ലണ്ടൻ: ആസ്റ്റൺ വില്ല ഗോൾകീപ്പർ എമിലിയാനോ മാർട്ടിനസ് ക്ലബ് വിടാനൊരുങ്ങുന്നതായി റിപ്പോർട്ട്. വില്ലയുടെ അവസാന ഹോം മത്സരത്തിൽ കാണികളോട് കണ്ണീരോടെ കൈവീശിയായിരുന്നു മാർട്ടിനസ് മൈതാനം വിട്ടത്. ഇത് താരത്തിന്റെ വില്ലയുടെ അവസാന മത്സരമാണെന്ന് സൂചിപ്പിക്കുന്നതായി മാർക്ക അടക്കമുള്ള മാധ്യമങ്ങൾ റിപ്പോർട്ട് ചെയ്തിരുന്നു. വില്ലയുടെ തിരിച്ചുവരവിൽ നിർണായക പങ്കുവഹിച്ച താരമാണ് അർജൻറീനിയൻ ഗോൾകീപ്പറായ മാർട്ടിനെസ്. 

2020ൽ ആഴ്‌സണലിൽ നിന്ന് ആസ്റ്റൺ വില്ലയിൽ ചേർന്ന താരം അതിനുശേഷം പ്രീമിയർ ലീഗ് ക്ലബ്ബിനായി 212 മത്സരങ്ങളിൽ പങ്കെടുത്തിട്ടുണ്ട്. മാർട്ടിനെസിനെ സ്വന്തമാക്കാനുള്ള സാധ്യത ബാഴ്‌സലോണ പരിശോധിക്കുന്നുണ്ടെന്നാണ് യൂറോപ്പിലെ പ്രമുഖ മാധ്യമങ്ങൾ റിപ്പോർട്ട് ചെയ്യുന്നത്. ടോട്ടനം, മാഞ്ചസ്റ്റർ യുനൈറ്റഡ് ടീമുകളും എമിയെ റാഞ്ചാനുള്ള നീക്കങ്ങൾ നടത്തുന്നതായി റിപ്പോർട്ടുണ്ട്.

എന്നാൽ ഇക്കാര്യത്തിൽ ഔദ്യോഗിക വിശദീകരണം വന്നിട്ടില്ല. സഊദി ലീഗിലേക്ക് ചേക്കേറുമെന്ന തരത്തിലും വാർത്തകൾ പരക്കുന്നുണ്ട്. എന്നാൽ സഊദി ലീഗിൽ നിന്നും ഇത്തരത്തിൽ ഔദ്യോഗിക വിവരങ്ങളൊന്നും പുറത്ത് വന്നിട്ടില്ല. എന്തായാലും താരം വില്ല വിടുമെന്ന് ഏറെക്കുറെ ഉറപ്പായിട്ടുണ്ടെന്നാണ് ഫുട്‌ബോൾ നിരീക്ഷകർ വിലയിരുത്തുന്നത്.

Report says Emiliano Martines Will leave aston villa at the end of the season