുപോവുകയാണ്. കേരളത്തില്‍ ഇടുക്കി, വയനാട് ജില്ലകളില്‍ മാത്രമാണ് റെയില്‍വേ പാതകളില്ലാത്തത്. ഇടുക്കിക്കാര്‍ക്ക് അങ്കമാലിയിലോ കോട്ടയത്തോ എത്തണം. വയനാട്ടുകാര്ര്‍ക്ക് കോഴിക്കോടോ നിലമ്പൂരോ എത്തണം.