തിരുവനന്തപുരം: നിർമിത ബുദ്ധി (ആർട്ടിഫിഷ്യൽ ഇന്റലിജൻസ്) ഇടത്തരക്കാരുടെ തൊഴിൽ മേഖലയുടെ അടിവേരറുക്കുന്നു. എ.ഐ എല്ലാ മേഖലയിലും ഗുണകരമായ പരിവർത്തനം കൊണ്ടുവരുമെന്നും അതിന്റെ കെടുതികളായി പ്രതിസന്ധികൾ ഉണ്ടാകുമെന്നും മുന്നറിയിപ്പുകൾ പുറത്തുവന്നിരുന്നു. എന്നാൽ, അതിന്റെ ആദ്യ ആഘാതത്തിൽ ആടിയുലയുകയാണ് ഐ.ടി മേഖല.

കണക്കുകൾ അനുസരിച്ച് ഇതുവരെ രാജ്യത്തെ 22,000 പേർക്കാണ് എ.ഐ കാരണം തൊഴിൽ നഷ്ടമായത്. ഫെബ്രുവരിയിൽ മാത്രം 16,000 പേർ തൊഴിൽ രഹിതരായി. ഐ.ടി മേഖലയ്ക്കു പുറമേ റിയൽ എസ്റ്റേറ്റ്, ബിസിനസ്, ഇൻവെസ്റ്റ്‌മെന്റ് മേഖലകളിലും ഐ.ഐ തൊഴിൽ നഷ്ടമുണ്ടാക്കുന്നുണ്ട്. കഴിഞ്ഞ ദിവസം ഐ.ബി.എം അവരുടെ മനുഷ്യവിഭവ ശേഷി മേഖലയിൽ നിന്ന് ജൂനിയറായ 100 എച്ച്.ആർമാരെ ഒറ്റയടിക്ക് പുറത്താക്കിയതാണ് ഇതിൽ ഏറ്റവും പുതിയ സംഭവം. ഐ.ടി മേഖലയിലെ ചെറുതും വലുതുമായ വിവിധ കമ്പനികളിൽ പിരിച്ചുവിടൽ തുടരുകയാണെന്നാണ് ഈ മേഖലയുമായി ബന്ധപ്പെട്ടവർ വെളിപ്പെടുത്തുന്നത്.

ഐ.ടി മേഖലയിലെ സോഫ്റ്റ് വെയർ ടെസ്റ്റിങ്, എൻട്രി ലെവൽ ജോലികളിലും ബി.പി.ഒ മേഖലയിലുമാണ് 50 ശതമാനത്തോളം തൊഴിൽ നഷ്ടമുണ്ടാകുക എന്ന് വിദഗ്ധർ ചൂണ്ടിക്കാട്ടിയിരുന്നു. ഈ മേഖലയിൽ പ്രധാനമായി ജോലിക്കാർ മലയാളികളാണെന്നത് സംസ്ഥാനത്തിനും മുന്നറിയിപ്പാണ്. കോഡിങ് തൊഴിലുകൾ പൂർണമായും നിന്നുപോകുമെന്നും പറയപ്പെടുന്നു. കോഡ് എഴുതൽ, ഡാറ്റ അനാലിസിസ്, സോഫ്റ്റ്‍വെയർ നിർമിതി എന്നിവയിലുള്ള എ.ഐ കഴിവിനോടെതിരിടുക ശ്രമകരമാണെന്ന് വിദഗ്ധർ ചൂണ്ടിക്കാട്ടുന്നു.

2022ലെ ലോക സാമ്പത്തിക ഫോറത്തിന്റെ റിപ്പോർട്ടിൽ 2025ലെ 75 ശതമാനം തൊഴിലുകളും നിർമിത ബുദ്ധിയുടെ സ്വാധീനത്തിലാകുമെന്ന് മുന്നറിയിപ്പുണ്ടായിരുന്നു. ഇത് ശരിവയ്ക്കുന്ന സംഭവങ്ങളാണിപ്പോൾ നടക്കുന്നത്. മനുഷ്യ വിഭവശേഷിക്ക് പകരം എ.ഐ വരുമെന്ന പ്രവചനങ്ങളാണ് തൊഴിൽ മേഖലയിലുള്ളത്. എ.ഐയുടെ വളർച്ചയ്ക്ക് ആനുപാതികമായി കാര്യങ്ങൾ ഗ്രഹിക്കാനും തൊഴിലിൽ മാറ്റം വരുത്താനും കഴിയുന്നവർക്കേ തുടരാനാവുകയുള്ളൂ എന്നതും മറ്റൊരു പ്രതിസന്ധിയാണ്. വേഗതയാണ് ഇവിടെ പ്രധാന ഘടകം. ചെറിയ മത്സ്യങ്ങളെ വലിയവ തിന്നുകയല്ല. വേഗം കുറഞ്ഞവയെ വേഗം കൂടിയവ തിന്നുമെന്നതാണ് ഫലമെന്ന് ലോക സാമ്പത്തിക ഫോറം ചെയർമാൻ ക്ലോസ് ഷ്വാബ് വ്യക്തമാക്കിയിരുന്നു.
അതേസമയം, നിർമിത ബുദ്ധിയുടെ സ്വാധീനത്താൽ തൊഴിലവസരങ്ങൾ നഷ്ടപ്പെടുന്നതിനനുസരിച്ച് ആനുപാതികമായെല്ലെങ്കിലും തൊഴിൽ അവസരങ്ങൾ സൃഷ്ടിക്കപ്പെടുമെന്ന് വിദഗ്ധരെ ഉദ്ധരിച്ച് കേന്ദ്ര സർക്കാർ വൃത്തങ്ങൾ ചൂണ്ടിക്കാട്ടിയിരുന്നു.

വരുന്ന രണ്ടുവർഷത്തിൽ രാജ്യത്ത് എ.ഐ പ്രൊഫഷനലുകളുടെ അഭാവം കാരണം 23 ലക്ഷത്തിലേറെ തൊഴിലവസരങ്ങൾ ഒഴിഞ്ഞു കിടക്കുമെന്ന ബെയ്ൻ ആൻഡ് കമ്പനിയുടെ പഠനവും ഇതിനിടെ പുറത്തുവന്നിട്ടുണ്ട്. ഡാറ്റ സയന്റിസ്റ്റ്, എ.ഐ എതിസിസ്റ്റ്, നാച്ചുറൽ ലാംഗ്വേജ് പ്രൊസസിങ് സ്‌പെഷ്യലിസ്റ്റ്, ഓട്ടോമേഷൻ-മെഷിൻ ലേണിങ്-റോബോട്ടിക്ക്‌സ് എൻജിനിയർ, സൈബർ സെക്യൂരിറ്റി  എന്നീ മേഖലകളിലാണ് ഐ.ഐ അവസരങ്ങൾ. ആഗോള ടാലന്റ് ഹബ്ബ് ആയി രാജ്യത്തെ മാറ്റുമെന്ന് കേന്ദ്രസർക്കാരിന്റെ പ്രഖ്യാപനവും ഈ വഴിയിൽ സംസ്ഥാന സർക്കാരിന്റെ പ്രത്യേക നിർമിത ബുദ്ധി നയവും ഗുണകാരമാകുമെന്ന് പ്രതീക്ഷിക്കാം.

AI is taking hold the first blow to the IT sector