കൊച്ചി: അറബിക്കടലിൽ ചരക്കുകപ്പൽ മുങ്ങിയതിനെ തുടർന്ന് എണ്ണയും കാൽസ്യം കാർബേഡ് പോലുള്ള രാസവസ്തുക്കളും കടലിൽ കലർന്നെന്ന ആശങ്കയിൽ മത്സ്യമേഖലയ്ക്ക് കനത്ത തിരിച്ചടി. 

ജനം വാങ്ങാൻ മടിച്ചതോടെ തമിഴ്‌നാട്, കർണാടക സംസ്ഥാനങ്ങളിൽനിന്നുള്ള മത്സ്യമാണ് വിൽപന നടത്തുന്നതെന്നും കേരള തീരത്തുനിന്നുള്ളത് അല്ലെന്നും അവകാശപ്പെട്ടാണ് ചില കച്ചവടക്കാർ വിപണനം നടത്തുന്നത്. ഇതോടെ വിപണിയിൽ മത്സ്യത്തിന് പൊന്നുംവിലയായി. നെയ്മീൻ, ആവോലി തുടങ്ങിയവയ്ക്ക് ആയിരം രൂപയ്ക്ക് അടുത്തായിരുന്നു നേരത്തെ തന്നെവില. കേര, ചൂര തുടങ്ങിയവയ്ക്കും വൻ തോതിൽ വില ഉയർന്നിരുന്നു. എന്നാൽ ഇപ്പോൾ മത്തി, അയല തുടങ്ങിയവയ്ക്കു പോലും കിലോയ്ക്ക് 360 രൂപയാണ് വില. മാന്തൾ മീനിന് ഇന്നലെ 560 രൂപയാണ്. ചെറുമീൻ ആയ വേളൂരിക്ക് കിലോ 400 രൂപയായി ഉയർന്നു. 

കടൽ മത്സ്യത്തെ ജനങ്ങൾ ആശങ്കയോടെ കാണാൻ തുടങ്ങിയതിനെ തുടർന്ന് പുഴയിൽനിന്നുംഫാമിൽനിന്നുമുള്ള കരിമീൻ, തിലോപ്പി, വാള തുടങ്ങിയവയ്ക്കും കാര്യമായി വില ഉയർന്നു. വിലകൂടിയതോടെ ആളുകൾ കോഴി ഇറച്ചിയെ ആശ്രയിക്കാൻ തുടങ്ങി. ഇതോടെ ചിക്കൻ വില കിലോയ്ക്ക് 150 (ലൈവ്) രൂപയായി ഉയർന്നു. 

കപ്പൽ മുങ്ങിയതോടെ തീരക്കടലിൽ മത്സ്യബന്ധനത്തിന് നിയന്ത്രണം ഏർപ്പെടുത്തിയിട്ടുണ്ട്. മധ്യകേരളത്തിലെ പല തീരങ്ങളിലും ഏറെക്കുറെ മത്സ്യബന്ധനം നിലച്ചമട്ടാണ്. കനത്ത കാറ്റും മഴയും കാരണം ദിവസങ്ങൾക്കു മുമ്പുതന്നെ നിയന്ത്രണം ഏർപ്പെടുത്തിയിരുന്നു. ജൂൺ 9 മുതൽ ട്രോളിങ്ങ് നിരോധനവും വരുന്നതോടെ മത്സ്യത്തൊഴിലാളികളുടെ ജീവിതം കൂടുതൽ ദുരിതമാകും.

Fishing is restricted in kerala Fish prices rise hard times ahead for fishermen