കോഴിക്കോട്: സംസ്ഥാനത്ത് തുടരുന്ന കനത്ത മഴയിൽ വ്യാപക നാശനഷ്ടം. കോഴിക്കോട് നല്ലളത്ത് റെയിൽവേ ട്രാക്കിലേക്ക് മൂന്ന് മരങ്ങൾ കടപുഴകി വീണതിനെ തുടർന്ന് ട്രെയിൻ ഗതാഗതം തടസ്സപ്പെട്ടു. ജാംനഗർ എക്സ്പ്രസ് കടന്നുപോകുന്നതിന് തൊട്ടുമുമ്പാണ് സംഭവം. മരങ്ങൾ വീണതോടെ വൈദ്യുതി ലൈനുകൾ പൊട്ടുകയും ഗതാഗതം മുടങ്ങുകയും ചെയ്തു. പ്രദേശത്ത് ചുഴലിക്കാറ്റ് അനുഭവപ്പെട്ടതായി നാട്ടുകാർ പറഞ്ഞു. ചില വീടുകളുടെ മേൽക്കൂരയിലെ ഷീറ്റുകൾ തകർന്ന് ട്രാക്കിൽ വീണു. മരങ്ങൾ മുറിച്ചുമാറ്റാനുള്ള ശ്രമങ്ങൾ തുടരുകയാണ്. ഗതാഗതം പുനഃസ്ഥാപിക്കാൻ മണിക്കൂറുകൾ വേണ്ടിവരുമെന്നാണ് വിവരം.

ആലുവ അമ്പാട്ടുകാവിലും ശക്തമായ കാറ്റിൽ ആൽമരം റെയിൽവേ ട്രാക്കിൽ വീണ് ട്രെയിൻ ഗതാഗതം തടസ്സപ്പെട്ടു. എറണാകുളം ഭാഗത്തേക്കുള്ള ട്രെയിനുകൾ അങ്കമാലിയിലും തൃശൂർ ഭാഗത്തേക്കുള്ളവ എറണാകുളത്തും കുടുങ്ങിക്കിടക്കുകയാണ്. മരം മുറിച്ചുമാറ്റാനുള്ള ശ്രമങ്ങൾ പുരോഗമിക്കുന്നു. വൈദ്യുതി ലൈനുകൾ പൊട്ടിയതാണ് ഗതാഗത തടസ്സത്തിന് കാരണം.

തിരുവനന്തപുരം പാങ്ങപ്പാറയിൽ കാറിന് മുകളിൽ മരം വീണ് അപകടം. രാത്രി 8:15-ന് കഴക്കൂട്ടത്ത് നിന്ന് ശ്രീകാര്യത്തേക്ക് പോവുകയായിരുന്ന കാറിന് മുന്നിലാണ് മരം വീണത്. പാറ്റൂർ സ്വദേശി മിക്കി ഡ്രൈവ് ചെയ്ത കാറിന്റെ ഡ്രൈവർക്ക് പരിക്കില്ലാതെ അത്ഭുതകരമായി രക്ഷപ്പെട്ടു. സംഭവത്തെ തുടർന്ന് ഏറെനേരം ഗതാഗതം തടസ്സപ്പെട്ടു.

പാലാ-ഈരാറ്റുപേട്ട റോഡിൽ മൂന്നാനിയിൽ മീനച്ചിലാർ കരകവിഞ്ഞ് വെള്ളം കയറി ഗതാഗതം മുടങ്ങി. ഉച്ചയോടെ വെള്ളപ്പൊക്കം തുടങ്ങിയതോടെ വാഹനങ്ങൾ ചെറുവഴികളിലൂടെ തിരിച്ചുവിട്ടു. ജില്ലയുടെ കിഴക്കൻ മേഖലകളിൽ ശക്തമായ മഴ പെയ്തതാണ് വെള്ളപ്പൊക്കത്തിന് കാരണം.

അടുത്ത അഞ്ച് ദിവസം സംസ്ഥാനത്ത് വ്യാപക മഴയ്ക്ക് സാധ്യതയെന്ന് കാലാവസ്ഥാ വകുപ്പ് മുന്നറിയിപ്പ് നൽകി. പടിഞ്ഞാറൻ കാറ്റ് ശക്തമാകുന്നതിനാൽ തിങ്കളാഴ്ച ഒറ്റപ്പെട്ട അതിതീവ്ര മഴയും, മെയ് 30 വരെ അതിശക്തമായ മഴയും പ്രതീക്ഷിക്കുന്നു. ചൊവ്വാഴ്ച കോഴിക്കോട്, വയനാട്, കണ്ണൂർ ജില്ലകളിൽ റെഡ് അലർട്ട് പ്രഖ്യാപിച്ചു. കണ്ണൂർ, വയനാട്, കോഴിക്കോട്, കോട്ടയം ജില്ലകളിലെ വിദ്യാഭ്യാസ സ്ഥാപനങ്ങൾക്ക് ചൊവ്വാഴ്ച അവധി.