മലപ്പുറം: തെരഞ്ഞെടുപ്പ് പ്രഖ്യാപിച്ച ഉടനെ യു.ഡി.എഫ് സ്ഥാനാർഥിത്വത്തിൽ സമ്മർദ തന്ത്രങ്ങളുമായിറങ്ങിയ പി.വി അൻവറിന് വഴങ്ങാതെ എന്നാൽ, പിണക്കാതെയും കോൺഗ്രസ്. നിലമ്പൂരിൽ ആര്യാടൻ ഷൗക്കത്തിനെ സ്ഥാനാർഥിയാക്കരുതെന്ന് ആവശ്യപ്പെട്ട് പി.വി അൻവർ പരസ്യമായാണ് ഇന്നലെ രംഗത്തുവന്നത്.

ഇതോടെ തെരഞ്ഞെടുപ്പ് പ്രഖ്യാപിച്ചാൽ 24 മണിക്കൂറിനുള്ളിൽ സ്ഥാനാർഥിയെ പ്രഖ്യാപിക്കുമെന്നറിയിച്ച കോൺഗ്രസ് വെട്ടിലായി. ഒടുവിൽ അൻവറിന്റെ സമ്മർദങ്ങൾക്ക് വഴങ്ങാതെ കോൺഗ്രസ് ആര്യാടൻ ഷൗക്കത്തിനെ സ്ഥാനാർഥിയാക്കുകയായിരുന്നു. എന്നാൽ, പി.വി അൻവറിനെ വിമർശിക്കാനോ തള്ളിപ്പറയാനോ കോൺഗ്രസ് നേതാക്കാൾ മുതിർന്നതുമില്ല. പി.വി അൻവർ യു.ഡി.എഫിന്റെ സ്ഥാനാർഥിക്ക് പിന്തുണ നേരത്തെ തന്നെ അറിയിച്ചിട്ടുണ്ടെന്നാണ് പിന്നീട് പ്രതിപക്ഷ നേതാവ് വി.ഡി സതീശൻ പ്രതികരിച്ചത്.

കഴിഞ്ഞ ജനുവരി 13നാണ് പി.വി അൻവർ നിലമ്പൂർ എം.എൽ.എ സ്ഥാനം രാജിവച്ചത്. യു.ഡി.എഫ് സ്ഥാനാർഥിക്ക് പിന്തുണ നൽകുമെന്നു പറഞ്ഞ അൻവർ ആര്യാടൻ ഷൗക്കത്തിനെ തള്ളിപ്പറയുകയും ചെയ്തിരുന്നു. പിന്നീട് യു.ഡി.എഫിന്റെ ഭാഗമാകാൻ തൃണമൂൽ കോൺഗ്രസിൽ ചേർന്നതോടെ യു.ഡി.എഫ് ആരെ സ്ഥാനാർഥിയാക്കിയാലും പിന്തുണ നൽകുമെന്നാണ് അറിയിച്ചിരുന്നത്. എന്നാൽ, തെരഞ്ഞെടുപ്പ് തീയതി പ്രഖ്യാപിച്ചതോടെ അൻവർ വീണ്ടും കളം മാറ്റുകയായിരുന്നു. പിണറായിസത്തെ തോൽപ്പിക്കാൻ ചെകുത്താന്റെ കൂടെയും നിൽക്കും. പക്ഷേ, ചെകുത്താൻ നല്ലത് ആയിരിക്കണമെന്ന് മാത്രമെന്നു വരെ അൻവർ പറഞ്ഞിരുന്നു. 

Anwar succumbs to pressure Congress refuses to budge