റിയാദ്: സഊദി പ്രോ ലീഗിലെ ഈ സീസണിലെ ഗോൾഡൻ ബൂട്ട് സ്വന്തമാക്കി അൽ നസർ നായകൻ ക്രിസ്റ്റ്യാനോ റൊണാൾഡോ. ഈ സീസണിൽ നസറിനു വേണ്ടി 25 ഗോളുകളാണ് പോർച്ചുഗീസ് ഇതിഹാസതാരം അടിച്ചുകൂട്ടിയത്. തുടർച്ചയായ രണ്ടാം സീസണിൽ ആണ് റൊണാൾഡോ ഗോൾഡൻ ബൂട്ട് സ്വന്തമാക്കുന്നത്. 

കഴിഞ്ഞദിവസം നടന്ന അൽഫത്തേ ഹിനെതിരെയുള മത്സരത്തിൽ റൊണാൾഡോ ഗോൾ നേടിയിരുന്നു. എന്നാൽ മത്സരം പരാജയപ്പെടുകയായിരുന്നു. രണ്ടിനെതിരെ മൂന്നു ഗോളുകൾക്കായിരുന്നു അൽ നസർ തോൽവി വഴങ്ങിയത്. മത്സരത്തിൽ റൊണാൾഡോക്ക് പുറമേ അൽ നസറിന് വേണ്ടി സാദിയോ മാനെയും ഗോൾ നേടി. അൽ ഫത്തേഹിനായി മാറ്റിയാസ് വർഗാസ്, മൗറാദ് ബട്ന, മാത്യൂസ് മച്ചാഡോ എന്നിവരാണ് ഗോൾ നേടിയത്.

റൊണാൾഡോ ഈ സീസൺ അവസാനത്തോടെ അൽ നസർ വിടുമെന്ന റിപ്പോർട്ടുകൾ നിലനിൽക്കുന്നുണ്ട്. അൽ അഹ്ലി, പാൽമിറാസ്, ചെൽസി എന്നീ ടീമുകൾ താരത്തെ സ്വന്തമാക്കാൻ ശ്രമിക്കുന്നുവെന്നും റിപ്പോർട്ടുകൾ നിലനിൽക്കുന്നുണ്ട്. വരാനിരിക്കുന്ന ഫിഫ ക്ലബ് ലോകകപ്പിൽ ഈ മൂന്ന് ക്ലബ്ബുകളും കളിക്കുന്നുണ്ട്. അതുകൊണ്ട് തന്നെ റൊണാൾഡോ ഈ ടൂർണമെന്റ് കളിക്കാനായി അൽ നസർ വിടാനുള്ള സാധ്യതകളും നിലനിൽക്കുന്നുണ്ട്. 

അൽ നസർ പരിശീലകൻ സ്റ്റെഫാനോ പിയോലിയുടെ തന്ത്രങ്ങളിൽ റൊണാൾഡോ തൃപ്തനല്ലെന്നും, ക്ലബുമായുള്ള കരാർ പുതുക്കുന്നതിന് മുൻപ് കോച്ച് പിയോലിയെയും സ്‌പോർട്ടിംഗ് ഡയറക്ടർ ഫെർണാണ്ടോ ഹിയേറോയെയും നീക്കം ചെയ്യണമെന്നും റൊണാൾഡോ ആവശ്യപ്പെട്ടതായി വാർത്തകളും നിലനിൽക്കുന്നുണ്ട്. 

2022ലാണ് റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത്  റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. 

Cristaino Ronaldo Won Golden Boot Of Saudi Pro League This Season