ബര്‍ലിന്‍: ഡച്ച് പരിശീലകന്‍ എറിക് ടെന്‍ ഹാഗിനെ പരിശീലകനായി നിയമിച്ച് ബുണ്ട്‌സ് ലിഗ ക്ലബ് ബയര്‍ ലെവര്‍കൂസന്‍. സാബി അലോന്‍സോ റയല്‍ മാഡ്രിഡിലേക്ക് ചേക്കേറിയതോടെയാണ് ലെവര്‍കൂസന്‍ ടെന്‍ഹാഗിനെ തട്ടകത്തെത്തിച്ചത്. 55കാരനായ ടെന്‍ഹാഗ് 2027 വരെയാണ് ക്ലബില്‍ കരാറൊപ്പിട്ടത്. 2022 മുതല്‍ ഇംഗ്ലിഷ് ക്ലബ് മാഞ്ചസ്റ്റര്‍ യുനൈറ്റഡിനെ പരിശീലിപ്പിച്ച ടെന്‍ഹാഗിനെ മോശം പ്രകടനത്തെ തുടര്‍ന്ന് 2024 ഒക്ടോബറില്‍ പുറത്താക്കുകയായിരുന്നു.

തുടര്‍ന്നുള്ള ഇടവേളയ്ക്ക് ശേഷമാണ് ടെന്‍ ഹാഗ് പുതിയ തട്ടകത്തെത്തുന്നത്. 2018 മുതല്‍ 2022 വരെ ഡച്ച് ക്ലബ് അജാക്‌സിനെ പരിശീലിപ്പിച്ചപ്പോഴാണ് ടെന്‍ ഹാഗ് കൂടുതല്‍ ശ്രദ്ധിക്കപ്പെട്ടത്. അജാക്‌സിനൊപ്പം മൂന്ന് എറെഡിവിസ് കിരീടങ്ങള്‍ നേടിയ അദ്ദേഹം ടീമിനെ 2019 ചാംപ്യന്‍സ് ലീഗ് സെമിയിലെത്തിക്കുകയും ചെയ്തിരുന്നു. കഴിഞ്ഞ സീസണ്‍ ബുണ്ടസ് ലിഗയില്‍ ചാംപ്യന്മാരായ ലെവര്‍കൂസന്‍ നിലവിലെ സീസണില്‍ ബയേണിനു പിന്നില്‍ രണ്ടാമതായാണ് ഫിനിഷ് ചെയ്തത്. ഇതോടെ കിരീടം തിരിച്ചു പിടിക്കല്‍ തന്നെയാണ് ടെന്‍ ഹാഗിന്റെ മുന്നിലുള്ള ദൗത്യം.

Bundesliga club Bayer Leverkusen appoints Dutch coach Erik ten Hag as coach