കേരളം, വാഹനപ്രേമികളുടെ സ്വർഗമാണ്. സോഷ്യൽ മീഡിയയുടെ വളർച്ചയോടെ കാറുകളുടെ ഡെലിവറി പോലും സിനിമാറ്റിക് അനുഭവമായി മാറിയിരിക്കുന്നു. ഇത്തരം വീഡിയോകൾ ഇന്റർനെറ്റിൽ തരംഗം സൃഷ്ടിക്കാറുണ്ട്. അത്തരത്തിലൊരു സിനിമാ ശൈലിയിലുള്ള ഡെലിവറിയാണ് കഴിഞ്ഞ ദിവസം മലപ്പുറത്ത് നടന്നത്. കേരളത്തിലെ ആദ്യത്തെ ബെന്റ്‌ലി ബെന്റയ്ഗ EWB സിഗ്‌നേച്ചർ എഡിഷന്റെ ഡെലിവറിക്കായി ഉടമ ഹെലികോപ്റ്ററിൽ പറന്നിറങ്ങി! ഇന്ത്യയിൽ അഞ്ചെണ്ണത്തിൽ താഴെ മാത്രമുള്ള ഈ ആഡംബര എസ്‌യുവി സ്വന്തമാക്കിയത് മലപ്പുറം വളാഞ്ചേരി സ്വദേശിയും പ്രശസ്ത ബിസിനസുകാരനുമായ ‘പോളണ്ട് മൂസ’ എന്നറിയപ്പെടുന്ന മൂസ ഹാജിയാണ്.

 

 

‘കിംഗ് ഓഫ് പെർഫ്യൂംസ്’ എന്ന വിശേഷണമുള്ള മൂസ, ആഡംബര സുഗന്ധദ്രവ്യങ്ങൾ വിൽക്കുന്ന ‘ഫ്രാഗ്രൻസ് വേൾഡ്’ എന്ന സ്ഥാപനത്തിന്റെ ചെയർമാനാണ്. 2024-ലെ ന്യൂഡൽഹിയിൽ നടന്ന പ്രസ്റ്റീഷ്യസ് എപിജെ അബ്ദുൾ കലാം അവാർഡിൽ ‘പെർഫ്യൂമിന്റെ രാജാവ്’ എന്ന പദവിയോടെ അദ്ദേഹം ആദരിക്കപ്പെട്ടിരുന്നു. കേരളത്തിലെ ഈ ബെന്റ്‌ലി ഡെലിവറി വീഡിയോ രാജ്യവ്യാപകമായി ശ്രദ്ധ നേടിയിട്ടുണ്ട്. 

 

 

വീഡിയോയുടെ തുടക്കം മലപ്പുറത്തെ ഒരു മണിമാളികയ്ക്ക് മുകളിലൂടെ ഹെലികോപ്റ്റർ പറക്കുന്ന ദൃശ്യത്തോടെയാണ്. ഇത് മൂസ ഹാജിയുടെ വീടാണെന്നാണ് സൂചന. തുടർന്ന്, മൂസ ഹാജി ഹെലികോപ്റ്ററിൽ ഡെലിവറി സ്ഥലത്തേക്ക് യാത്ര തിരിക്കുന്നു. റേഞ്ച് റോവർ, ലാൻഡ് ക്രൂയിസർ, ലാൻഡ് റോവർ ഡിഫെൻഡർ 110 തുടങ്ങിയ ആഡംബര വാഹനങ്ങൾ അകമ്പടിയായി റോഡ് മാർഗം എത്തുന്നു. മലപ്പുറത്തെ തുറന്ന മൈതാനത്ത് ഹെലികോപ്റ്റർ ലാൻഡ് ചെയ്യുന്നു. അവിടെ, നീല തുണിയിൽ പൊതിഞ്ഞ ബെന്റ്‌ലി ബെന്റയ്ഗ EWB സിഗ്‌നേച്ചർ എഡിഷൻ നിൽക്കുന്നു. മൂസ ഹാജി തുണി നീക്കി കാറിനെ വെളിപ്പെടുത്തിയ ശേഷം, പുതുതായി നിർമിച്ച ദേശീയപാതയിലൂടെ റോസ് ഗോൾഡ് ഷേഡിലുള്ള ഈ ആഡംബര എസ്‌യുവി ഓടിച്ച് പോകുന്നതോടെ വീഡിയോ അവസാനിക്കുന്നു.

ബെന്റ്‌ലി ബെന്റയ്ഗ EWB: ആഡംബരത്തിന്റെ പര്യായം

മൂസ ഹാജി സ്വന്തമാക്കിയ ഈ ബെന്റ്‌ലി ബെന്റയ്ഗ EWB സിഗ്‌നേച്ചർ എഡിഷന്‍റെ എക്സ്-ഷോറൂം വില 6 കോടി രൂപ മുതലാണ്. KL 55 AL 7777 എന്ന ഫാൻസി നമ്പർപ്ലേറ്റും ഈ വാഹനത്തിനായി അദ്ദേഹം നേടിയിട്ടുണ്ട്. 4.0 ലിറ്റർ ട്വിൻ-ടർബോചാർജ്ഡ് V8 പെട്രോൾ എഞ്ചിനാണ് ഈ എസ്‌യുവിയുടെ ഹൃദയം. 550 PS പവറും 770 Nm ടോർക്കും ഉത്പാദിപ്പിക്കുന്ന ഈ എഞ്ചിൻ, 4.6 സെക്കൻഡിൽ 0-100 കിലോമീറ്റർ വേഗത കൈവരിക്കുന്നു. പരമാവധി വേഗത മണിക്കൂറിൽ 290 കിലോമീറ്ററാണ്. ഓട്ടോമാറ്റിക് ട്രാൻസ്മിഷനോടൊപ്പം പാഡിൽ ഷിഫ്റ്ററുകളും സ്‌പോർട്‌സ് മോഡും ഈ വാഹനത്തിൽ ലഭ്യമാണ്. ലിറ്ററിന് 7.6 കിലോമീറ്റർ ഇന്ധനക്ഷമതയും AWD ഡ്രൈവ്‌ട്രെയിനും കമ്പനി വാഗ്ദാനം ചെയ്യുന്നു.

 

 

ആഡംബര സവിശേഷതകൾ

ബെന്റയ്ഗ EWB-യുടെ ഇന്റീരിയർ ടാൻ, ബീജ് നിറങ്ങളിൽ കസ്റ്റം-ബിൽഡ് ചെയ്തിരിക്കുന്നു. യാത്രക്കാരുടെ ശരീര താപനിലയും ഈർപ്പവും തിരിച്ചറിഞ്ഞ് ക്ലൈമറ്റ് കൺട്രോൾ ക്രമീകരിക്കുന്ന എയർലൈൻ സീറ്റ് സ്‌പെസിഫിക്കേഷനാണ് ഈ വാഹനത്തിന്റെ പ്രധാന ആകർഷണം. റിയർ സീറ്റ് യാത്രക്കാർക്ക് പരമാവധി സുഖസൗകര്യം ഉറപ്പാക്കാൻ പ്രത്യേക ടച്ച്‌സ്‌ക്രീൻ നൽകിയിട്ടുണ്ട്. പവർ-അസിസ്റ്റഡ് ഡോറുകളും ഈ മോഡലിന്റെ സവിശേഷതയാണ്. റോൾസ് റോയ്‌സ് കലിനൻ, റേഞ്ച് റോവർ LWB, മെർസിഡീസ്-മേയ്ബാക്ക് GLS600 എന്നിവയാണ് ഈ വാഹനത്തിന്റെ പ്രധാന എതിരാളികൾ.