ജയ്പൂർ: 2025 ഐപിഎല്ലിലെ ഗ്രൂപ്പ് ഘട്ടത്തിലെ അവസാന മത്സരത്തിൽ മുംബൈ ഇന്ത്യൻസിനെതിരെ പഞ്ചാബ് കിങ്‌സ് ഏഴ് വിക്കറ്റുകളുടെ തകർപ്പൻ വിജയമാണ് പഞ്ചാബ് കിങ്‌സ് സ്വന്തമാക്കിയത്. ജയ്പൂർ സവായ് മാൻസിംഗ് സ്റ്റേഡിയത്തിൽ നടക്കുന്ന മത്സരത്തിൽ ടോസ് നഷ്ടപ്പെട്ട് ആദ്യം ബാറ്റ് ചെയ്ത മുംബൈ ഏഴ് വിക്കറ്റ് നഷ്ടത്തിൽ 184 റൺസ് നേടിയത്. വിജയലക്ഷ്യം പിന്തുടർന്നിറങ്ങിയ പഞ്ചാബ് ലക്ഷ്യം അനായാസം മറികടക്കുകയായിരുന്നു. ഈ വിജയത്തിന് പിന്നാലെ ക്വാളിഫയർ വൺ ഉറപ്പിക്കാനും പഞ്ചാബിന് സാധിച്ചു. 

പഞ്ചാബ് പ്ലേ ഓഫിൽ കടന്നതോടെ ഐപിഎല്ലിൽ മറ്റൊരു ക്യാപ്റ്റനും നേടാൻ സാധിക്കാത്ത നേട്ടമാണ് പഞ്ചാബ് നായകൻ ശ്രേയസ് അയ്യർ സ്വന്തമാക്കിയത്. ഐപിഎല്ലിൽ മൂന്ന് വ്യത്യസ്ത ടീമുകളെ പ്ലേ ഓഫിലേക്ക്  നയിക്കുന്ന ആദ്യ ക്യാപ്റ്റനായി മാറാനാണ് അയ്യർക്ക് സാധിച്ചത്. ഇതിനു മുമ്പ് കൊൽക്കത്ത നൈറ്റ് റൈഡേഴ്‌സ്, ഡൽഹി ക്യാപ്പിറ്റൽസ് എന്നീ ടീമുകളെയാണ് അയ്യർ പ്ലേ ഓഫിലേക്ക് നയിച്ചത്.

കൊൽക്കത്തക്ക് മൂന്നാം ഐപിഎൽ കിരീടം നേടികൊടുത്തത് അയ്യരായിരുന്നു. ഡൽഹിയെ ചരിത്രത്തിലെ ആദ്യ ഫൈനലിലേക്ക് നയിച്ചതും അയ്യർ തന്നെയാണ്. ഇപ്പോൾ നീണ്ട 11 വർഷങ്ങൾക്ക് ശേഷം പഞ്ചാബ് അയ്യരിന്റെ കീഴിൽ പ്ലേ ഓഫിലേക്ക് യോഗ്യത നേടിയിരിക്കുകയാണ്. അവസാനമായി 2014ൽ ആയിരുന്നു പഞ്ചാബ് പ്ലേ ഓഫ് കളിച്ചിരുന്നത്.

ഐപിഎൽ മെഗാ ലേലത്തിൽ 26.5 കോടിക്കായിരുന്നു ശ്രേയസിനെ പഞ്ചാബ് സ്വന്തമാക്കിയിരുന്നത്. ഐപിഎൽ ചരിത്രത്തിൽ ലേലത്തിൽ ഒരു താരത്തിന് ലഭിക്കുന്ന ഏറ്റവും ഉയർന്ന രണ്ടാമത്തെ തുക കൂടിയാണിത്. ഐപിഎൽ തുടങ്ങുന്നതിന്‌ മുന്നോടിയായി പഞ്ചാബിന് ആദ്യ കിരീടം നേടികൊടുക്കയാണ് തന്റെ ലക്ഷ്യമെന്ന് അയ്യർ തുറന്നു പറഞ്ഞിരുന്നു.

''ലേലത്തിൽ എന്നെ പഞ്ചാബ് തെരഞ്ഞെടുത്തത് മുതൽ എന്റെ ആഗ്രഹം അതായിരുന്നു. പഞ്ചാബ് കിങ്‌സ് ഇതുവരെ കിരീടം നേടിയിട്ടില്ല. അവർക്കായി കിരീടം ഉയർത്തുക എന്നതാണ് എന്റെ ലക്ഷ്യം. ഇതൊരു ചരിത്ര നേട്ടമായിരിക്കും. അവരുടെ ആരാധകരെ സന്തോഷിപ്പിക്കാനും അവർക്ക് ആഘോഷിക്കാനും അവസരം നൽകാൻ ഞാൻ ആഗ്രഹിക്കുന്നു'' ജിയോ ഹോട്സ്റ്റാറിന് നൽകിയ അഭിമുഖത്തിൽ അയ്യർ പറഞ്ഞു. 

Shreyas Iyer Create a Rare Record in IPL Captaincy