പത്തനംതിട്ട: മഴ കനക്കുന്നതിനിടെ 'ഭയങ്കര മഴ സാറേ, അവധി തരാമോ' എന്നു തുടങ്ങുന്ന ചോദ്യങ്ങളെകൊണ്ട് ബുദ്ധിമുട്ടിയിരിക്കുകയാണ് ജില്ലാ കളക്ടര്‍മാര്‍. മഴ തീവ്രമായപ്പോള്‍ പത്തനംതിട്ട കളക്ടര്‍ എം. പ്രേം കൃഷ്ണനും ലഭിച്ചു ഇത്തരത്തിലുള്ള നിരവധി അഭ്യര്‍ത്ഥനകള്‍. 

'കടുത്ത മഴ ആയതിനാല്‍ ദയവായി ആവുധി പ്രഖ്യാപിക്കുവാന്‍ അപേക്ഷിക്കുന്നു' എന്നായിരുന്നു സന്ദേശം. ഇതില്‍ നിറയെ അക്ഷരത്തെറ്റുകള്‍ ഉണ്ടായിരുന്നു.

സ്ഥിരമായി അവധി ചോദിക്കാതെ സ്‌കൂളില്‍ പോകൂ എന്നും പ്രത്യേകിച്ച് മലയാളം ക്ലാസില്‍ കേറൂ എന്നുമാണ് ഇതിന് കളക്ടര്‍ മറുപടി നല്‍കിയത്. തന്റെ ഇന്‍സ്റ്റഗ്രാം സ്റ്റോറിയിലൂടെയാണ് കളക്ടര്‍ ചോദ്യത്തിന്റെയും മറുപടിയുടെയും സ്‌ക്രീന്‍ഷോട്ട് പങ്കുവച്ചത്. 

'അവധി അഭ്യര്‍ത്ഥന ഏതെങ്കിലും ആപ്പ് ഉപയോഗിച്ച് മലയാളത്തിലേക്ക് മാറ്റിയതായിരിക്കണം. ഇത് ബോധ്യപ്പെടുത്താന്‍ വേണ്ടിയാണ് സ്‌ക്രീന്‍ഷോട്ട് എടുത്ത് സ്‌റ്റോറിയാക്കിയത്' പത്തനംതിട്ട കളക്ടര്‍ വ്യക്തമാക്കി.